Monday, January 28, 2008

حاله ملل


أشعر بالملل

أشعر بالأختناق

أشعر باقتراب الموت

أفتح شباك غرفتي لعلي أتنفس هوائا نقيا يحييني...يأتيني الهواء محملا بالغبار..محملا بالتلوث..محملا برائحه الدم التي تسود العالم الأن.محملا بالكراهيه التي تسري بين الناس

أنزل الي الشارع..أهيم كالمجنون حتي يتصور الناس أني مجنون

أهيم وأبحث..أبحث عن شئ لا أعرفه ولكني أستشعره

أبحث عن شئ مجهول ولكنه معلوم لحدسي

أبحث ثم أبحث عن هذا المجهول ولا أجده

أبحث عن حب..أبحث عن صدق..أبحث عن وفاء وعن اخلاص

أبحث عن عداله..أبحث عن قدوه وعن مثل

أبحث فلا أجد شيئا ولن أجد شيئا.....غبار كثيف يعانقني يحاول أن يزهقني بيده يحاول أن يثنيني عن البحث ...يده الملوثه بالدماء تريد أن تمنعني من كل شئ.. حتي من الحلم..فأحلم وأحلم ..وأبحث

Tuesday, January 22, 2008

يا أيها الحكام العرب أذهبوا الي الجحيم..أو البسوا طرح فهذا أكرم لكم





الأثنين 21/1/2008...غزه هذا النهار








الأطباء يتفرجون علي مرضاهم وهم يموتون أمامهم..العمليات متوقفه..ومن يئنون علي أسره المرض باتوا ينتظرون الموت




غيب الحصار 72روحا وبانتظار المزيد بسبب نفاد الأدويه ومنع نقلها الي مستشفيات الخارج ، وسوف تكون مستشفيات غزه علي موعد لتوديع العشرات بسبب انقطاع الكهرباء








المصانع أصابها الشلل التام..المخابز علقت علي الأبواب لافتات ( أسفون لا يوجد خبز ) غزه ليلها ألم ، ونهارها أكثر ألما وعيونها ترقب من يحمل الضمادات ويداوي جرحها








هذا المشهد مأخوذ بتصرف من موقع اسلام أون لاين








نيجي بقي للحكام العرب مش عارف حكام علي خيبه ايه وهما اساسا مش عارفين ينجدوا اشقاء ليهم في ظروف صعبه زي دي وشايفنهم وعاملين يتفرجوا عليهم ، طيب أفهم أن اسرائيل بتعمل كل اللي بتعملوا ده علشان توقف الصواريخ اللي بتدعي وبتقول أ نها بتقذف عليها من غزه وأفهم برضه أن بوش يجي من أخر الدنيا علشان يحرض اسرائيل علي حماس وحزب الله وايران واي حد هو شايف انه ممكن يقف أمام الطموح الأمريكي افهم كل ده








بس بقي اللي مش قادر افهمه هو هذا الصمت العربي الغريب لأ ده صمت كمان بتوصفه بعد الأقلام اللي حللت سياسيا أحداث غزه بأنه صمت مرحب ياه للدرجه دي طيب أقول ايه بس ، مش عاوز أقول اكتر من كده صراحه لأني شايل في قلبي ومعبي يعني ممكن أغلط ، يارب أخلص البوست ده علي خير








طيب تفتكر كده ممكن يكون الصمت المرحب زي المحلليين ما بيقوله ده سببه ايه، تخيل حضرتك وتخيلي حضرتك برضه ان الصمت المرحب بأحداث غزه سببه ان الحكومات العربيه يهمها أوي افشال التجربه الأسلاميه في غزه للدرجه دي من الوساخه بيتعامل الحكام العرب مع القضيه الفلسطينيه معلش أنا اسف علي اللفظ بس مش لاقي لفظ أرق من كده اقوله صراحه ، يعني علشان يحافظ اصحاب الجلاله والفخامه والسمو علي كراسيهم ما فيش مشكله أبدا أن يروح ضحيه ده أطفال ونساء وشيوخ مافيش مشكله أن الناس لو ما متتش بالصواريخ الأسرائيليه فايه يعني لو ماتت من الجوع أو من قله العلاج ، فرحانين أوي بكراسيهم أصحاب الجلاله والفخامه والسمو كل اللي يهمهم هو بس ازاي الكرسي يوصل لولادهم وولاد ولادهم لو أمكن








في الوقت اللي بنشوف فيه قيادات المقاومه سواء في فلسطين أو لبنان يقدمون أبنائم ليتقدموا صفوف المجاهدين والشهداء طبعا شوفنا ده لما استشهد ابن البطل المقاوم حسن نصر الله شوفناه تاني لما أستشهد ابن اسماعيل الزهار في الهجمه الصهيونيه الأخيره وهانشوف ده كتير لأن أبطال المقاومه لا يهمهم كرسي ولا عرش كل اللي يهمهم بس ازاي الحق يرجع لصحابه








كل ا لصمت ده علشان افشال تجربه حكم أحس الحكام العرب أنها تقض مضاجعهم وتقلق نومهم








لك الله يا غزه لكي الله فهو أقوي من بطش باطش أو تجبر متجبر ...اللهم أنصر أخواننا في غزه نصر عزيز مقتدر اللهم لا تذلهم أبدا يا أرحم الراحمين




..............................................................................................................








