Friday, January 18, 2008

أه يا بلد...عذرا د.المسيري


مش عارف والله أقول ايه ولا أبتدي منين لأن الخبر نزل عليا كالصاعقه ، خبر اهانه العالم والمفكر الكبير والجليل د.عبد الوهاب المسيري الذي كان بصحبه زوجته كده عيني عينك وقدام كل الناس ماهي حكومه اساسا ما عدتش تختشي ولا تخاف

بالذمه دي بلد ودي حكومه اللي تهين علمائها كده عيني عينك علي الملأ ، مش عارف ومش قادر افسر ايه سبب ذعر الحكومه من مفكر كبير بحجم الدكتور المسيري يعني الراجل بيعترض وبيحتج بشكل حضاري ومحترم علي غلاء الأسعار واللي كل الناس حاسه بيه واللي كان سببه برضه الحكومه الفاشله والنظام الأفشل ،ايه بقي خوف الحكومه من كده

طيب هي حكومتنا الأول تعرف مين هو المسيري لو ما تعرفش تبقي مصيبه كبيره اوي ولو تعرف واهانته بالشكل ده تبقي ساعتها المصيبه أفدح وأفضح ، وهو مش كفايه الحكومه بخلت عليه بالعلاج علي نفقتها في الوقت الذي أنفق عليه وعالجه امير سعودي ده برضه في نفس الوقت اللي الحكومه فيه عماله تبعزق العلاج علي نفقتها يمين وشمال للي يسوي واللي ما يسواش، أه يا بلد، مش عارف بس البلد دي هاتنضف امتي ومش عارف بجد امتي البلد دي هاتقدر توفي لعلمائها حقهم ، مش مصدق والله ومش متخيل ان الدكتور المسيري يحصل فيه كده طيب ما عملوش حساب لسنه ولا لمرضه ولا حتي لزوجته اللي كانت معاه، ده كان ممكن د.عبد الوهاب لاقدر الله يروح فيها ، انا بجد مذهول ومش قادر اصدق

عذرا... يا دكتور عبد الوهاب ...عذرا فنحن في بلد لا تحترم علمائها بلد لا تقيم لهم وزنا ولا تهتم بهم ولكن عزائي ان الناس تعرف قدرك ومنزلتك وهذا هو الأهم وهذا هو الباقي لأن التاريخ عندما يتذكر سوف يتذكر المحترمين والشرفاء من امثالك لا اللصوص والنهابون من امثالهم....عذرا يا دكتور عبد الوهاب



احب بس في الأخر اقول نبذه صغيره عن د.المسيري

للي ما يعرفش مين هو د.عبد الوهاب المسيري

ولد د.عبد الوهاب في دمنهور عام1938

استاذ الأدب الأنجليزي بجامعه عين شمس ويعتبر من أهم العلماء العرب والمصريين

المتخصصين في الشأن الصهيوني واليهودي بوجه عام

له العديد والعديد من الأعمال الفكريه لكن عمده أعماله هي الموسوعه الشهيره المسماه باليهود واليهوديه والصهيونيه

وهو ايضا علاوه علي نشاطه الفكري والأكاديمي ناشط سياسي ومن المؤسسين للحركه المصريه من اجل التغيير ..كفايه

امد الله في عمر الكاتب والمفكر والفيلسوف الكبير د.عبد الوهاب المسيري ومتعه بالصحه والعافيه



لينك خبر المهزله علي موقع اسلام اون لاينhttp://www.islamonline.net/servlet/Satellite?c=ArticleA_C&cid=1199279681888&pagename=Zone-Arabic-News/NWALayout

10 comments:

بيان مصطفى said...

اشكرك جداااااااااا على مرورك الطيب لمدونتى وارجو منك ان تقف بجانبى لاشهارها


اختك بيان

عاشقة الوطن said...

السلام عليكم

والله البلد ديه متعرفش قيمة اى حد حتى لو كان مين
احنا اتعودنا على ان البلد تهتم بالناس اللى متسواش حاجة والناس اللى تسوى بياخدوا على دماغهم ولو مش عاجبنا بقي يبقي نخبط دماغنا فى الحيطة

والبلد ماشية كده
واللى ماسكينها عاجبهم كده

يعنى ايه يعنى نتظاهر عشان غلاء الاسعار
المهم الناس الكبيرة اللى فى البلد تبقي مبسوطة وراضية والشعب الغلبان يولع بقي ومش ياكلوا ولا يشربوا زى باقي البنى آدمين

الدنيا اتقلب حالها للاسف

تحياتى للموضوع المهم

وتحياتى للدكتور المسيري

مروة الزارع said...

انا اجيت اهوة يا سيدى

ساااااااااااااامحنى

انا والله قلة وقت مش اكتر

انا شغلى بالع كل وقتى ومش بلحق اعمل شئ

والله نفسى اعمل مليون حاجة ومش لاحقة

متزعلششششششششش

:)

على فكرة انت امور :)

بعاكسك بس

هههههههههههههههه

........................

يسعدنى ويشرفنى انى احك اللينك بتاعك فى المفضلات عندى بعد اذنك

mado80 said...

