Saturday, December 20, 2008

من اللاوعي


فجأه
يقفز وجها من اللاوعي
فجأه ... لا يعلم كيف
لماذا الان يتذكر ذلك الوجه
نبيله ...
صوره مشوشه امامه
نبيله ...
طفل صغير يذهب الي ابيه
بابا .. بابا في ست كانت هنا بتشرب سجاير
جريمه كبيره بالنسبه لطفل في مثل هذا العمر
كيف يتهاون الكبار فيها هكذا
لايرد الاب ...
الطفل بعناد بابا ست بتشرب سجاير
سجاير يا بابا
خلاص ... يرد الاب بضيق
الام تمدح هذه الست التي تشرب سجاير والاب لا يتكلم
ببراءه الاطفال التي لا تدرك سوي الابيض والاسود
يحنق الابن علي الاب والام معا
كيف تدخل هذه السيده هنا
ماما مين نبيله دي
يا حبيبي واحده بتساعدني في شغل البيت
ليه طيب ... ما تعمليه انتي لوحدك
تسكت الام

نبيله ...
صوره مشوشه
يحاول ان يجمع الافكار
لماذا تقفز الان من اللاوعي
لتحتل الوعي بأكلمه

تؤرقه نظرته الطفوليه لهذه الست التي تشرب السجاير
حينما يتخلي رجل عن امرأه في عز الشباب
وحينما تصمد هذه المرأه بشرف لتكافح من اجل تربيه ابنتها الوحيده
يصبح شرب هذه المرأه للسجاير في مجتمع محافظ
أمرا يمكن ان يغتفر
نبيله...
صوره مشوشه تقترب من أن تتجمع
تعمل داده في مدرسه إبتدائيه صباحا وحينما ينتهي اليوم الدراسي
تذهب لتعمل لدي بعض الاسر
كي لاتمد يدها
كي لاتذهب الي زوجها السابق التي كانت تكرهه كرها شديدا
لم يعلم وقتها لماذا
ولم يفهم وقتها لماذا
ولكنه الأن يعلم
يتفهم جدا هذا الكره الإنساني
متي كانت اخر مره رأي هذه السيده
ربما منذ سنتين
حينما أتت اليهم لكي تخبرهم بكل فخر ان ابنتها قد تزوجت
جاءت لتحكي لهم بكل سعاده كيف كان فرحها
عملتلها فرح اتحكت بيه الناس كلها
الحمد لله ... تقولها كأنها انهت مارثون طويل متعب
الأن تجمعت الصوره
الأن يعلم أنه يجب ان يعتذر لهذه السيده لأنه حنق عليها يوما ما
أو لأنه نظر اليها يوما نظره غير لائقه
نظره حمق طفولي لأنها كانت تشرب ... مجرد سجاير

!!!








Saturday, December 13, 2008

قنــــاعه



إن رغبتي في إتقان ما اقوم به من عمل
لم تعن قط رغبتي في التفوق علي أي إنسان آخر
كنت ولا ازال أري أن هذا العالم لم يتسع لكل الناجحين بالغا ما بلغ عددهم
وكنت ولا ازال أري أن أي نجاح لا يتحقق إلا بفشل الأخرين
هو في حقيقته هزيمه ترتدي ثياب النصر

غــــازي عبد الرحمن القصيبي
من كتاب
حيـــاه في الإداره

Sunday, December 7, 2008

عـــــــــــيد سعـــــــــــيد


يجلس وحيدا يفكر ماذا يقول في مثل هذه المناسبه
لا يجد ما يقوله ...
!!!

كل عبارات التهنئه التقليديه لا تكفي كي تعبر عما في داخله

وفي داخله الكثير ...
يشعر انه يحمل جميلا فوق كتفيه لكل من سأل عنه من اصدقائه سواء من المدونين أو من غيرهم
ماذا لو كان في مصر الأن
الأاااااان
!!!
لفعل الكثير
ماتش كوره صباحي
جلسه علي قهوه تجمعه بأصدقائه مع كوبيات الشاي اللي علي بوسته في الخمسينه
سهره سينما.. حفله منتصف الليل
عشاء فاخر في احد المطاعم الفاخره .. وان شالله ماحد حوش
لكنه ليس في مصر الأن
عليه ان يجلس وحيدا
ليتذكر ما كان يفعله في مثل هذه الأيام
وليتأكد تماما أن العيد في بلده ليس كأي عيد في أي مكان في العالم

كل سنــــــــــــــــــــــــــه وانتم بألف صحه وسعاده وخير

Saturday, November 22, 2008

اشتاق الي امي


اريد ان أأتي اليكي
راكعا
مقبلا يداكي
اقول لكي بخجل
سامحيني
عن كل ما فات
بطيبتك ...
بتسامحك اللا متناهي
تبتسمين لي
وتاخذيني في حضنك
اقول لكي
راضيه عني
فتقولي لي الكلمه التي تذهب كل همومي
قلبي وعقلي وروحي راضيين عليك يابني


امــــــــــي اشتقت اليكي ....

Saturday, November 15, 2008

!!! الباب


عندما هممت بالنوم سألت صديقي المقيم معي في نفس الغرفه
عما اذا كان اغلق باب الشقه بالمفتاح ام لا
قال لي : ان ابراهيم لسه بره
قلت له : ياه لدلوقتي .. هي الساعه كام معاك
قال لي : الساعه اتنين ونص
قلت له : طيب هاقوم اقفل الباب.. ابراهيم معاه مفتاح علي آي حال
وانا ذاهب لغلق الباب شعرت بعطش شديد
توجهت الي المطبخ .. فتحت باب الثلاجه .. اخذت الزجاجه ورفعتها الي فمي
كانت شديده البروده بحيث شعرت انها آلمت اسناني ألما شديدا
فكرت ان اعمل كوبا من الشاي
لم اشرب الا كوبا واحدا هذا اليوم
واشعر بصداع شديد منذ جئت من العمل
وجدت انها فكره سخيفه لاني لا اريد ان اسهر اكثر من ذلك حتي استيقظ مبكرا
نادي علي صديقي بأن أأتي اليه بزجاجه الماء حتي يشرب
ذهبت اليه بالزجاجه فشرب حتي ارتوي
ملئتها مره اخري من القاروره الموجوده في الصاله
ثم ادخلتها الثلاجه
توجهت الي الباب حتي اغلقه
فوجدت صديقي ابراهيم يخرج من غرفته
قلت له : انت جيت امتي
قال لي : لسه جاي دلوقتي
قلت له : طب اقفل الباب بقي
قال : قفلته
اطمئننت ثم توجهت الي غرفتي كي انام
!!!

