Sunday, January 13, 2008

النت وسنينه


خلاص بعد ما كنت خلاص قربت ادمن النت واخده حقن وبرشام كمان ، بعد ما كنت خلاص قربت لأ قربت ايه ده انا ادمنته فعلا لدرجه ان كل اللي حواليا بقوا يحذروني من العواقب الوخيمه لهذا الأدمان فقد بدا ملحوظا للجميع اني ادمنته فعلا فمثلا كنت بارجع من بره اقعد علي النت قايم لسه من النوم اقعد علي النت خارج من الحمام اقعد علي النت لدرجه انه كان ناقص اقعد عليه قبل الأكل وبعده زي الدوا حاجه بقت خلاص بدأت تزعجني أنا شخصيا أنا اللي كنت مفكر نفسي انه ما فيش اي حاجه تقدر تسيطر عليا وفي ظل هذه الحاله الادمانيه المستعصيه اذ بي أفوجئ بأن النت فاصل طبعا فكرت كالعاده انه من الواد اللي احنا حاطين عنده الراوتر الكلام ده كان يوم 30/12/2007 المهم اتصلت بالواد يقولي ياعم ده مش من عندي ده من الشركه يا نهار ابيض من الشركه ازاي وليه وابصر ايه....أه صحيح ده احنا ما دفعناش الأشتراك، طبعا نسيت بس اوضح اني مشترك في وصله مكونه من اربع اشخاص جيران بندفع اشتراك شهري125 جنيه كل واحد بيدفع حوالي 31 جنيه تقريبا المهم دفعنا ال125 جنيه وخلاص الخدمه راجعه بعد 3 أيام واذ بي افوجئ للمره التانيه علي التوالي قال ايه علينا شهر متأخر طب ازاي وليه ومش عارف مين وابصر ايه وشد وجزب مع خدمه العملاء وزي اي فاتوره من فواتير مصرنا المحروسه قالوا لازم تتدفع علشان الخدمه ترجع تاني، طيب خلاص كعاده كل المصريين نطلع نطلع وننزل علي ما فيش قولنا هاندفع الفاتوره ، بس لاجل الحظ السئ كانت في فتره امتحنات وكنت مش عارف اتلم علي اي حد من المشتركين معايا في الوصله و عقبال ما اتلمت الفلوس وادفعت كان عدي 12 يوم بالكمال والتمام 12 يوم كانت فاصله بالنسبه لي لأني في ال12 يوم دول عالجت نفسي تماما من الأدمان اللي كان خلاص بدأ يزحف لأ ده زحف فعلا وتغلغل في اعماق وتلافيف مخي -طبعا بتكلم عن ادمان النت ماحدش يفهم غلط-ما قلتش صحيح اني مشترك في النت ده بقالي سنه تقريبا يعني كانت تقريبا حاله شبه مستعصيه يعني بعد المده الكبيره دي ايش تعمل 12 يوم يا ولداه ، بس المهم قعدت مع نفسي وراجعت كل حسباتي افتكرت كلمه كان قالهالي استاذ وانا في اعدادي قالي ...خير عاده الا يكون لك عاده.... ما كنتش مقتنع تماما بالمقوله دي صراحه بس لاقيتها مقوله صحيحه في بعض الأحيان وشوقت ده من خلال جلوسي المتكرر علي النت الأول الأمر كان عادي يعني نص ساعه ساعه بالكتيرفي اليوم بقت تلاته بقت بحكم العاده المتكرره خمسه لغايه ما واحده واحده لقيت نفسي النهار بيطلع عليا وانا قاعد علي النت وكان للأسف من حظي السئ ان بدايه اشتراكي في النت كانت وانا في الجيش فكنت بانزل اجازه اسبوع لا شغله ولا مشغله غير القعاد علي النت الأسبوع كله او معظمه مقضيه علي النت ، حقيقي استفدت كتير من النت بس حقيقي برضه اني خسرت كتير ، يعني مثلا كنت بضيع صلوات كتير اوي من كتر السهر، ما كنتش بانزل علشان اقابل صحابي كنت بفضل الجلوس وتضييع الوقت علي النت احسن لغايه ما بدأت احس اني منعزل عن العالم ، وبعد ما كان بينضرب بيا المثل في كتر قراءه الكتب كنت بجد دوده كتب واحده واحده وخطوه خطوه ما بقتش اقرأ غير الجرايد اليوميه ، كل ده كوم ولما عملت مدونه كووووووووم تاني ولو اني مش عاملها من كتير يعني، يعني حوالي شهرين بس، بس بجد حسيت انها شدتني للنت اكتر وعزلتني عن العالم اكتر واكتر يعني كنت بحاول اكتب حاجات وافكار كتير كنت عاوز اقول واعبر عن نفسي وكده المهم بعد انشائي للمدونه كنت وصلت لمرحله اني خلاص مش قادر استغني عن النت كنت عارف اني مدمن وكأي مدمن كنت مستمتع بده كانت بتبقي احسن فترات حياتي وانا قاعد قدام الشاشه وعمال اقلب في النت واروح واجي علي المواقع او اكتب اي فكره تيجي علي بالي في المدونه بجد كل اللي في البيت بدأو يزهقوا من االحاله دي انا نفسي خلاص كنت من كتر الكلام بدأت ازهق من نفسي زي ما قلت قبل كده ، بجد كانت 12 يوم من السماء ما حاولتش فيهم مثلا اخش سيبر او اروح عند اي واحد صاحبي مثلا عنده نت حاولت اغير بجد من نفسي ، وبجد حسيت اني اتغيرت كتير يعني ما عاديتش تفرق معايا كتير اقعد ولا ما اقعدش، رجعت للكتب تاني، قللت من السهر لحد كبير بجد قررت ان الواحد لازم من فتره للتانيه يحاول يبعد نفسه عن النت وسنينه بجد الواحد محتاج يحس ان الحياه بسيطه شويه ياه كان هم وانزاح