ويا أيها الحكام العرب سوف تذهبون أنتم وأبنائكم الي مزبله التاريخ باذن الله




سوف تذهبون أنتم وعروشكم الي الجحيم باذن الله








ولكن قبل ذلك أفضل لكم أن تلبسوا طرح كما النساء والعجائز
أف لكم....أف لكم











يا تري حكامنا الأشاوس بيجيلهم نوم لما بيشوفوا الصور دي

طبعا لا لأن ضمائرهم ماتت منذ زمن

Friday, January 18, 2008

أه يا بلد...عذرا د.المسيري


مش عارف والله أقول ايه ولا أبتدي منين لأن الخبر نزل عليا كالصاعقه ، خبر اهانه العالم والمفكر الكبير والجليل د.عبد الوهاب المسيري الذي كان بصحبه زوجته كده عيني عينك وقدام كل الناس ماهي حكومه اساسا ما عدتش تختشي ولا تخاف

بالذمه دي بلد ودي حكومه اللي تهين علمائها كده عيني عينك علي الملأ ، مش عارف ومش قادر افسر ايه سبب ذعر الحكومه من مفكر كبير بحجم الدكتور المسيري يعني الراجل بيعترض وبيحتج بشكل حضاري ومحترم علي غلاء الأسعار واللي كل الناس حاسه بيه واللي كان سببه برضه الحكومه الفاشله والنظام الأفشل ،ايه بقي خوف الحكومه من كده

طيب هي حكومتنا الأول تعرف مين هو المسيري لو ما تعرفش تبقي مصيبه كبيره اوي ولو تعرف واهانته بالشكل ده تبقي ساعتها المصيبه أفدح وأفضح ، وهو مش كفايه الحكومه بخلت عليه بالعلاج علي نفقتها في الوقت الذي أنفق عليه وعالجه امير سعودي ده برضه في نفس الوقت اللي الحكومه فيه عماله تبعزق العلاج علي نفقتها يمين وشمال للي يسوي واللي ما يسواش، أه يا بلد، مش عارف بس البلد دي هاتنضف امتي ومش عارف بجد امتي البلد دي هاتقدر توفي لعلمائها حقهم ، مش مصدق والله ومش متخيل ان الدكتور المسيري يحصل فيه كده طيب ما عملوش حساب لسنه ولا لمرضه ولا حتي لزوجته اللي كانت معاه، ده كان ممكن د.عبد الوهاب لاقدر الله يروح فيها ، انا بجد مذهول ومش قادر اصدق

عذرا... يا دكتور عبد الوهاب ...عذرا فنحن في بلد لا تحترم علمائها بلد لا تقيم لهم وزنا ولا تهتم بهم ولكن عزائي ان الناس تعرف قدرك ومنزلتك وهذا هو الأهم وهذا هو الباقي لأن التاريخ عندما يتذكر سوف يتذكر المحترمين والشرفاء من امثالك لا اللصوص والنهابون من امثالهم....عذرا يا دكتور عبد الوهاب



احب بس في الأخر اقول نبذه صغيره عن د.المسيري

للي ما يعرفش مين هو د.عبد الوهاب المسيري

ولد د.عبد الوهاب في دمنهور عام1938

استاذ الأدب الأنجليزي بجامعه عين شمس ويعتبر من أهم العلماء العرب والمصريين

المتخصصين في الشأن الصهيوني واليهودي بوجه عام

له العديد والعديد من الأعمال الفكريه لكن عمده أعماله هي الموسوعه الشهيره المسماه باليهود واليهوديه والصهيونيه

وهو ايضا علاوه علي نشاطه الفكري والأكاديمي ناشط سياسي ومن المؤسسين للحركه المصريه من اجل التغيير ..كفايه

امد الله في عمر الكاتب والمفكر والفيلسوف الكبير د.عبد الوهاب المسيري ومتعه بالصحه والعافيه



لينك خبر المهزله علي موقع اسلام اون لاينhttp://www.islamonline.net/servlet/Satellite?c=ArticleA_C&cid=1199279681888&pagename=Zone-Arabic-News/NWALayout