Saturday, November 1, 2008

الحزن الوطني الديمقراطي


النهارده يوم الانتخه الاسبوعي بتاع العبد لله

الويك اند يعني , النهارده صحيت كالمعتاد في كل يوم اجازه

علشان اخلص الواجبات المنزليه من غسل وطبخ وكنس ومسح والذي منه

محدش يضحك والنبي لأن في الغربه لازم كل واحد هلب يور سلف مش معقول هاجيب حد يعملي الحاجات دي يعني

معرفتش قد ايه الستات بيتعبوا الا لما اتغربت بجد ربنا يكون في عونهم

المهم بعد ما خلصت هذه المعاناه الاسبوعيه

قلت افتح التلفزيون اشوف الدنيا فيها ايه

وعلشان انا مبخت وامي دعيالي من يومي اول ما فتحت التلفزيون لاقيت مين!! ... لاقيت مين يا ولاد

لاقيت عمو صفوت الشريف ... اه عمو صفوت .. هو بعينه بغباوته بوشه العكر

هي الناس دي لسه عايشه

طبعا ياعمنا لسه عايشه وقاعدين علي قلبنا لغايه ما يخلصوا علينا واحد ورا التاني هما ليهم شغلانه غير دي

ربنا يعينهم يارب مع انهم مش هيلاقوا شعب اهبل ولا اعبط من الشعب المصري

شعب مستأنس ينضرب علي قفاه يا عيني ويقول كمان

المهم الحاج صفوت الشريف كان عمال يتكلم كالعاده بطريقته اللي مش مفهومه

اراهن اي حد لو سمع الراجل ده بيتكلم وفهم منه اي حاجه

اساسا بشك انه مش فاهم اللي بيقوله

ودي عادته من ايام ما كان ماسك وزاره الاعلام اللي جابها الارض وخللي اعلام مصر في الحضيض


سمعته بيتكلم عن المؤتمر السنوي للحزن الوطني
وعن عوائد التنميه وانها لازم تتوزع علي الشعب المصري
وان الاصلاح هدفه زياده معدلات التنميه

تنميه قال ... تنميه ايه يا عم الحاج هي فين التنميه دي اساسا

تنميه الفقر والجوع

تنميه صفايح الزباله اللي بقي ياكل منها معظم الشعب دلوقتي

تنميه القهر والجبروت والديكتاتوريه وسجن الاحرار من الشعب المصري

تنميه , تنميه ايه يا كذابين يا ولاد الكلب

حد يقلي طيب هي فين التنميه دي يا جدعان علشان انا مخي هايضرب

هي الناس دي ما بتزهقش من الكذب

كل السنين دي عمالين بيكذبوا علي الشعب الغلبان ولسه ما زهقوش

هايبطلوا امتي طيب ولا هو الكذب بقي داء عندهم مستعصي علي العلاج

الله يحرقكم يا بعدا زي ما اتحرق مجلس الشوري والمسرح القومي

وان شاء الله مش هتلاقوا حد يعبركوا

افقر حاجه بقي بجد واللي ضحكتني جدا شعار المؤتمر

فكر جديد .. لمستقبل بلدنا

طبعا اكيد قصدهم مستقبل جمال مبارك ما هي دي بلدهم

ولازم يأمنوا مستقبلها

Tuesday, October 21, 2008

صدق

قد تكون قصه غيرك هي الفصل الأول من قصتك ... وانت لا تدري
وعندما ينكشف لك ذلك فجأه .. تدق كفا بكف ..ضاحكا او باكيا علي حسب الظروف
وبعد ذلك ينكر بعضنا أن شيئا ضخما ..قويا .. مجهولا .. يسيطر علي قصص الناس
وكم من ليله سهرناها نرسم الخطه .. وعند مطلع الصبح فوجئنا بأن الخطه مرسومه علي عكس صوره لا نعلمها

من روايه غصن الزيتون
لمحمد عبد الحليم عبدالله

Saturday, August 16, 2008

!!! وحـــــــده


يخرج بهدوء من باب البيت الذي يسكن فيه
يمشي وحيدا في شوارع المدينه التي لا يعرفها
لأول مره منذ أن وطئت قدماه هذه المدينه يشعر بالغربه
بعد أن تركه اصدقاءه ورحلوا
الي اماكن اخري
يأخذ نفسا من سيجارته ، يفكر في كيفيه مرور الايام القادمه عليه
تبا لتلك الوحده .... يقنع نفسه بأنه سوف يتأقلم علي أيه حال
من كثره التفكير في هذا الامر يشعر بالارهاق
يعود الي البيت ، يفتح باب غرفته ، يستريح علي سريره
ثم يستغرق في نوم عميق
!!!!

Friday, July 18, 2008

وحشتني مصــــــــــر أوي ووحشتوني كلكم


بجد مش عارف أقول إيه ، حاله إشتياق غير عاديه لكل ماهو مصري

ومع إني ما بقاليش إسبوعين في السعوديه إلا إني مشتاق لمصر أوي

أنا مش عارف أتكلم علي فكره معلش مش هاقدر أقول كل اللي عاوزه علشان مستعجل

بس في اقرب فرصه هاكتب

لأن جوايا حاجات كتير عاوز أقلها وخصوصا إنطباعتي عن السعوديه وعن الشعب السعودي

اللي خالف كل ظنوني الحقيقه ، بالإيجاب علي فكره مش بالسلب


المهم إنتوا وحشتوني فعلا وبجد لازم أوجه الشكر لكل واحد علق علي البوست اللي فات

أولهم طبعا أختي الكبيره فاتيما اللي مهما قلت ومهما كتبت فما فيش كلمه واحد هاتقدر تعبر

عن عميق شكري وإمتناني ليها

ألف شكر يا فاتيما بجد


أنا علي فكره إشتغلت في إحدي فروع مكتبه العبيكان في الرياض

بس أول ما جيت وعلي حظي كان فيه جرد لكل المكتبات علي مستوي المملكه فدخلوني في إحدي لجان الجرد

جردنا كل فروع الرياض وبكره هسافر علشان نكمل جرد باقي فروع المملكه اللي ما إتجردتش

هنسافر بكره علي منطقه تسمي عنيزه

بس علي الرغم من إرهاق الشغل إلا إني مستمتع بيه جدا لأني تقريبا لفيت كل حته في الرياض

مدينه جميله أوي ، لسه إمبارح كنا في حته إسمها البطحاء وكلنا أكل مصري صميم

باميه وبسله وفاصوليا بيضا وملوخيا ولحمه ورز كانت هيصه
كان بقالي فتره مش باكل غير كابسه ولما كنت بغير كنت باكل كنتاكي
المطاعم اللي بتقدم وجبات الفراخ هنا عامله زي مطاعم الفول والطعميه عندنا
كنت قربت أكاكي من كتر أكل الفراخ هههههههههه

أنا الحمد لله بخير ومستمتع جدا بالشغل في العبيكان إحدي أكبر دور النشر في السعوديه