6 comments:

الشريف / جمال طة said...

شكرا لتضامنك معي و اشكر لك هذا التضامن الذي لا اتعجب من ان يصدر من شاب مصري مثلك
كما صدر من مصريين اشراف ايضا و قاموا بعرض بانر لي على مدوناتهم اشكركم جميعا و اشكر تضامنك

عاشقة الوطن said...

السلام عليكم

اولا ده اول تعليق ليا فى مدونتك

ثانيا بقي ادمان النت مش عليك بس ده على كل اللى بيقعدوا على النت شوية صغيرين بيبقي ادمان بالنسبة لهم فعلا
وللاسف الواحد لما بيتعود على حاجة مبيقدرش يسبها الا اذا
حصل حاجة وللاسف برضه الحاجة اللى هتحصل ديه خارجة عن ارادتك يعنى مش بمزاجك
يعنى الواحد ميقدرش يقطع النت من نفسه غير لما هو اتقطع

والحمدلله ان الواحد بيقدر يلحق نفسه ببرضه
على الرغم ان الواحد اليويمن دول فى امتحانات بس برضه النت اساسي فى يومى

بس برضه ممكن الواحد يقدر يتحكم فى نفسه وميقعدتش على النت كتير

وربنا يتوب علينا من ادمان النت وادمان التدوين وربنا يستر

تحياتى

mado80 said...

الأستاذ الشريف/جمال طه
أولا اسف علي تأخر ردي علي حضرتك
ثانيا لا شكر علي واجب هذا هو ما يجب أن يفعله اي مصري حتي يعود الحق لأصحابه باذن الله

مع خالص تقديري

mado80 said...

عاشقه الوطن..علي فكره اسم جميل اوي..هتلاقي أكثر الناس غضبا علي أحوال وأوضاع هذا البلد هم أكثر الناس عشقا له هم من يذوبون فيه حبا لأن من الطبيعي اللي بيحب حد بيبقي عاوز يشوفه في أحسن حال

المهم بقي يا ستي انتي شرفتيني والله بجد بهذا التعليق واتمني ألا يكون الأخير باذن الله

ايوه صحيح عندك حق في اللي بتقوليه أنا نفسي ما أقدرتش ابطل أقعد علي النت غير لما أتقطع عندي اليومين اللي قولت عليهم

ربنا يستر بس علي الواحد ويستمر في التحكم في نفسه لأني حاسس أنه هايحصلي انتكاسه وهارجع أسخم من الأول ربنا يستر يارب


ألف تحيه ليكي يا عاشقه الوطن

Zika said...

ياااه
انت دوست عالجرح اوي
انا بقالي 4 سنين بعد عالنت من ايام ما كنا بندخل بوصلة التليفون
وصدقني مش عايز احبطك بس كلها يومين وهترجع ريما لعادتها القديمه
قصدي يعني هترجع زي الاول واسخن
انا خلاص بفكر اعمل مستشفي لعلاج مدمنين النت

mado80 said...

zika
عامل ايه يا مان نورتني والله وشرفتني بالزياره دي

لأ ما خلاص يا زيكا أنا رجعت خلاص أ سخم من الأول ، مش عارف ايه السبب في كده مع أني كنت واخد بالي تمام بس ابن الأيه ده اللي اسمه النت عامل زي ما يكون سحر

بقلك ايه بقي أول ما تفتح المستشفي دي ، أحجزلي مكان فيها أنا أول مريض عندك يا مان

تحياتي وشرفتني بالزياره وياريت ما تتقطعش ان شاء الله