بيان مصطفي

لا شكر علي واجب يا أخت بيان مدونتك حلوه أوي وبجد تستاهل

تحياتي

mado80 said...

وعليكم السلام ورحمه الله وبركاته

عاشقه الوطن..انتي بجد نورتي المدونه وألف شكر علي تعليقك وتشريفك ليا في مدونتي المتواضعه ويا ريت بجد ماتكونش أخر مره

المشكله تعرفي في ايه ان الراجل اللي اتهان ده بيعملو ليه ولعلمه ألف حساب بره مصر في الدول العربيه، حتي اسرائيل بتعمله حساب ومع ذلك يتهان الأهانه الحقيره دي كده عيني عينك يلا حسبي الله ونعم الوكيل


شكرا أوي يا عاشقه الوطن مره تانيه وتالته وعاشره علي تشريفك ليا

ألف تحيه وتقدير ليكي

mado80 said...

هيه هيه مروه جت مروه جت مرووووه جت ..هههههههه

مش مصدق نفسي والله يابنتي والله وحشتني تعليقاتك ووحشتني طلتك عليا ، هي المشكله بس انا أفتكرت انك زعلانه مني ولا حاجه بس يلا خلاص ، عرفت أنك مطحووووووووووونه زي كل المصريين في شغلك ربنا يقويكي يارب ويخلصك بقي من الشغل وقرفه ،علي فكره يا مروه أنا مش من أنصار عمل المرأه اطلاااااااقا

بتذتأذني علي ايه ده أنا اللي يشرفني أنك تحطي اللينك بتاعي في مدونتك

والله يا مروه بجد مش عارف أقولك ايه غير أنك شخصيه بجد جميله ربنا يباركلك كده ويوفقك يارب

تحيااااااااااااتي وتقديييييييييري ليكي يا مروه

أه صحيح مروه ..مروه..أوعي ما تجيش تاني سلاااااااام

Eman Eltaher said...

فعلا البلد دى غريبة و الله

بيكرموا فيها اللى مالوش لازمة أصلا ف الحياة و ميدوش للى يستحق قيمته الحقيقية

تلاقى الهتاف بلعيبى الكورة و المطربين و الجوائز و المكافآت للراقصات عفوا المطربات بتوع اليومين دول و لكن لما يبقى فيه تكريم لعالم عربى او كاتب أو أى شكل من أشكال الثقافة العامة تلاقى تكريمه هزيل ده اذا اتكرم أصلا !!!!! كان الله ف عون هذا الكاتب المحترم

شكرا على البوست و على نقلك لينا الخبر ده

الى الأمام دايما
تحياتى

مصطفى محمد said...

سلامو عليكو

و الله كارثة
ولو لم تأخذ حقها في الميديا
ولو دفنها التعتيم

المسييري!!!!!!!!

فين المنطق؟
راجل حائز على جائزة الدولة
يعني الحكومة عارفاه
و كتبه كلهااااااا متداولة في السوق المصري
يعني الأمن عارف و حافظ اللي فيها
و له حفلات امضاء قد كده .. و في مؤسسات وزارة الثقافة زي معرض الكتاب
يعني الكل عارفه
و اما مسك كفاية
يااامااا نزل في مظاهرات
و ياما طلع في الميديا و قال و خاطب
سواء محلى أو جزيرة أو أي عفريت

يا نهاااااااار
المسيرييييي!!!!!!!!

المسيري اذا طالب برفع مبارك عن الحكم
و الجلوس مكانه .. و رفض مبارك
لوجب محاكمة مبارك
اكبر راس في البلد
لا يساوي واحد على مليون من الراجل ده
سواء أكاديميا و لا معرفيا ولا ولا ولا

انا مش حقدر اخلص كلام عن المسيري

انا حفضل مستني اليوم اللي يخرج فيه باذن الله
و اللي يعرف اي مظاهرات طالعة عشان الراجل ده يقول

تحياتي

mado80 said...

eman eltaher

يا مرحب بيكي يا ايمان نورتي المدونه والله

صحيح يا ايمان بلدنادي بلد غريبه زي ما انتي بتقولي للأسف يذهب فيها الفضل والتكريم لغير أهله

بس عزائي الوحيد ان الناس تعرف قدر المحترمين والشرفاء في هذا البلد والتاريخ برضه هيتذكرهم بكل خير أما اخوانا البعدا فالي مزبله التاريخ باذن الله

تحياتي ليكي يا ايمان وألف شكر علي تشريفك ليا في مدونتي المتواضعه

mado80 said...

مصطفي محمد

وعليكم السلام ورحمه الله وبركاته

يا ألف مرحب بيك نورت يا درش والله

بصراحه يا مصطفي بعد اللي أنت قولته في حق المسيري مش لاقي كلام أقوله بجد، علي الرغم من أن احنا لو أتكلمنا عليه لغايه بكره فده مش هايوفي للراجل حقه

بجد ببقي فرحان لما الأقي ناس محترمه زيك بتقدر اللي يستاهلوا التقدير بجد

ألف شكر ليك يا مصطفي علي تشريفك ليا و ياريت ما تبقاش أخر مره

ألف تحيه ليك يا درش