Thursday, December 20, 2007

هو مين اللي بيحكم مصر بالظبط



الواحد والله ما كانش عاوز ينكد علي حد في الأيام المفترجه دي بس كميه الأستفزازات اللي الواحد بيشوفها وبيقراها كل يوم بتخلي الواحد هايتجنن لو ما اتكلمش ماهو مش هاينفع الواحد يسكت كفايانا سكوت بقي،مثلا خد عندك خبر كده خبط لزق في يوم الوقفه في المصري اليوم بيقول ايه بقي الخبر ده بيقول :موجه الغلاء تتصاعد..كيلو اللحمه ب60 جنيها والزيت ارتفع 100% ..طبعا الخبر سارد مجوعه من السلع اللي اسعارها ارتفعت بشكل غير معقول قبل أيام قليله من عيد الأضحي زي الزيت ومنتجات الألبان والدقيق الفاخر، وبيكشف الخبر ده ان مسؤوليين بجمعيات حمايه المستهلك قالوا ان اشتعال أسعار السلع الاستهلاكيه غير مبرر مرجعين ذلك الي عدم وجود رقابه محكمه علي الأسواق من قبل الأجهزه الحكوميه ،الواحد هنا لازم يسأل نفسه هو صحيح فين الأجهزه الحكوميه دي فين المسؤوليين فين الحكومه طب هي البلد دي ولا الناس اللي فيها ما لهمش صاحب يا نهار اسود المهم انا حاولت اعديها وأقول يا واد دي ليله عيد ولا يهمك مسيرها تتعدل وقعدت اصبر نفسي بكلام أنا مش مقتنع بيه أساسا لمجرد اني مش عاوز احاول انكد علي نفسي او علي حد في اليوم الكريم ده بس ازاي ده احنا في مصر يعني هيتحرق دمك هيتحرق دمك واوعي تشيل ايدك من علي الرموت كنترول، تاني يوم اللي هو اول يوم العيد الأربعاء 19/12 /2007 وفي المصري اليوم برضه قريت مقال انما ايه بجد مقال كاشف وفاضح في نفس الوقت أكدلي بجد ان البلد مالهاش حاكم وانها ماشيه بالبركه أو ماشيه بالعشوائيه زي ما تحب قول المقال للأستاذ الكبير حسنين كروم


عنوان االمقال اسباب اختلاف أرقام مبارك..وجمال..ونظيف حول دعم الخبزتحت العنوان ده بيبين الأستاذ حسنين كروم حجم التناقض الصارخ بين تصريحات الرئيس المصري مبارك حول دعم الخبز اللي قال انه وصل ل14 مليارجنيه وبين تصريحات رئيس الوزراء اللي قال ان نفس الدعم وصل ل4,5مليار وبين تصريحات جمال مبارك اللي ذكر فيها رقم أخربقوله زياده الموارد الماليه المواجهه لدعم رغيف الخبز بمقدار 7مليارات جنيه في العام المالي الحالي أي ان الرقم كما يقول استاذ حسنين كروم هو 21مليار اذا اضفناه الي الرقم بتاع رئيس الجمهوريه و11،5ملياراذا اضفناه الي الرقم بتاع نظيف ، طبعا وسط ده كله وسط كم التضارب والتناقض بين كل التصريحات دي ماحدش فاهم حاجه من المواطنين ولا حد ناوي يفهمهم سواء من الحكومه أو من غير الحكومه طيب ايه السبب بين كل التناقض ده ما تعرفش هنا لازم نسأل سؤال مهم برضه ألا وهوطب هو مين اللي بيحكم البلد دي رئيس الجمهوريه ولا رئيس الوزراء ولا جمال طبعا ماهي بلد عشوائيات خلطبيطه يعني، وفي وسط الخلطبيطه دي اراهنك لو عرفت مين اللي ممشي البلد


بس بجد الكارثه بقي اللي بيكشفها المقال ان نظيف في مؤتمره الصحفي يوم الثلاثاء11ديسمبر 2007اكدعدم صحه ما روجته الحكومه والحزب عن الفوائد من الأستثمارات الأجنبيه وده طبعا من خلال تصريحاته حيث قال معاليه:ان عدم احساسنا بالعائد من تصدير الطاقه في تلك المرحله ينتج اننا مازلنا في مرحله امتياز تكلفه الخطوط الأستثماريه وسيتم الانتهاء خلال الثلاث سنوات المقبله من استهلاك الصناعات الثقيله للجميع، مؤكدا رفع الدعم عن تلك الصناعات وموضحا ان الأستثمارات الخارجيه مثلت عبئا ضاغطا علي الأقتصاد القومي دون ان تسهم في حل مشكلات البطاله وهو ما كان له أثره السئ علي القيمه الأقتصاديه المضافه



