Saturday, December 8, 2007

قرب قرب قرب رئيس الجمهوريه بذات نفسه يقول لا مساس بالدعم

طبعا الأيام السوده اللي احنا عيشنها اليومين دول لا يخفي علي أحد فيها هذه الكميه الهائله من التصريحات المتناقضه المتضاربه في ذات الوقت عن الدعم والمدعومين او الدعك والمدعوكين اختار اللي يريحك فكلاهما صحيح أخر تصريح سمعت به من مدونه أفكار مبعثره واتحرق بيه دمي ما قاله أحد الوزراء الميمونين عن أن حصول المواطن المصري علي جنيه ونص يكفيه ليخرج به عن خط الفقر في تعليقي علي المدونه سألت عن وضع رئيس الجمهوريه في هذا باعتباره حامي حمي معدومي الدخل والبسطاء من أبناء هذا الشعب المنكوب بصراحه الراجل لم يكذب خبر ففي تصريحات له صدرت في صحف الجمعه يقول فيها بأنه لا الغاء للدعم وانه لا مساس به من قبل حكومتنا النظيفه يا سلام أثلج صدري والله هذا التصريح وريحني أخر راحه بس هذه الراحه لم تطول أكثر من ثمانيه صفح في جرنال الأخبار بتاع يوم الجمعه 7 /12/2007 لأنه في نفس هذا الجرنال وفي صفحته الحاديه عشر تصريحات لرئيس الوزراء السيد أحمد النظيف جدا يقول فيها سيادته لا فض فوه أن الدعم الحالي له عيوب كثيره أهمها أنه لا يصل لمن يستحقه وكأن حد راح واشتكي لسيادته بأنه لا يصل اليه الدعم طبعا قريت الموضوع بالتفصيل وجدت أن هذه التصريحات كانت من خلال مقابله معه في برنامج قضايا الساعه علي البرنامج العام طبعا لن أتطرق للتناقض الواضح بين تصريح رئيس الجمهوريه بجلاله قدره في أول الجرنال مع رئيس الوزراء بنظافه قدره في الصفحه الحاديه عشر من ذات الجرنال ولكن ما سوف اتطرق اليه هو مضمون حديث رئيس الوزراء في برنامج قضايا الساعه بيقول ايه سيادته في الأول بيقول أنه لن يتم استخدام الدعم كوسيله لزياده المنافسه في الداخل ولكن الأساس منه أن يكون لدينا قدره تنافسيه مع الأقتصاد العالمي ....مش عارف ازاي بصراحه ايه صله الدعم بزياده القدره التنافسيه مع الأقتصاد العالمي الا لوكانت هذه هي تعليمات صندوق النقد الدولي اللي الحكومه مش فالحه في حاجه غير انها تنفذ تعليماته طيب بيقول ايه تاني رئيس الوزراء لا فض فوه بيقول أن هناك قناعه لدي الشعب المصري بأن الدعم يذهب الي من لا يستحقه ...مش عارف برضه الثقه الجامده دي جابها منين بصراحه ومين اللي وصله بقي قناعه الشعب المصري وعن اي شعب يتحدث يعرف هو منين الشعب المصري يعرف ايه عن معاناه غلابه وبسطاء هذا الشعب طب هو لو كان يعرف حاجه كانت تبقي دي تصريحات و اللي ما تتدخلش حتي علي واحد ساقط ابتدائيه ...طبعا بعد ما يأكد هذه القناعه يستشهد بأن سلعه كبنزين السيارات لا تخدم الا فئه من الأسر المصريه لا تزيد عن 5% هو يقصد طبعا من يمتلكون السيارات طبعا هذه كلمه حق يراد بها باطل كما يقولون لأن أي حد بيفهم وعنده ذره فهم لازم يقول ان سلعه زي البنزين لما يتشال عنها الدعم وتغلي ده هايبقي زي اللعنه اللي بتصيب كل حاجه لأن أصحاب وسائل النقل اللي بتنقل المنتجات من أماكن تصنيعها أو زراعاتها ده في حاله المحاصيل الزراعيه هاتحمل فرق السعر علي المنتج والذي بالتالي سوف يحمله علي المستهلك زي بالظبط حكايه السولار اللي أول ما رفعه سعره تاني يوم القوطه بقت بتلاته جنيه ومش هاتكلم عن البصل بلاش علشان ده من انجازات عصر مبارك القوميه اللي فيه وصل سعر البصل لخمسه جنيه بعد ما كان بيتباع العشره كيلو بتلاته بس طبعا أنا نفسي مصدوده اني أكمل باقي التصريحات الميمونه والتي فيها يتضح مدي كميه الأستخفاف واللا مبالاه بهذا الشعب بس طبعا في حاله الدكتور نظيف فالراجل متوافق مع نفسه لأنه أول ما مسك الحكومه قال في تصريحه الشهير ان الشعب غير ناضج سياسيا يعني بالعربي عاوز اللي يسوقه واديهم سيادتهم بيسوقونا مش عارف هايودونا علي فين وايه أخرتنا معاهم بس طبعا أنا مقتنع برأي وهافضل أقوله ومش هامل أبدا أني أكرره كل شويه ألا وهو ان احنا اللي نستاهل كل اللي بيتعمل فينا عمرك شوفت شعب أهبل بالطريقه دي يعني واحد بيقلك أنا بادورلك عل مصيبه علشان ابليك بيها ايه المفروض انه يحصل من جناب سعادتك المفروض توقفه عند حده والا يسوق فيها لأ احنا بقي بشطارتنا سايبنهم يعملو اللي هما عاوزينه، خلاص يعمله اللي هما عاوزينه ده الواحد هايجيله أمراض الدنيا والأخره من حرقه الدم اللي هو فيها