إن شاء الله بعد ما أرجع من السفر هابقي أكتب عن كل حاجه عاوز أقلها


سلامي للجميع ومعلش أنا أسف جدا علي عدم ردي علي التعليقات في البوست اللي فات

بس أنا ممتن جدا لكل واحد كتب تعليق

بجد ألف ألف شكر للجميع

Monday, June 30, 2008

!! أنا مــــــاشي

من حوالي ثلاثه أشهر تقريبا أتصل بيا واحد من أعز اصدقائي
قالي إن فيه دار نشر كبري في السعوديه عاوزه ناس مؤهلات عليا
وعرض عليا إن إحنا نروح نقدم ،
في الأول أنا كنت معارض جدآ لفكره
السفر خارج مصر
وهو كان عارف كده كويس
، قلتله كمان إني هاروح أشتغل في مجال مش تخصصي
كنت شغال وقتها مدرس بس بمرتب هزيل جدآ
بس علي الأقل مجال تخصصي اللي أنا بفهم فيه
مع إلحاحه عليا وذكره لبعض الأشخاص اللي سافروا و إشتغلوا في نفس الدار ورجعوا وفتحوا دور نشر في مصر ليها إسمها دلوقتي
قلت وماله نقدم وأهي تجربه كتبنا السير الذاتيه بتاعتنا وبعتناها علي الإميل
إتصلوا بينا وحددوا ميعاد للمقابله قابلنا صاحب مكتب الموارد البشريه
اللي هيسفرنا راجل محترم جدآ
هو اللي بيشوف الناس الأول علشان يعرف
إن كانوا مناسبين ولا لأ ، قبل مقابله المندوب السعودي

سألنا علي شويه حاجات وبعد كده قالنا هانعبت ليكوا
طبعا أنا في الأول كنت واخد الحكايه تهريج وقلتله شكلهم هايعملوا زي أي حد
لما بنروح نقدم علي شغل يقلك هانتصل بيك ولا بيتصل ولا حاجه

نسيت الموضوع خالص وما قلتش لأي حد
لأن كان عندي شك إنهم يتصلوا بينا أصلا
بعد فتره قليله لقيتهم بيتصلوا بيا وبيحددوا معايا ميعاد
لمقابله مندوب دار النشر السعوديه روحت والحمدلله نجحت في المقابله

بعد كده قالي هانبعتلك علشان تمضي علي شروط العقد
لما شوفت الشروط لاقيتها مش بطاله مرتب كويس
وعدد ساعات عمل مناسبه مع توفير المسكن والإنتقالات

وافقت علي الشروط وبعد كده بعته العقد مضيت عليه
وبدأت بقي اخلص إجراءات السفر
كل ده وأنا حاسس إني بحلم
لأني ما كونتش متوقع إن الأمر سوف يتم بهذه السرعه

أخيرا إتصلوا بيا يوم الخميس اللي فات
وقالولي إن التأشيره طلعت وإن السفر لازم يبقي
يوم السبت اللي جاي
روحت عملت إذن السفر
بتاع القوات المسلحه إكمني لسه في فتره الأحتياط وعملت تصريح العمل
و حجزت التذكره
و
إن شاء الله السفر هايبقي يوم السبت الساعه 7 مساءا
مش قادر أقولكم طبعا القلق اللي أنا فيه دلوقتي ، قلق رهيب
وخصوصا
إنها تجربه جديده عليا عمال أفكر لدرجه تعبت فيها من التفكير
برضه حاسس بحزن كبير إني هاسيب مصر
بس مش عاوز اقول لحد في البيت علي مشاعري دي لأن اساسا والدي ووالدتي
كانوا معارضين تماما لموضوع السفر خصوصا ماما
بس هاعمل إيه
بصراحه الواحد ما لاقاش فرصه زي دي في مصر
وما إشتغلش فيها ، وأهي برضه تجربه وخبره الواحد هايكتسبها
ومش هاخسر في كل الحالات
بس بجدأكتر حاجه مزعلاني
إني هاسيب التدوين ، طبعا مش هاسيبه علي طول بس
يعني هانقطع فتره عقبال ما تستقر الأمور
وأعرف الدنيا ماشيه إزاي في السعوديه
هايوحشني مدونيين كتير أوي إرتبطت بيهم و بكتاباتهم وبإبداعتهم
عاوزكوا تفتكروني بخير وأي حد أنا أسئت إليه أرجو منه أن يتقبل إعتذاري
وبطلب منكوا أمانه تدعولي إن ربنا يوفقني وأنجح في التجربه دي
إن شاء الله في أول فرصه هابقي أكتب واعرفكه أحوالي
يعني لو فيه حد مهتم أنه يعرف
أحوالي
بجد والله هاتوحشوني كلكم
أشفكوا علي خير إن شاء الله
مع السلامه
:(


Friday, June 27, 2008

!!! شــــعرتين شــايبين


بصيت في المرايه لقيت في شعري شعرتين شايبين

ذهلت ...

ولبحر أحلامي هربت

رجعت لنفسي وقلت ...

يمكن العيب في المرايه

بصيت في مرايه تانيه ...

لقيتني فعلا شبت !!

Sunday, June 15, 2008

إفتــــــــــكاســــات صغنونه


يثور
ثم يثور ... إلي أن يخمد
يتخبط
ينسي لما ثار
ثم يحار ... ينهار
يري أن لا سبيل سوي ... الأنتحار



************

يدخل علي صديقه في الغرفه التي يرقد فيها طريحا للفراش منذ ما يقرب من ثلاثه أشهر... طوال هذه المده وهو متردد أيذهب لصديقه أم لا ، هو لا يحب زياره المرضي

خصوصا لو كانوا يرقدون في المستشفيات

ذهب إليه أخيرا بعدما سمع عن سوء الحاله التي وصل إليها

دخل عليه مسلما ، نبهته الممرضه بألا يتحدث إليه كثيرا لأن الحديث يتعبه

جلس علي ذلك الكرسي الموضوع علي الجانب الأيمن من السرير

جلس صامتا ... بعد مده بدأ يشعر أن فتره الصمت قد طالت

ثم بدأ يشعر بالضيق ... لا يدري هو ماذا يقول في مثل هذه المواقف

نظر إليه صديقه أخيرا مشيرا إليه أن يقترب

إقترب إليه

سأله : هل ثمه حياه أخري؟

فوجئ بالسؤال .. تلعثم ولم يعرف بماذا يجيب

سأله صديقه ثانية ولكن بضيق هذه المره : لماذا لا تجيب؟

أجاب بحرج بالغ : ولماذا السؤال؟

قال له : لأنه إن لم تكن ثمه حياه أخري فالأنتحار واجب
!!!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ملحوظه : هذا الحوار حقيقي حدث بين الدكتور مراد وهبه والدكتور يوسف مراد
حيث كان الدكتور يوسف مراد في أيام مرضه الأخيره وقد ورد هذا الحوار في كتاب (ملاك الحقيقه المطلقه) لمراد وهبه ولكن مع إختلاف الأحداث بالطبع


