Tuesday, January 22, 2008

يا أيها الحكام العرب أذهبوا الي الجحيم..أو البسوا طرح فهذا أكرم لكم





الأثنين 21/1/2008...غزه هذا النهار








الأطباء يتفرجون علي مرضاهم وهم يموتون أمامهم..العمليات متوقفه..ومن يئنون علي أسره المرض باتوا ينتظرون الموت




غيب الحصار 72روحا وبانتظار المزيد بسبب نفاد الأدويه ومنع نقلها الي مستشفيات الخارج ، وسوف تكون مستشفيات غزه علي موعد لتوديع العشرات بسبب انقطاع الكهرباء








المصانع أصابها الشلل التام..المخابز علقت علي الأبواب لافتات ( أسفون لا يوجد خبز ) غزه ليلها ألم ، ونهارها أكثر ألما وعيونها ترقب من يحمل الضمادات ويداوي جرحها








هذا المشهد مأخوذ بتصرف من موقع اسلام أون لاين








نيجي بقي للحكام العرب مش عارف حكام علي خيبه ايه وهما اساسا مش عارفين ينجدوا اشقاء ليهم في ظروف صعبه زي دي وشايفنهم وعاملين يتفرجوا عليهم ، طيب أفهم أن اسرائيل بتعمل كل اللي بتعملوا ده علشان توقف الصواريخ اللي بتدعي وبتقول أ نها بتقذف عليها من غزه وأفهم برضه أن بوش يجي من أخر الدنيا علشان يحرض اسرائيل علي حماس وحزب الله وايران واي حد هو شايف انه ممكن يقف أمام الطموح الأمريكي افهم كل ده








بس بقي اللي مش قادر افهمه هو هذا الصمت العربي الغريب لأ ده صمت كمان بتوصفه بعد الأقلام اللي حللت سياسيا أحداث غزه بأنه صمت مرحب ياه للدرجه دي طيب أقول ايه بس ، مش عاوز أقول اكتر من كده صراحه لأني شايل في قلبي ومعبي يعني ممكن أغلط ، يارب أخلص البوست ده علي خير








طيب تفتكر كده ممكن يكون الصمت المرحب زي المحلليين ما بيقوله ده سببه ايه، تخيل حضرتك وتخيلي حضرتك برضه ان الصمت المرحب بأحداث غزه سببه ان الحكومات العربيه يهمها أوي افشال التجربه الأسلاميه في غزه للدرجه دي من الوساخه بيتعامل الحكام العرب مع القضيه الفلسطينيه معلش أنا اسف علي اللفظ بس مش لاقي لفظ أرق من كده اقوله صراحه ، يعني علشان يحافظ اصحاب الجلاله والفخامه والسمو علي كراسيهم ما فيش مشكله أبدا أن يروح ضحيه ده أطفال ونساء وشيوخ مافيش مشكله أن الناس لو ما متتش بالصواريخ الأسرائيليه فايه يعني لو ماتت من الجوع أو من قله العلاج ، فرحانين أوي بكراسيهم أصحاب الجلاله والفخامه والسمو كل اللي يهمهم هو بس ازاي الكرسي يوصل لولادهم وولاد ولادهم لو أمكن








في الوقت اللي بنشوف فيه قيادات المقاومه سواء في فلسطين أو لبنان يقدمون أبنائم ليتقدموا صفوف المجاهدين والشهداء طبعا شوفنا ده لما استشهد ابن البطل المقاوم حسن نصر الله شوفناه تاني لما أستشهد ابن اسماعيل الزهار في الهجمه الصهيونيه الأخيره وهانشوف ده كتير لأن أبطال المقاومه لا يهمهم كرسي ولا عرش كل اللي يهمهم بس ازاي الحق يرجع لصحابه








كل ا لصمت ده علشان افشال تجربه حكم أحس الحكام العرب أنها تقض مضاجعهم وتقلق نومهم








لك الله يا غزه لكي الله فهو أقوي من بطش باطش أو تجبر متجبر ...اللهم أنصر أخواننا في غزه نصر عزيز مقتدر اللهم لا تذلهم أبدا يا أرحم الراحمين




..............................................................................................................








ويا أيها الحكام العرب سوف تذهبون أنتم وأبنائكم الي مزبله التاريخ باذن الله




سوف تذهبون أنتم وعروشكم الي الجحيم باذن الله








ولكن قبل ذلك أفضل لكم أن تلبسوا طرح كما النساء والعجائز
أف لكم....أف لكم











يا تري حكامنا الأشاوس بيجيلهم نوم لما بيشوفوا الصور دي

طبعا لا لأن ضمائرهم ماتت منذ زمن

11 comments:

مصطفى محمد said...

امبارح كنت مستني اي حد يقولي يلا مظاهرة
انا مش بتاع مظاهرات .. بس كان نفسي اعمل اي حاجة بعد ما قعدت اتفرج على الاخبار و اتابع المهزلة اللي بتحصل

و ادعو الحكام لشراء طرحهم من حلوان لأن الأسعار مناسبة هناك

paranoia,magnetic & dramatic girl said...

ازيك يامحمد
انا قلبي والله انفطر من الصور الي جايبها دي
بس موضوع طبعا محتاج يتفتح ملاييين المرات
لا اله الا الله
والنهاردة شفت في التلفزيون اهل فلسطين عدوا الحدود ودخلوا العريش عندنا بالمئات
ربنا يعين الناس دي علي الطاغية
....
اشكرك جدا لاهتمامك بالتعليق علي اخر بوست ليا الي خاص بالشخص الي سبني
بس هقلك انا كتبت ده لاني عجزت عن رد الظلم عني فكان لازم اصرخ بالكلام ده عشان غيره ميكررهاش تاني
صعبت عليا نفسي اني اتوصم بأني انسانة مش كويسة
اشكرك جدا لردك
ومدونتك بسم الله ما شاء الله موضوعاتك بتصيب الهدف
الله حافظ
دودو

نوسه said...