Sunday, January 13, 2008

النت وسنينه


خلاص بعد ما كنت خلاص قربت ادمن النت واخده حقن وبرشام كمان ، بعد ما كنت خلاص قربت لأ قربت ايه ده انا ادمنته فعلا لدرجه ان كل اللي حواليا بقوا يحذروني من العواقب الوخيمه لهذا الأدمان فقد بدا ملحوظا للجميع اني ادمنته فعلا فمثلا كنت بارجع من بره اقعد علي النت قايم لسه من النوم اقعد علي النت خارج من الحمام اقعد علي النت لدرجه انه كان ناقص اقعد عليه قبل الأكل وبعده زي الدوا حاجه بقت خلاص بدأت تزعجني أنا شخصيا أنا اللي كنت مفكر نفسي انه ما فيش اي حاجه تقدر تسيطر عليا وفي ظل هذه الحاله الادمانيه المستعصيه اذ بي أفوجئ بأن النت فاصل طبعا فكرت كالعاده انه من الواد اللي احنا حاطين عنده الراوتر الكلام ده كان يوم 30/12/2007 المهم اتصلت بالواد يقولي ياعم ده مش من عندي ده من الشركه يا نهار ابيض من الشركه ازاي وليه وابصر ايه....أه صحيح ده احنا ما دفعناش الأشتراك، طبعا نسيت بس اوضح اني مشترك في وصله مكونه من اربع اشخاص جيران بندفع اشتراك شهري125 جنيه كل واحد بيدفع حوالي 31 جنيه تقريبا المهم دفعنا ال125 جنيه وخلاص الخدمه راجعه بعد 3 أيام واذ بي افوجئ للمره التانيه علي التوالي قال ايه علينا شهر متأخر طب ازاي وليه ومش عارف مين وابصر ايه وشد وجزب مع خدمه العملاء وزي اي فاتوره من فواتير مصرنا المحروسه قالوا لازم تتدفع علشان الخدمه ترجع تاني، طيب خلاص كعاده كل المصريين نطلع نطلع وننزل علي ما فيش قولنا هاندفع الفاتوره ، بس لاجل الحظ السئ كانت في فتره امتحنات وكنت مش عارف اتلم علي اي حد من المشتركين معايا في الوصله و عقبال ما اتلمت الفلوس وادفعت كان عدي 12 يوم بالكمال والتمام 12 يوم كانت فاصله بالنسبه لي لأني في ال12 يوم دول عالجت نفسي تماما من الأدمان اللي كان خلاص بدأ يزحف لأ ده زحف فعلا وتغلغل في اعماق وتلافيف مخي -طبعا بتكلم عن ادمان النت ماحدش يفهم غلط-ما قلتش صحيح اني مشترك في النت ده بقالي سنه تقريبا يعني كانت تقريبا حاله شبه مستعصيه يعني بعد المده الكبيره دي ايش تعمل 12 يوم يا ولداه ، بس المهم قعدت مع نفسي وراجعت كل حسباتي افتكرت كلمه كان قالهالي استاذ وانا في اعدادي قالي ...خير عاده الا يكون لك عاده.... ما كنتش مقتنع تماما بالمقوله دي صراحه بس لاقيتها مقوله صحيحه في بعض الأحيان وشوقت ده من خلال جلوسي المتكرر علي النت الأول الأمر كان عادي يعني نص ساعه ساعه بالكتيرفي اليوم بقت تلاته بقت بحكم العاده المتكرره خمسه لغايه ما واحده واحده لقيت نفسي النهار بيطلع عليا وانا قاعد علي النت وكان للأسف من حظي السئ ان بدايه اشتراكي في النت كانت وانا في الجيش فكنت بانزل اجازه اسبوع لا شغله ولا مشغله غير القعاد علي النت الأسبوع كله او معظمه مقضيه علي النت ، حقيقي استفدت كتير من النت بس حقيقي برضه اني خسرت كتير ، يعني مثلا كنت بضيع صلوات كتير اوي من كتر السهر، ما كنتش بانزل علشان اقابل صحابي كنت بفضل الجلوس وتضييع الوقت علي النت احسن لغايه ما بدأت احس اني منعزل عن العالم ، وبعد ما كان بينضرب بيا المثل في كتر قراءه الكتب كنت بجد دوده كتب واحده واحده وخطوه خطوه ما بقتش اقرأ غير الجرايد اليوميه ، كل ده كوم ولما عملت مدونه كووووووووم تاني ولو اني مش عاملها من كتير يعني، يعني حوالي شهرين بس، بس بجد حسيت انها شدتني للنت اكتر وعزلتني عن العالم اكتر واكتر يعني كنت بحاول اكتب حاجات وافكار كتير كنت عاوز اقول واعبر عن نفسي وكده المهم بعد انشائي للمدونه كنت وصلت لمرحله اني خلاص مش قادر استغني عن النت كنت عارف اني مدمن وكأي مدمن كنت مستمتع بده كانت بتبقي احسن فترات حياتي وانا قاعد قدام الشاشه وعمال اقلب في النت واروح واجي علي المواقع او اكتب اي فكره تيجي علي بالي في المدونه بجد كل اللي في البيت بدأو يزهقوا من االحاله دي انا نفسي خلاص كنت من كتر الكلام بدأت ازهق من نفسي زي ما قلت قبل كده ، بجد كانت 12 يوم من السماء ما حاولتش فيهم مثلا اخش سيبر او اروح عند اي واحد صاحبي مثلا عنده نت حاولت اغير بجد من نفسي ، وبجد حسيت اني اتغيرت كتير يعني ما عاديتش تفرق معايا كتير اقعد ولا ما اقعدش، رجعت للكتب تاني، قللت من السهر لحد كبير بجد قررت ان الواحد لازم من فتره للتانيه يحاول يبعد نفسه عن النت وسنينه بجد الواحد محتاج يحس ان الحياه بسيطه شويه ياه كان هم وانزاح