Monday, June 9, 2008

حاجه تكسف


نازل من علي سلم محطه مترو سراي القبه ونازل قدامي شاب زي الشحط طول بعرض من نوعيه الشباب اللي بياخدوا الحقن علشان ينفخوا أجسامهم ويمشوا كده ولا حد قدهم كل واحد حر في جسمه انا مالي بس بقي اللي هلكني من الضحك إن الشاب ده لا قيته لابس تي شيرت لونه مش بطال بس علي ضهره بقي مرسوم إيه مرسوم العلامه اللي علي شكل راس أرنب اللوجو بتاع أشهر مجله إباحيه في العالم (مجله البلاي بوي ) ... طيب أخينا ده ما يعرفش اللي هو لابسه ما يعرفش إنه كده عامل زي اللطخ وبيعمل دعايه مجانيه لمجله إباحيه ، قلت في نفسي يمكن فعلا ما يعرفش وممكن يكون حد أداله التي شيرت ده علشان يضحك عليه مثلا ، بس ما كنتش متخيل بقي إن الاقي التي شيرتات دي بتتباع في كذا محل ملابس لأ ومعلقينهم في الفتارين كده علني ، هو فيه إيه بالظبط هي الموضه السنه دي بلاي بوي ولا إيه سألت أخويا اللي أصغر مني بحوالي خمس سنين يعني تلاقيه دايس وعارف الموضوع ده لاقيته بيقولي أه ده التي شيرتات دي كل المحلات بتبعها موضه السنه دي ، يا نهار زي بعضه يعني كده فعلا زي ما أنا قلت بنعمل دعايه مجانيه لأشهر مجله إباحيه في العالم حاجه بجد تكسف ومش عارف لغايه إمتي هانفضل نقلد الموضه بشكل أعمي حتي لو ما كانتش تتناسب مع عاداتنا و تقاليدنا
ليه ما نعملش إحنا موضتنا بنفسنا ليه ما نحاولش نبدع ونبتكر اللي بنلبسه حكايه التي شيرتات دي بتفكرني بالموضه السخيفه اللي إنتشرت ما بين الشباب بتاعه تسقيط البنطلونات تلاقي الشاب من دول ماشي ومسقط بنطلونه كأنه خارج لسه من الحمام حاجه تخنق بجد بس تيجي بقي لحد إن كل واحد من شبابنا يبقي ماشي وحاطط علي صدره او علي ضهره البادج بتاع مجله البلاي بوي زي بالظبط ما الواحد يبقي ماشي وكاتب علي ضهره عنوان شقه مفروشه من إياهم ، لما لاقيت الحكايه منتشره بالشكل ده قلت لأ الواحد مش لازم يسكت بقي ، واحد زميلي فاتح محل ملابس روحت وقلتله علي الحكايه دي وبصراحه هو ما كانش يعرف هو بس كان يعرف إن دي ماركه البلاي بوي بس إيه بقي البلاي بوي ده ما يعرفش ، وقلت بقي أنا هاحاول أي حد اعرفه أقله علشان نلحق نلم المصيبه دي وخصوصا بقي إن اللبس اليومين دول معدش بيفرق بين شاب وشابه يعني ممكن نلاقي لاقدر الله بنات لابسه تي شيرتات بلاي بوي تبقي مصيبه ، أنا قلت أكتب عن المصيبه دي علشان أعرف الجميع وكل اللي يقدر علي حاجه يعملها ... ربنا يستربقي

Tuesday, June 3, 2008

محفزات يوميه



في رحله الشقاء اليومي قد يحتاج المرء إلي ما يحفزه دوما ويساعده علي المضي قدما في هذه الحياه

وتختلف المحفزات بإختلاف الأشخاص

قد يكون المحفز كلمه تشجيع من شخص نقدره ، أو خبر حلو نفرح لسماعه
أو حتي قد يكون نكته حلوه نضحك عليها من كل قلبنا

أيضا قد يكون أغنيه حلوه أو لحن جميل أو كلمه راقيه أو صوت شجي

محمد منير نزل ألبومه ... ده في حد ذاته خبر حلو

لكن مع منير وعلشان هو منير

يبقي كوكتيل من الحاجات الحلوه اللي بتحفزني أنا شخصيا في رحله العناء الروتينيه
كلمات صادقه والحان جميله وصوت طالع من القلب
محمد منير مش بيغني من حنجرته زي كل اللي بنسمعهم
محمد منير بيغني من قلبه علشان كده كل حاجه بيغنيها بتتحس أوي


الشريط حلو أوي وكل أغانيه أكثر من رائعه
عجبني أوي الكوبليه اللي في أغنيه (مش محتاج أتوب) كلمات طارق عبد الستار وألحان محمد ضياء

الكوبليه بيقول


مش محتاج خضوع .. ولا حزن ودموع .. وحجات مؤلمه


أنا محتاج براح .. وابقي بميت جناح .. والمس السما


منير أنت ملك


********************************


محفز آخر

******

مش عارف أنا إتعرفت عليها إزاي ولا إمتي

بس اللي فاكره أوي إني لما إتكلمت معاها حسيت إني بتكلم مع عقليه ناضجه جدا

ومتفتحه إلي أبعد الحدود ومثقفه ثقافه أذهلتني
وكل مره كنت بتكلم معاها كنت باكتشف فيها حاجه جديده مذهله

اللي صعقني اكتر بقي عمرها ، عمرها صغير في عمر الزهور ومع ذلك سابقه عمرها جدا

مادو ... أنا عملت مدونه
والله بجد .. ألف مبروك يا ديدو

وفاجأتني كما تفاجئني دائما بأسلوبها في الكتابه
أسلوبها جميل أوي
هي بقالها فتره مش بتكتب علشان هي مشغوله في الإمتحانات اليومين دول
نفسي بس في طلب

ياريت نشجعها لأنها بجد تستاهل ... ده لينك المدونه بتاعتها



المدونه إسمها ... أول مره أكتب واعبر عن رأي كده

ديدو إستمري وإلي الأمام دائما ... ربنا يوفقك

Thursday, May 29, 2008

بدون عنوان


يا أيها المدير العظيم للبيت أكبح جماح السارق ، دافع عن الفقير ولا تكن فيضانا ضد الشاكي، واحذر من قرب الأخره ، إن الإنسان يموت مع خدمه وهل ستكون رجلا مخلدا ؟ وقع العقاب علي من يستحق ولن يكون هناك شيئا يماثل إستقامتك ... هل الميزان يتحول ؟ وهل يميل لسانه؟

إن مثلك كمثل بلد لا عيد له أو جماعه لا رئيس لها أو كسفينه لا ربان لها أو كعصابه أشقياء لا مرشد لها .. إنك حاكم يسرق .. وعميد قريه يقبل الرشوه ومفتش كان يجب عليه أن يقضي علي التخريب .. ولكنه أصبح مثالا للمجرمين
من رسائل الفلاح الفصيح .. رسائل يرجع عمرها إلي ثلاثه آلاف عام قبل الميلاد

