هو مين اللي بيحكم مصر بالظبط

الواحد والله ما كانش عاوز ينكد علي حد في الأيام المفترجه دي بس كميه الأستفزازات اللي الواحد بيشوفها وبيقراها كل يوم بتخلي الواحد هايتجنن لو ما اتكلمش ماهو مش هاينفع الواحد يسكت كفايانا سكوت بقي،مثلا خد عندك خبر كده خبط لزق في يوم الوقفه في المصري اليوم بيقول ايه بقي الخبر ده بيقول :موجه الغلاء تتصاعد..كيلو اللحمه ب60 جنيها والزيت ارتفع 100% ..طبعا الخبر سارد مجوعه من السلع اللي اسعارها ارتفعت بشكل غير معقول قبل أيام قليله من عيد الأضحي زي الزيت ومنتجات الألبان والدقيق الفاخر، وبيكشف الخبر ده ان مسؤوليين بجمعيات حمايه المستهلك قالوا ان اشتعال أسعار السلع الاستهلاكيه غير مبرر مرجعين ذلك الي عدم وجود رقابه محكمه علي الأسواق من قبل الأجهزه الحكوميه ،الواحد هنا لازم يسأل نفسه هو صحيح فين الأجهزه الحكوميه دي فين المسؤوليين فين الحكومه طب هي البلد دي ولا الناس اللي فيها ما لهمش صاحب يا نهار اسود المهم انا حاولت اعديها وأقول يا واد دي ليله عيد ولا يهمك مسيرها تتعدل وقعدت اصبر نفسي بكلام أنا مش مقتنع بيه أساسا لمجرد اني مش عاوز احاول انكد علي نفسي او علي حد في اليوم الكريم ده بس ازاي ده احنا في مصر يعني هيتحرق دمك هيتحرق دمك واوعي تشيل ايدك من علي الرموت كنترول، تاني يوم اللي هو اول يوم العيد الأربعاء 19/12 /2007 وفي المصري اليوم برضه قريت مقال انما ايه بجد مقال كاشف وفاضح في نفس الوقت أكدلي بجد ان البلد مالهاش حاكم وانها ماشيه بالبركه أو ماشيه بالعشوائيه زي ما تحب قول المقال للأستاذ الكبير حسنين كروم

عنوان االمقال اسباب اختلاف أرقام مبارك..وجمال..ونظيف حول دعم الخبزتحت العنوان ده بيبين الأستاذ حسنين كروم حجم التناقض الصارخ بين تصريحات الرئيس المصري مبارك حول دعم الخبز اللي قال انه وصل ل14 مليارجنيه وبين تصريحات رئيس الوزراء اللي قال ان نفس الدعم وصل ل4,5مليار وبين تصريحات جمال مبارك اللي ذكر فيها رقم أخربقوله زياده الموارد الماليه المواجهه لدعم رغيف الخبز بمقدار 7مليارات جنيه في العام المالي الحالي أي ان الرقم كما يقول استاذ حسنين كروم هو 21مليار اذا اضفناه الي الرقم بتاع رئيس الجمهوريه و11،5ملياراذا اضفناه الي الرقم بتاع نظيف ، طبعا وسط ده كله وسط كم التضارب والتناقض بين كل التصريحات دي ماحدش فاهم حاجه من المواطنين ولا حد ناوي يفهمهم سواء من الحكومه أو من غير الحكومه طيب ايه السبب بين كل التناقض ده ما تعرفش هنا لازم نسأل سؤال مهم برضه ألا وهوطب هو مين اللي بيحكم البلد دي رئيس الجمهوريه ولا رئيس الوزراء ولا جمال طبعا ماهي بلد عشوائيات خلطبيطه يعني، وفي وسط الخلطبيطه دي اراهنك لو عرفت مين اللي ممشي البلد