طبعا الكلام السابق ده مش كلام احد من خبراء الأقتصاد المعارضين لا سمح الله لأ ده كلام رئيس الحكومه نفسه يا نهار اسود بقي هي دي الحكومه اللي مغرقانه في تصريحات ورا تصريحات عن تحسن الحاله الأقتصاديه وزياده فرص العمل والتشغيل ومعدل النمو وصل لمش عارف ايه ومعدل التضخم وصل لأبصر ايه يا نهاربمبي بلاش اسود علشان الأسود خلص خلاص دي البلد بايظه يا عالم طب فين الريس فين الحزب فين الحكومه اساسا البلد باظت يا جدعان البلد مش لاقيه اللي يحكمها ...رحمتك بينا يارب

6 comments:

مروة الزارع said...

انا بحجز اول كومنت بس

مروة الزارع said...

بص بقى ياسيدى .. انا بوستك دة من جوايا نفسى اقوله من زمان
فعلا الواحد مبقاش فاهم اى شئ
يقولوا ان الدعم متشلش وكل حاجة اشطة وفى نفس الوقت الحاجة بتغلى اضعاف

متتعبش نفسك انا متهيألى هتفتح التليفزيون 2100هتلاقيهم برضوا بيقولوا اخترناك اخترناك

mado80 said...

الأول الف تحيه ليكي يا مروه، ثانيا..تعرفي هي المشكله مش في عدم الفهم المشكله ان احنا في بلد ماحدش بيحاول فيها من المسؤوليين يحترم البني ادمين اللي في البلد ويفهمهم ويشرحلهم الدنيا ماشيه ازاي هي دي المشكله وعلي فكره في الدول المحترمه المشكله دي مش بالسهل تعدي كده علشان هما هناك عندهم حاجه اسمها ديمقراطيه بجد والديمقراطيه دي بتودي ناس وبتجيب ناس تانيه علشان كده بيحترموا الناس عندهم وبيعمللهم ألف حساب ، بس للأسف الأختراع ده لسه ما سمعناش عنه ولا بيتهيألي هانسمع عنه في الوقت القريب يلا ربنا يعينا عليهم..تحياتي وتقديري ليكي يا مروه

الديب said...

كل عام وانت بخير

عندك حق ..
يارب مايفرضوش ضريبة على التدوينات اللي بنكتبها .. مش بعيدة

mado80 said...

كل سنه وانت طيب يا ديب وألف شكر علي التعليق...والله مش بعيد يحصل حاجه زي كده ويفرضوا ضرايب مش بس علي المدونات ده كمان علي الهوا اللي بنتنفسوا ماهي حكومه جبايه اصلها كل اللي يهمها جبايه اكبر نسبه من الأموال علي حساب الغلابه والفقراء..لكن ان شاء الله مسيرها تتعدل الواحد مش عاوز يفقد الأمل.تحياتي لك يا ديب

الشريف / جمال طة said...

فضيحــــــــــــــــــــــــــــــة بالسعـــــــودية


مــــــــن المجتمــــــــــــــع الدولــــــــــــــــــــى



الـــــــى الملك / عبدالله بن عبد العزيز (خادم الحرمين ) بابا الفاتيكان بيسلم عليك ويقولك عيب رجعوا للمسلم حقه

وملكــة بريطانيا بتقولك عيب خلوا عندكم شوية ديمقراطيـــة وحقوق انســـــــــان مش انتم بتقولوا انكم مسلمين أعطوا المسلم حقه

أما الرئيس الأمريكى بوش بيسلم عليك وبيقول لك خلص المشكله ديه ورجع للمصرى جميع حقوقه وهو مش عايز يتكلم فى الموضوع ده تانى

أما الكونجرس ألأمريكى يقول لك احنا متابعين قضية المواطن المصرى ولن نتخلى عنه حتى يأخذ جميع حقوقه

أما ألأمين العام للمنظمة الدوليه لحقوق الانسان يقول لك الشكاوى منكم يوم عن يوم بتزيد وسوف نضطر لرفع ألأمر الى ألأمم المتحده ومجلس ألأمن للنظر فى فرض عقوبات اقتصادية عليكم قد تصل الى تجميد أرصدتكم فى خارج السعودية بعد خصم جميع حقوق المواطن المصرى وخاصة انه بيقول انه مسلم زيكم


برجاء الاطــــلاع وشكرا

http://gamal51.blogspot.com/

http://anameshm3ahom.blogspot.com/2007/12/blog-post_11.html

http://kalam3eal.blogspot.com/2007/12/blog-post.html