Tuesday, May 20, 2008

! يمــــــــــــــكن


يمكن نرتاح شويه من اللف والدوران
يمكن نبطل خوف
يمكن نعيش في امان
يمكن همومنا تروح
يمكن نقدر نبوح
يمكن نبطل سكات
يمكن نقوم من السبات
يمكن يجي يوم ويتحقق فيه حلمنا
يمكن نشوفه بيتجسد قدام عنينا
!!! نلمسه .. نشعر بيه .. نحسه .... يمكــــن

Tuesday, May 6, 2008

تـــــــــــــــاج


التاج اللي هجاوب عليه دلوقتي وصلني من مي بهاء



صاحبه المدونه الرائعه نصف دسته أفكار



وهو أول تاج يوصلني من حد بس فرحان



إنه وصلني من مي بهاء لأني بحب مدونتها أوي



وبحب أسلوبها في الكتابه جدا






التاج بيقول







أذكر عشر أشياء عن نفسك.1



أختر 5 أشخاص تهدي لهم التاج وأذكر سبب إختيارك لهم.2






لا تهدي التاج لمن أهداك إياه.3



أترك لصديقك الذي أهداك التاج بأن التاج نزل وتعالي شوفه.4




*****************



طبعا حكايه إن الواحد يقول عشر أشياء عن نفسه شايفها صعبه أوي



لأن في إعتقادي من الصعب إن الواحد يتكلم عن نفسه ويبقي محايد



أكيد هايبقي فيه إنحياز لنفسه طبعا



نبدأ بقي الإجابه





إنسان بسيط بحب البساطه في كل حاجه لكن علي الرغم من كده.1

طموحي بلا حدود وبتمني من ربنا أحقق كل اللي بحلم بيه



بحب الشتا جدا وبحب المطر جدا جدا.2

وبحب أمشي في الشارع والدنيا بتمطر

الشتا علي الرغم من كئابته إلا إني بحبه و بعتبره فصل التأمل والتفكير



من غير طنطنه ومن غير كلام حنجوري كبير شايف إني دايب في حب مصر.3


بحب مصر أوي ونفسي تبقي أحسن من كده لأنها بجد ما تستاهلش اللي بيحصل فيها ده




الدنيا من غير حب بيتهيألي محدش يعرف يعيش فيها .4


وعلي الرغم إني لسه طالع من قصه حب فاشله إلا إني ما فقدتش إيماني


يوم بضروره الحب وأهميته في حياه الإنسان


وزي ما بيقول الشاعر


إذا أنت لم تعشق وتدري ما الهوا... فقم وأعتلف تبنا فأنت حمار



بحب الحياه وبحب محمد منير لأنه غني للحياه .5


كمان بحب أم كلثوم وفيروز أوي




مؤمن جدا بدور القدر في حياه الفرد لأن مهما قعد الواحد يحسبها ويرتبها.6


أكيد القدر في بعض الأحيان بيبقي ليه رأي تاني علشان كدا أنا بقيت إنسان قدري


بعمل إلي عليا وأسيب الباقي علي ربنا وده خلاني في راحه نفسيه كبيره



7.عندي قدره لتقبل كل الأراء وتقبل أي فكر يختلف مع فكري


ما دام اللي بيطرح الفكر ده


بيطرحه بصوره محترمه من غير تسفيه لأراء الأخرين


أو من غير إعتقاد إن رأيه هو الصح


والباقي غلط


وعندي إقتناع كامل بمقوله فولتير الشهيره


إنني أختلف معك في التعبير عن رأيك ولكني مستعد أن أموت دفاعا عن حريتك في التعبير عنه




8.أنا قارئ نهم إلي حد ما بحب القراءه جدا وبستغرب من الناس إللي ما بتقراش عايشه إزاي كمان متزوق للفنون


بوجه عام بيعجني أي عمل فني معمول بصدق





9.بكره الظلم وبكره أشوف واحد بيظلم بني آدم ومستعد أموت نفسي علشان أرجع حق إنسان مظلوم





10. أخيرا نفسي لما أموت أموت بهدوء من غير ما أزعج حد أو حد يشيل همي


مش عاوز أوصل إلي أرزل العمر لأن دي مسأله صعبه أوي

كده أنا خلصت إجابه علي التاج أي حد عاوز يجاوبه يتفضل لأن بصراحه كل اللي فكرت

أهديلهم التاج لقيتهم مجاوبين عليه

بس نفسي (مصطفي محمد )صاحب مدونه( لأن من السخافه أن أمتنع) يجاوب علي التاج ده









Wednesday, April 30, 2008

إعتذار وشكر وأشياء أخري



يـــــــــاه أخيرا الواحد قدر يشم نفسه بعد أيام من المعاناه الحقيقيه
وكأني بالظبط كنت في دوامه
وكان بيتهيألي إني مش هاقدر أخرج منها
الحمد لله بجد علي كل شئ
بعتذر طبعا علي تقصيري في حق الأصدقاء من المدونين بس بجد ما كانش في فرصه أبدا إني أخش عند أي حد مع إني كنت بعدي علي الطاير كده علي بعض المدونات القريبه من قلبي بس ما كنتش بقدر أسيب أي تعليق
كمان بجد بشكر أي حد سأل عليا في الفتره اللي فاتت دي و بصراحه بشعر بكثير من الإمتنان لكل واحد سأل عليا وحاول يعرف إيه أخباري

بشكر جدا جدا الجميله نسرين بسيوني الإسكندرانيه الجدعه أوي

جدا جدا علي سؤالها الطيب only spotبشكر شيماء
بشكر مصطفي محمد الموهوب
طبعا مش هاقدر أنسي مي بهاء الرائعه اللي أهدتني أول تاج ليا في عالم التدوين

بجد شكرا أوي بصراحه حتي الشكر شايف إنه قليل أوي


*********************************

أشياء أخري


**********


طبعا أنا جاي وفيه حجات كتير أوي عندي عاوز أقلها وبصراحه معبي كتير جدا

بس فيه موضوعين مهمين أوي عاوز أتكلم فيهم مع إنهم يعتبروا قدام شويه


الموضوع الأول موضوع


إلقاء القبض علي إسراء عبد الفتاح اللي إتهمتها الحكومه بإنها المحرك الرئيسي

للدعوه لإضراب السادس من إبريل

طبعا هي تم الإفراج عنها الحمد لله بس أنا شايف إن مجرد إعتقال فتاه

وهو الإعتقال الأول لفتاه من 26 سنه معناه إن النظام خلاص فقد السيطره علي نفسه

وبدأ يترنح وشايف إن إنهياره بقت مسأله وقت مش أكتر

علي فكره أنا هارجع للموضوع ده تاني لأن إعتقال إسراء

بيدل علي خسه ونداله هذا النظام المتعفن


***********************

الموضوع التاني بقي هو موضوع التقسيمات الإداريه الأخيره اللي عملتها الحكومه

واللي كانت نتيجتها إنشاء محافظتين جداد لانج

في الأول قالوا إن التقسيم ده كانت نتيجه دراسات إستغرقت 10 سنوات

فرحت جدا لما سمعت ده وقلت والله مصر بقت تمشي بخطط مستقبليه أكيد التقسيم ده هايكون فتحه خير علي مصر