بس بجد الكارثه بقي اللي بيكشفها المقال ان نظيف في مؤتمره الصحفي يوم الثلاثاء11ديسمبر 2007اكدعدم صحه ما روجته الحكومه والحزب عن الفوائد من الأستثمارات الأجنبيه وده طبعا من خلال تصريحاته حيث قال معاليه:ان عدم احساسنا بالعائد من تصدير الطاقه في تلك المرحله ينتج اننا مازلنا في مرحله امتياز تكلفه الخطوط الأستثماريه وسيتم الانتهاء خلال الثلاث سنوات المقبله من استهلاك الصناعات الثقيله للجميع، مؤكدا رفع الدعم عن تلك الصناعات وموضحا ان الأستثمارات الخارجيه مثلت عبئا ضاغطا علي الأقتصاد القومي دون ان تسهم في حل مشكلات البطاله وهو ما كان له أثره السئ علي القيمه الأقتصاديه المضافه

طبعا الكلام السابق ده مش كلام احد من خبراء الأقتصاد المعارضين لا سمح الله لأ ده كلام رئيس الحكومه نفسه يا نهار اسود بقي هي دي الحكومه اللي مغرقانه في تصريحات ورا تصريحات عن تحسن الحاله الأقتصاديه وزياده فرص العمل والتشغيل ومعدل النمو وصل لمش عارف ايه ومعدل التضخم وصل لأبصر ايه يا نهاربمبي بلاش اسود علشان الأسود خلص خلاص دي البلد بايظه يا عالم طب فين الريس فين الحزب فين الحكومه اساسا البلد باظت يا جدعان البلد مش لاقيه اللي يحكمها ...رحمتك بينا يارب

كل سنه ومصر كلها بخير

حاله شجن

مش عارف ليه دايما في ايام الأعياد ببقي حزين ببقي في حاله شجن يمكن علشان القرف اللي الواحد شايفه

أو يمكن لما الواحد بيفكر في حاله ياه الواحد مش مصدق والله اني وصلت للعمر ده 27 سنه لأ كتير أوي

يارب فكها يا رب

تهنئه

كل سنه ومصر بخير كل سنه وبسطاء مصر في سعاده كل سنه وسكان مصر الأصليين أبناء هذا الوطن بألف صحه وعافيه

دعاء

يارب بحق هذه الأيام المباركه وبحق هذه الليله المباركه اللهم فك اسر هذا البلد الطيب

يارب ساعد كل ضعيف واكرم كل محروم... يارب ان هذا البلد الطيب الكريم قد استولت عليه عصابه ولا ندري الي أين ستأخذه فاللهم ساعدنا علي أن نسترجعه منها يارب

اللهم ساعد كل شاب في ان يحقق ما يتمناه اللهم اسعد شباب هذا الوطن فهم الأمل الباقي وان يذهب هذا الأمل فالموت ارحم اللهم ساعدهم يارب ومدهم بالقوه والتصميم علي ان يغيروا ما بأنفسهم حتي يتغير ما ألم بهم من كرب وبلاء ويأس يشاهدونه كل يوم في هذا الوطن