اه بيجيلهم نوم
لازم يجيلهم نوم
هو وراهم حاجه غيره؟
هما نايمين فى العسل من زماان
الغلابه بس هما اللى مش بيجيلهم نوم
مرض جوع برد
ربنا على المفترى

mado80 said...

مصطفي محمد
ازيك يا درش أنت بتنورني والله

لأ يا درش مظاهرات ايه أنسي ، حتي المظاهرات الحكومه مش عاوزاها حتي التنفيس عن الغضب ضد ما يحدث في غزه الحكومه رفضاه امبارح الأربعاء 23/1 ألقت الحكومه القبض علي 30 من أعضاء حركه الأخوان المسلمين لمجرد الأحتجاج بشكل سلمي علي ما يحدث في غزه ، طب بزمتك مكن نقول ايه علي حكومه زي دي ...حسبي الله ونعم الوكيل

أما بقي بخصوص الطرح يا درش فخلاص احنا بعتنا نجيب لحكامنا الأفاضل شويه طرح من الصين سمعت أن الأسعار هناك أرخص من حلوان بس ما تخافش هانتحتاج برضه طرح حلوان لأنه باين من اللي احنا شايفينه أن طرح الصين كلها مش هاتكفي حكامنا الأشاوس


تحياتي ليك يا مصطفي وألف تقدير ليك وشكرا أوي علي تعليقك

mado80 said...

paranoia,magnetic & dramatic girl

يا ألف مرحب بيكي يا دودو علي تشريفك ليا في المدونه
فعلا زي أنتي ما بتقولي ربنا يعينا ويعين كل الناس علي حكامنا الطغاه ، ربنا ياخدهم يارب علشان نستريح بقي من حكمهم وقرفهم

أما بقي بخصوص شكرك ليا علي تعليقي عما حدث ليكي من شخص سافل أباح لنفسه أن يسب ويشتم بنت فده واجبي أن اعلق وده ما يحتاجش أنك تشكريني أبدا لأن ده واجب علي أي بني آدم حر كمان أحب أقلك أني أتأثرت أوي باللي حصلك حسيت كأن أختي هي اللي أتعرضت للموقف ده
وكونك أنك تكتبي وتصرخي بأعلي صوتك علي اللي حصلك ده فده مش عيب أبدا ولا يشينك في شئ

ربنا يوفقك يارب ويكرمك ، وألف شكر مره تانيه علي تشريفك ليا في المدونه وأتمني ألا تنقطع زيارتك

mado80 said...

نوسه

يا ألف مرحب بيكي نورتيني وشرفتيني بالزياره دي والله

ما هو المشكله يا نوسه أنه بيجيلهم نوم مش عارف ازاي ، وهو يعني لو هما مش نايمين في العسل زي ما بتقولي كان كل اللي بيحصل فينا ده من العراق للبنان لفلسطين حصلنا

ربنا علي المفتري والظالم ربنا يخلصنا منهم يارب

تحياتي ليكي يانوسه وألف شكر علي تشريفك ليا في المدونه وأتمني أنك ما تقطعيش الزياره بأذن الله

عاشقة الوطن said...

السلام عليكم

ازيك يامادوا

بيتهيألى ان الطرح هتبقي حاجة حلوة بالنسبة لهم
لان النساء أفضل بكثير من حكام العرب

الحكام مستنين لما العالم العربي ينتهى ويتلاشي وبعد كده يبقوا يفكوا ان كانوا يتحركوا وللا هيستنوا

الحكام العرب أظن ان جنازاتهم شيعت خلاص
ومبقاش لهم لازمة اصلا فى أماكنهم اللى هما شغلينها على الفاضي

ربنا معاكى ياغزة
ربنا معاكم يامسلمين

Ragi said...

اول زيارة لمدونتك وان شاء الله لن تكون الاخيرة
لك التحية والتقدير

mado80 said...

عاشقه الوطن
ياألف مرحب بتنوريني والله

انتي بتقولي فيها طبعا فيه نساء كتير أجدع وأشرف من أي حاكم عربي من حكامنا الأشاوس اللي مش قادرين لغايه دلوقتي يقولا لأ لأي حاجه بتعملها أمريكا أو اسرائيل وكمان أنا لما قلت طرح المفروض الحكام ما يزعلوش لأن الطرح ساعتها هي اللي حقها تزعل لأن حتي الطرح خساره فيهم

حكامنا العرب ما لهومش غير حل واحد وهو أن ربنا ياخدهم

تحياتي ليكي يا عاشقه الوطن ونورتيني

mado80 said...

ragi
يا ألف مرحب بيك يا أستاذ راجي في أول مره تشرفني بيها بالزياره وشكرا أوي لحضرتك

تحياتي وتقديري

lonelyMoMo said...

سيبك من الحكام

انا عايزه اقول ان الشعب المصري جدع لانه بجد وقف معاهم وكتير اوي اتبرعوا وبكل مايقدروا وساعدهم

واحنا لينا الشرف ان احنا ارض الجوار الملجأ ليهم....وعلينا العار ان هما دخلوا لينا بتكسير الابواب اللي عجزنا عن فتحها