مع إني ما كنتش مقتنع أساسا بالتقسيم ده إلا إني كنت بحاول أقنع نفسي وأقول يا واد دي 10 سنين دراسه

أكيد هما شايفين صح حتي لو كانت محافظه حلوان بتضم مدن بدر والشروق والقاهره الجديده أكيد هما شايفين الأصلح

لكن للأسف طلع فرحي بالتقسيم الإداري فرحه الخيبه والسخام علي راس حكومتنا النظيفه جدا

وطلعت التقسيمات الإداريه تقسيمات مهلبيه من غير دراسه ولا يحزنون

والدليل علي كده الفضايح اللي سمعنا بيها بعد كده ليس أقلها طبعا موضوع مكان المحكمه الدستوريه العليا
اللي المفروض بنص الدستور إنها تكون في القاهره فأصبحت في التقسيمات الأخيره تبع حلوان

ودي طبعا مشكله دستوريه عويصه جدا فده معناه إن إنعقاد المحكمه الدستوريه القادم في 4 مايو غير دستوري

طبعا مسخره بس الطريف اللي قريته في مدونه الجيزاوي إن محافظه الجيزه أصبحت بلا عيد قومي

لأن العيد القومي لمحافظه الجيزه كان علشان صمود قريه من قري الجيزه أمام الإحتلال الإنجليزي

القريه دي دلوقت بقت تبع محافظه تانيه

وسلملي طبعا علي الدراسات المهلبيه والأرانب بالملوخيه والرز بالشعريه

يلا كفايه إزعاج كده معلش بقي أنا قلت من الأول إني جاي ومعبي كتيرأوي






Monday, April 7, 2008

إمبارح كان 6 إبريل ... الحدث كما أري


في رأيي المتواضع سوف يظل يوم 6 إبريل يوم فارق في حياه المصريين و حركات المعارضه المصريه

يوم تاريخي بكل المقاييس فبعد كل هذا السبات العميق إستيقظ الشعب المصري اخيرا ليسترد بعضا من حقوقه المهدره

هي مجرد بدايه ... بدايه لثوره حقيقيه سوف تشهدها مصر تطهرها من دنس الفساد والفاسدين قد اكون حالما أو واهما ولكن لي

أسبابي الخاصه التي سوف أوردها فيما بعد

أنها البدايه كما قلت البدايه فقط


من خلال رؤيتي المتواضعه لهذا اليوم التاريخي الرائع بكل المقاييس

أستطيع أن أوجز وجهه نظري لهذا اليوم في النقاط الأتيه


أثبت هذا اليوم أكثر من أي وقت مضي واي حدث قبل هذا هشاشه النظام المصري وارتعاده وخوفه الشديد من أي تحرك شعبي

ظهر ذلك في كميه المصفحات التي أنتشرت منذ الصباح الباكر في أنحاء القاهره وغيرها من المحافظات المهمه كالأسكندريه والمحله الكبري علي سبيل المثال

كميه المصفحات وكميه الوجود الأمني المكثف تتعارض تماما مع أحتجاج سلمي دعت إليه مجرد حركات معارضه وليست احزابا كبيره مثلا


كشف الأضراب عن ظهور وسائل جديده للدعوه للأحتجاجات المدنيه وهي الدعوه عن طريق النت والهواتف المحموله وقد ظهر هذا بقوه كبيره كما لم يظهر من قبل وهو ما وضع السلطات المصريه في ورطه كبيره لعدم تحكمها في مثل هذه الوسائل كما أظهر أيضا ضعف دور الأعلام المصري أكثر مما هو ضعيف أصلا


كشف الأضراب أيضا عن الضعف الكبير للأحزاب المصريه المنوط بها مثل هذه التحركات الشعبيه
كما كشف عن إنتهازيه موقف الأخوان المسلمين أكبر جماعه سياسيه مصريه والتي كان من المفروض عليها أن تتقدم الداعين للأضراب فهي ليس عندها شئ علي الأقل تبكي عليه بعد كل هذه الأعتقالات الأخيره التي نالت من أفرادها ولكن الجماعه أبت بإنتهازيتها إلا أن تولي وجهها عن مثل هذا الحدث ووقفت موقفا مائعا من خلال بيان أطلقته أقل ما يقال عليه أنه بيان عبثي فهي رحبت بالأضراب ولكنها قالت أنها لن تشترك فيه .. هكذا


الدعوه للأضراب لاقت صدي واسع لدي شريحه كبيره من الشباب المصري صغير السن امل مصر القادم يدل هذا علي مدي الوعي الذي وصل اليه الشباب المصري و هذا يبشربالخير الكثير



يمكن القول أخيرا أن هذا الأضراب قد لاقي صدي واسعا من حيث الدعايه ولكن علي الرغم من ذلك لم يشهد كثافه شعبيه كما هو متوقع وهذا طبيعي جدا بعد فتره كبيره من حاله تيبس عاش فيها الشعب المصري وهذا لا يدفعنا لليأس بقدر ما يدفعنا للأمل

كل ما سبق يدفعنا إلي القول بأن القادم سوف يكون ثوره شعبيه شامله قد تحتمل بعض الفوضي تأخذ معها الأخضر واليابس مالم يتحرك النظام المصري ويعلم أنه تأخر كثيرا في حل أوضاع فاسده لا يجوز فيها مثل هذا التأخير


Saturday, April 5, 2008

الملك لك لك يا صاحب الملك


فاكره لما كنتي بتسهري معايا ونقعد نستني صوت الكروان في عز الليل .....


كنتي بتقولي أنه بيقول الملك لك لك يا صاحب الملك ... ومكنتش مقتنع


كنت بقلك ده مجرد صوت جميل


مش عارف ليه مكنتش مقتنع يمكن بعاند ... طول عمري عندي ومتمرد


بس علشان ما أزعلكيش كنت بقلك خلاص بيقول كده


تصدقي بقالي كتير أوي ما سمعتش صوت الكروان ... مشتاق لصوته أوي


تعرفي كمان مشتاق لأيه


مشتاق للمسه أيديكي


مشتاق أسمع منك كلمه بحبك


مشتاق وبتمني يجي يوم ونسهر تاني مع بعض


ونسمع صوت الكروان ... بس تعرفي ما عنتش هعاند معاكي


لأني خلاص صدقت أوي أنه كان بيقول ... الملك لك لك يا صاحب الملك

Saturday, March 29, 2008

كان حلم


كان دايما يبص لفوق للسما ... وكان بيحلم يطير


لكن دايما أحلامه كانت بتنكسر علي صخره الواقع


دلوقتي بطل يحلم ... وبطل يبص للسما


وعرف أن الطيران ... حلم عسير

Tuesday, March 25, 2008

النبي محمد


ان المسلم لا ينبغي أن يحاول لحظه واحده



فهم حياه رسول الله صلي الله عليه وسلم علي أنه عبقري عظيم أو قائد خطير أو داهيه محنك