يارب انت المعين وانت الحصن وانت السند اللهم لا تجعلنا نفقد الأمل ابدا يارب

اللهم اشفي كل مريض واشبع كل محروم واسعد كل حزين وأزل هم كل مهموم

يا أكرم الأكرمين يارب

دول سكان مصر الأصليين...مسيرها تروق وتحلي

قرب قرب قرب رئيس الجمهوريه بذات نفسه يقول لا مساس بالدعم

طبعا الأيام السوده اللي احنا عيشنها اليومين دول لا يخفي علي أحد فيها هذه الكميه الهائله من التصريحات المتناقضه المتضاربه في ذات الوقت عن الدعم والمدعومين او الدعك والمدعوكين اختار اللي يريحك فكلاهما صحيح أخر تصريح سمعت به من مدونه أفكار مبعثره واتحرق بيه دمي ما قاله أحد الوزراء الميمونين عن أن حصول المواطن المصري علي جنيه ونص يكفيه ليخرج به عن خط الفقر في تعليقي علي المدونه سألت عن وضع رئيس الجمهوريه في هذا باعتباره حامي حمي معدومي الدخل والبسطاء من أبناء هذا الشعب المنكوب بصراحه الراجل لم يكذب خبر ففي تصريحات له صدرت في صحف الجمعه يقول فيها بأنه لا الغاء للدعم وانه لا مساس به من قبل حكومتنا النظيفه يا سلام أثلج صدري والله هذا التصريح وريحني أخر راحه بس هذه الراحه لم تطول أكثر من ثمانيه صفح في جرنال الأخبار بتاع يوم الجمعه 7 /12/2007 لأنه في نفس هذا الجرنال وفي صفحته الحاديه عشر تصريحات لرئيس الوزراء السيد أحمد النظيف جدا يقول فيها سيادته لا فض فوه أن الدعم الحالي له عيوب كثيره أهمها أنه لا يصل لمن يستحقه وكأن حد راح واشتكي لسيادته بأنه لا يصل اليه الدعم طبعا قريت الموضوع بالتفصيل وجدت أن هذه التصريحات كانت من خلال مقابله معه في برنامج قضايا الساعه علي البرنامج العام طبعا لن أتطرق للتناقض الواضح بين تصريح رئيس الجمهوريه بجلاله قدره في أول الجرنال مع رئيس الوزراء بنظافه قدره في الصفحه الحاديه عشر من ذات الجرنال ولكن ما سوف اتطرق اليه هو مضمون حديث رئيس الوزراء في برنامج قضايا الساعه بيقول ايه سيادته في الأول بيقول أنه لن يتم استخدام الدعم كوسيله لزياده المنافسه في الداخل ولكن الأساس منه أن يكون لدينا قدره تنافسيه مع الأقتصاد العالمي ....مش عارف ازاي بصراحه ايه صله الدعم بزياده القدره التنافسيه مع الأقتصاد العالمي الا لوكانت هذه هي تعليمات صندوق النقد الدولي اللي الحكومه مش فالحه في حاجه غير انها تنفذ تعليماته طيب بيقول ايه تاني رئيس الوزراء لا فض فوه بيقول أن هناك قناعه لدي الشعب المصري بأن الدعم يذهب الي من لا يستحقه ...مش عارف برضه الثقه الجامده دي جابها منين بصراحه ومين اللي وصله بقي قناعه الشعب المصري وعن اي شعب يتحدث يعرف هو منين الشعب المصري يعرف ايه عن معاناه غلابه وبسطاء هذا الشعب طب هو لو كان يعرف حاجه كانت تبقي دي تصريحات و اللي ما تتدخلش حتي علي واحد ساقط ابتدائيه ...طبعا بعد ما يأكد هذه القناعه يستشهد بأن سلعه كبنزين السيارات لا تخدم الا فئه من الأسر المصريه لا تزيد عن 5% هو يقصد طبعا من يمتلكون السيارات طبعا هذه كلمه حق يراد بها باطل كما يقولون لأن أي حد بيفهم وعنده ذره فهم لازم يقول ان سلعه زي البنزين لما يتشال عنها الدعم وتغلي ده هايبقي زي اللعنه اللي بتصيب كل حاجه لأن أصحاب وسائل النقل اللي بتنقل المنتجات من أماكن تصنيعها أو زراعاتها ده في حاله المحاصيل الزراعيه هاتحمل فرق السعر علي المنتج والذي بالتالي سوف يحمله علي المستهلك زي بالظبط حكايه السولار اللي أول ما رفعه سعره تاني يوم القوطه بقت بتلاته جنيه ومش هاتكلم عن البصل بلاش علشان ده من انجازات عصر مبارك القوميه اللي فيه وصل سعر البصل لخمسه جنيه بعد ما كان بيتباع العشره كيلو بتلاته بس طبعا أنا نفسي مصدوده اني أكمل باقي التصريحات الميمونه والتي فيها يتضح مدي كميه الأستخفاف واللا مبالاه بهذا الشعب بس طبعا في حاله الدكتور نظيف فالراجل متوافق مع نفسه لأنه أول ما مسك الحكومه قال في تصريحه الشهير ان الشعب غير ناضج سياسيا يعني بالعربي عاوز اللي يسوقه واديهم سيادتهم بيسوقونا مش عارف هايودونا علي فين وايه أخرتنا معاهم بس طبعا أنا مقتنع برأي وهافضل أقوله ومش هامل أبدا أني أكرره كل شويه ألا وهو ان احنا اللي نستاهل كل اللي بيتعمل فينا عمرك شوفت شعب أهبل بالطريقه دي يعني واحد بيقلك أنا بادورلك عل مصيبه علشان ابليك بيها ايه المفروض انه يحصل من جناب سعادتك المفروض توقفه عند حده والا يسوق فيها لأ احنا بقي بشطارتنا سايبنهم يعملو اللي هما عاوزينه، خلاص يعمله اللي هما عاوزينه ده الواحد هايجيله أمراض الدنيا والأخره من حرقه الدم اللي هو فيها