4 comments:

فتوح أبو المفاتيح said...

هوا طبعا دي حاجة طبيعة من واحد قعد على قلبنا لأكثر من 26 سنة
متوقع من يعمل ايه ؟
الراجل زهق
فهو بيسلي نفسه
عمال يلاعبنا عارف زي مايكون عندك قطة صغنونة وتلاعبها بحتة سمكة او ماسك في ايدك حاجة
أهو الراجل بيعمل كدا

أما عن أور براذر مستر كليين
فهو كما يكول المثل
هبلة ومسكوها طبلة

زي ماقلت قبل كده احنا شعب بط
وزي ما انت قلت احنا شعب لا يحب إلا ان ياسق
نجمع الكلمتين مع بعض
هنلاقي لأننا كسالى لدرجة ان احنا مش عاوزين نفكر لنفسنا جبنا مستر كلين يسوقنا ويودينا مطرح ما هو عاوز
خير
محدش عارف الخير فين
سلام عليكم

mado80 said...

فتوح أبو المفاتيح.... أولا تحياتي لك... وشكرا علي التعليق ، ثانيا تعرف اس المشاكل ايه؟ هي القعده اللي بقلها أكتر من 26 سنه أكيد دماغ الراجل بلطط بقت علي البلاط يعني مش فاهم ازاي واحد يقعد في منصب واحد كل العمر ده ولسه عنده حاجه جديده طيب لما هو كده أكيد اللي هايجبهم يسوقونا أبلط منه علشان مايحسش وسطيهم بالفرق واهو ده اللي احنا شايفينه وهو ده سبب الغباءالسياسي والأقتصادي اللي بنعاني منه في بلدنا بقينا بلد غباء في غباء يلا خير خير خير

فتوح أبو المفاتيح said...

لو سمحت
احنا مش في بلد الغباء
احنا في بلد البط
لا مؤخذة شعب من احلى واطعم الشعوب فيكي يا بشرية
بس هو بطة كبيرة اوي
كسول لأقصى درجة من الكسل
فهو عشان كان ضاربها جزمة
ومطنش ومطمخ على حاجات كتير
ادعيله ربنا يفك سجنه
وزي ما نات قلت
خير
وخير كتير أوي
سلاااام

mado80 said...

بط بط يا أبو المفاتيح بس علي الله يشبعوا وكفياهم أكل فينا لغايه كده ،و يارب يسمع من بقك ربنا ويفك سجننا يارب ، عاوزين نبلبط بقي مش بط ولا ايه