فمثل هذه المحاوله ليست الا معانده أو معابثه للحقائق الكبري التي تزخر بها حياه محمد عليه الصلاه والسلام



فلقد أثبتت هذه الحقائق الجليه الناصعه ان النبي عليه الصلاه والسلام



كان متصفا بكل صفات السمو والكمال الخلقي والعقلي والنفسي



ولكن ذلك كان ينبع من حقيقه واحده كبري في حياته صلي الله عليه وسلم



ألا وهي انه نبي مرسل من قبل الله عز وجل



وان من العبث ان نضع الفروع موضع الأصل ثم نتجاهل وجود الأصل مطلقا



ولا ريب أن الرد علي ذلك لا يكون الا بلفت النظر الي الأصل ، بل الي الأصل وحده



من كتاب فقه السيره النبويه
مع موجز لتاريخ الخلافه الراشده

تأليف الدكتور : محمد سعيد رمضان البوطي

كتاب جدير بالقراءه


Tuesday, March 18, 2008

لا تعليق



عشره مصريين سقطوا في ساحه العراك من أجل الخبز..الرقم ذكرته الأهرام في يوم13/3 في حين قال تقرير الجزيره المصور في اليوم السابق أنهم 15..الدكتور أحمد جويلي أمين مجلس الوحده الأقتصاديه وزير التموين الأسبق قال انهم لو كانوا واحدا فقط فهي كارثه


امرأه مسنه وقفت أمام جمع من أعضاء مجلس الشعب وقالت لهم أنها وأسرتها لم يذوقوا طعم اللحم من ثلاثه أشهر






لقد قال لي أحد الوزراء المخضرمين ، ان الرئيس جمال عبد الناصر كان يقول في اجتماعات مجلس الوزراء ان هناك سلعا اذا نقصت في الأسواق يوما ما فينبغي ألا يذهب الوزير المختص الي مكتبه في اليوم التالي وحدد هذه السلع بخمس هي :الخبز والقمح والفول والعدس والسكر -ما رأيكم دام فضلكم؟




من مقال الأستاذ الكبير فهمي هويدي (استحقاقات اللحظه الحرجه) الأهرام ....الثلاثاء18/3/2008


لا تعليق سوي أنه كان في زمن مضي رئيس يشعر بالفقراء وآلامهم أين هذا الرئيس الأن


حسبي الله ونعم الوكيل فيك يا مبارك فكل هؤلاء الضحايا في رقبتك

Thursday, March 13, 2008

أفـــتـــــــــــــكا ســــــــات




يعلم أنه لم يكمل تعليمه ويدرك أنه غير موهوب ولا يعلم شيئا عن أي شئ

ومع ذلك عنده القدره علي الحديث في أي شئ ...... غبي


مخنوق ويفكر دوما في الأنتحار ، اليأس يقتله ومع ذلك يصبر ويتحمل

الي أن ...... ينتحر


سؤال دائما ما يراوده .. لماذا خلقنا؟

يجيب علي نفسه دائما ...... لنتعذب


يشعر أنه مضطهد وأن الناس كلها ضده يعلم أن الحياه عبث ... يسئم منها

ويتمني أن يعيش ...... في العالم الأخر


أدرك أن الكلام الفائت لا معني له .. ومع ذلك كتبته ..... مادو


Saturday, March 8, 2008

سلفه

جاء إلي العمل بعد يوم شاق - كل أيامه شاقه في الحقيقه - ولكن هذا اليوم ليس كغيره من الأيام حيث اقتراب العيد مما يجعله يعمل لساعات اضافيه بدون أجر زياده كعاده أصحاب الأعمال الخاصه الذين لا يهتمون بعمالهم
أدار مفتاح الشقه دخل بهدوء لا يوجد أحد يبدو أن زوجته ذهبت عند أمها كما قالت له -الحمد لله- قالها بصوت مسموع فهو لا يحب استقبال زوجته له حيث تستقبله بسيل من المطالب التي لا تنتهي ... يتمني هو أن تنتهي يوما
يخلع حذاؤه يدخل إلي المطبخ حيث كان جائعا جدا، لا يرضي هو أن يأكل من خارج المنزل في أي مطعم أو محل حتي فطاره يأخذه من البيت وهو ذاهب إلي العمل صباحا ...يعمل هو بنصيحة زوجته - العيال أولي بالفلوس اللي هاتصرفها علي الأكل بره- يدخل غرفه نومه من كثره إرهاقه ينام بدون أن يخلع لبس الشغل
قبل ذهابه في نوم عميق ينظر إلي سقف الغرفه ويتذكر كلمه قالها له صديقه يوما لا يعرف لماذا يتذكرها دائما في حالات
ارهاقه الشديده - اللي بيتولد في الشقي بيفضل شقيان طول عمره- يذهب في نوم عميق لا يستيقظ إلا علي صوت
زوجته وهي توقظه بطريقتها المعتاده - قوم أصحي - لا يعلم كم عددا من الساعات قضاها في نومه ولكنه استيقظ وهو
مرهق أيضا

في إيه خير قالها لزوجته

الواد ابنك طردوه من المدرسه النهارده علشان مادفعش القسط التاني من المصاريف وبنتك امتحانات الجامعه بتعتها قربت ولسه ما جبتش الكتب... دائما زوجته تدخل في طلباتها مباشره بدون أي مقدمات

قال لها في صوت يائس: أنا مش لسه مديكي تلتميت جنيه من يومين

ردت عليه : مبقاش منهم معايا غير خمسين جنيه مش كان علينا فلوس لناس وبنخلصها
وبعدين ما انت عارف الحاجات بتغلي والعيشه بقت نار أعمل إيه يعني .. كلمتها المعتاده التي تنهي أي حوار
والتي تتطلب منه بالتالي أن يفعل شيئا أو يتصرف بأي طريقه حتي لو هايستلف من أي حد كما تقول له دائما

ينزل من علي سريره يخرج إلي الصاله يلبس حذاؤه يفتح باب الشقه
رايح فين .. تسأله زوجته .. رايح فين يا راجل

لا يرد ينزل بهدوء علي السلالم يخرج من بوابه العماره يشعل سيجاره ويأخذ نفسا عميقا يمشي ببطء شديد
وهو يفكر محدثا نفسه بصوت خافت ... يا تري مين اللي هاستلف منه المره دي
****************

Monday, February 18, 2008

تعليق علي أشياء تحرق الدم



انتصار غانا وانتصار أكتوبر




في الأول بس لازم أقول أن النصر الذي أحرزته مصر في بطوله غانا انتصار رائع وباهر بكل المقاييس


هذا الأنتصار يستاهل ان الشعب المصري يفرح ويزأطط ويهيص ، و بجد جدير بكل مصري أنه يفخر ببلده علشان حققت انجاز بالحجم ده