موائد الدم المراق

في جو معبأ برائحه الدم..أمشي

أري بيوتا مفتوحه الأبواب

يدعوني أحدهم الي الدخول...أرفض

علي جانبي الطريق أري أناسا علي موائد الدم المراق يشيرون الي ان أشاركهم فيها..أرفض وأقاوم

أري اليد الملوثه بالدماء تعبث بالجثث التي قتلتها بدم بارد

اعتادت هذه الأيدي العبث بالجثث بعد قتلها ومص دمائها

لقد أدمنت طعم الدماء

أجري ثم أجري..لأنقذ نفسي

الناس تراني ..لا تعبأ بالا..كل في شأنه

ينظرون الي كأني قادم من كوكب أخر ويقولون ...مجنون

مجنون..وماذا في ذلك؟ مادمت أبحث عن العدل المفقود

ماذا في ذلك؟ مادمت أبحث عن حلم لم يولد بعد

ماذا في ذلك؟ مادمت أبحث عن الحق أينما حللت

أعتاد الكلمه - مجنون - أعتادها حتي أتوحد معها

ويصير الجنون حقيقه في عالم لا معقول

ع النواصي

ع النواصي دول شباب مترصصين

ع النواصي والدنيا حلوه ومشتاقين

ع النواصي الشاب يمشي ..ع النواصي الشاب ياكل

ع النواصي الشاب واقف .. ع النواصي من غير مشاكل

ع النواصي والبت حلوه .. ع النواصي بصتلي بصه

ع النواصي جمال وقصه .. ع النواصي أه منها ياني

ع النواصي وانا معجباني .. ع النواصي رجعتلي تاني

ع النواصي رجعت وقالت .. ع النواصي اه يا واد يا فالت

ع النواصي انا منها خفت .. ع النواصي وجريت وقلت

ع النواصي الحقني يابا .. ع النواصي ابويا جه

ع النواصي ضربني ضربه .. ع النواصي وقالي يابني

ع النواصي الوقفه ديا .. ع النواصي مش حلوه ليا

ع النواصي انا قلت يابا .. ع النواصي حقك عليا

ع النواصي وتوبه يابا .. ع النواصي من الوقفه ديا

فكره

تقولي فكره تعالي أكتب

أقول حبيبتي صبرك شويه

تقولي يلا أنا عاوزه أجري

أقول ما لسه الوقت بدري ... ولسه اهو قدامنا بكره

تقولي راحتك... واسيبها وامشي

واجيلها بكره ألاقيها مشيت

تخاريف شتويه

الحكايه

نبتدي منين الحكايه

نبتديها من هنا ....من عندنا

دي الناس مستعبطه والحكايه متلغبطه

والدنيا غيمه وعذاب وضلمه

واشوف هناك واحد ..أقولو يلا

يقولي لأ يا عم أمشي

أقوله ليه....... يقولي يا عم عندي عيال وعيله وعزوه

يا عم أمشي سيبني في حالي............ ياعم أمشي يا عم مالي

يا عم أمشي ..مراتي وعيالي

أسيبو وامشي واقول لنفسي

كان عنده حق ولا الحق عندي

يعني ايه كلمه مصر

يعني ذل وقهر واستعباد

يعني قرف في عيشتك واستبداد

يعني عيشه فساد في فساد