أنا واحد من الناس كنت حاسس أني طاير من الفرحه بعد ماتش الكاميرون لدرجه اني عيطت من الفرحه


صحيح احنا من حقنا نفرح ونفرح أوي


بس لما تيجي بقي الفرحه دي تنسينا نفسنا وتخلينا نقرأ في أخبار اليوم مقارنه أو بلاش مقارنه مجرد تلميح


بأن النصر الرياضي الذي حققته مصر في غانا يشبه نصر أكتوبر


فدي معلش ومع أحترامي لفرحه الملايين تبقي كارثه


ايوه انتصرنا ببطوله غانا وكان نصر غير متوقع كان نصر باهر ممكن نكتب فيه قصايد


بس ده معلش طلع ولا نزل نصر رياضي ليس الا


ان نخلط بين نصر رياضي ونصر عسكري راحت علشانه مئات بل آلاف الأرواح من الشهداء يبقي احنا كده بنهرج


وبنستهين بأرواح شهدائنا اللي راحوا فداء لهذا البلد




في أعتقادي ان احنا لازم نبسط الأمور مش لازم علشان نخلي الناس تشعر بأهميه النصر الرياضي العظيم ده ان أحنا نقولهم ان النصر


تم بروح أكتوبر مش عارف ايه دخل روح أكتوبر بنصر رياضي


كمان فيه حاجه مهمه أوي عمال بسمعها كل شويه


وهي ان النصر جه بفضل التزام اللاعبين في الصلوات والعبادات


ماشي كلام جميل ان اللعيبه بتوعنا يبقوا ملتزمين في عباداتهم وأخلاقهم شئ مهم أوي


بس نخلي ده سبب أساسي للنصر ده برضه غلط كبير لأن كده يبقي أحنا بنحول الرياضه كأنها معركه بين معسكر الكفر ومعسكر الأيمان


وكأن الفرق الأفريقيه مثلا ما كانش فيها مسلمين ولا ناس ملتزمه في عباداتها


مش عارف ليه دايما فرحتنا بأي حاجه في مصر بتخلينا نفقد سيطرتنا علي عقلنا


طيب مثلا لو مصر كانت خسرت لاقدر الله يبقي كنا هانقول ايه علي الألتزام الديني بتاع لعيبه المنتخب


ايوه طبعا توفيق ربنا كان كبير في البطوله دي بس ده علشان سبب أساسي وهو أن اللاعبين أجتهدوا وتعبوا وجدوا


يعني كان فيه سبب للنصر وهو التعب والجهد اللي شوفناه من كل اللاعبين بلا استثناء




في الأخر لازم أقول أنه ما ينفعش أبدا ان احنا نخلط ما هو رياضي بما هو ديني بما هو عسكري بما هو سياسي




عيب علينا أوي الكلام ده




*******************************************************


بدايه ضخ الغاز المصري لأسرائيل




في هدوء شديد وبدون ضجه بدأت اسرائيل تنهي استعدادها لتلقي الغاز المصري في شهر مارس المقبل


نشرت جريده الدستور أنه بناء علي الأتفاق الموقع بين هيئه كهرباء اسرائيل وبين شركه غاز شرق المتوسط


اللي بيملك أغلب أسهمها رجل الأعمال المقرب من الرئيس مبارك حسين سالم هاتقوم الشركه بضخ الغاز الطبيعي لجميع محطات توليد الكهرباء الأسرائيليه ، شركه كهرباء اسرائيل كانت اتفقت علي شراء ما يقرب ما 1،7 مليار متر مكعب في السنه لمده 15 عاما




طبعا كلامي موجه للكتاب الأشاوس اللي قوموا الدنيا ومقعدوهاش علشان دخول الفلسطينين معبر رفح وقعدوا يشنفوا آذانا بمحاضرات عن الأمن القومي المصري والمحافظه علي الأمن القومي المصري


طيب فين بقي حضره الأمن القومي ده يا حضرات الأفاضل المحترمين في تصدير الغاز المصري لأسرائيل اللي هو ملك لكل الأجيال واللي أولي بيه شعب مصر وولادها


فين بقي أمن مصر القومي في ده ، حد يرد عليا والنبي علشان أستريح أنا دمي أتحرق بجد


والأغرب من كده كمان أن احنا بعنا الغاز لأسرائيل بأبخس الأثمان يعني موت وخراب ديار


حسبي الله ونعم الوكيل




***************************************************************


أخبار اليوم لصاحبها ممتاز القط وشركاه




لا يخفي علي أحد المستوي المتدني الذي وصلت اليه جريده كبيره زي أخبار اليوم بعد ما تولي رئاسه تحريرها المدعو ممتاز القط


واحد زيه صراحه المفروض يتكسف علي دمه لأن كل مؤهلاته علشان يمسك المنصب ده هو أنه عضو في الأمانه العامه للحزب الوطني يعني راجل بتاع الحكومه كل الناس طبعا عارفه ده


يجي بقي بعد كده في مقاله يوم السبت اللي فات ويعيب في كاتب بوزن الأستاذ فهمي هويدي ويصفه بأنه كاتب سفيه




يبقي كده بجد لازم نقول أن اللي أختشوا ماتوا ولازم نقول كمان ان القيامه قربت




لما واحد في مستوي متدني زي ممتاز القط يقول كده علي أسياده من الكتاب المحترمين




طبعا هو ما صرحش بأسم الكاتب الكبير بس لمح علي المقال الذي كتبه الأستاذ الكبير فهمي هويدي واللي منعته الأهرام ونشرته الدستور الأسبوع اللي فات كان أستاذ فهمي هويدي عقد مقارنه بين ما حدث في غزه ودخول الفلسطينين باعداد كبيره الي مصر وبين أعداد المصريين الموجودين في ليبيا وأوضح الكاتب الكبير فهمي هويدي أننا لم نسمع مثلا من الكتاب الليبين أحدا قد أعتبر مثل هذه الأعداد المهوله للمصريين في ليبيا تمثل تهديدا لأمن ليبيا القومي


مع أن أعداد المصريين في ليبيا تقترب من نصف تعداد السكان هناك


كنت هاحترم القط لو رد علي الأستاذ فهمي هويدي بمنطق وعقل


أما أن يرد عليه بأسلوب الشوارع والعربجيه فده أساسا علشان هو كاتب ما يفهمش غير في الأساليب دي




بقي أنت يا قط تشتم الأستاذ الكبير فهمي هويدي انت تعرف الأول يا قط مين هو الأستاذ فهمي هويدي


نو نو يا قط براحتك ما أنت مش لاقي اللي يلمك وكمان ما أنت لازم ترضي أسيادك اللي عينوك في منصب ما كنتش تحلم بيه




*************************************


الحمد لله انا كده خلصت كلامي لكن مين... مصر ياما هانشوف فيها حجات تحرق الدم وتفقع المراره وتجيب للواحد أمراض الدنيا والأخره ربنا يعفينا كلنا يارب