Tuesday, February 12, 2008

كيف لا أحب البكباشي عبد الناصر؟

كنت وعدت الصديقه العزيزه نسرين بسيوني صاحبه المدونه الجميله أسكندريه...أذكريني

بأني سوف أكتب بوست ردا علي البوست الذي كتبته بعنوان لماذا لا أحبك بكباشي عبد الناصر؟

وهأنذا أوفي بالوعد ، كنت أريد أن أجعل عنوان هذا البوست عبد الناصر الذي أحببته لأنني في حب هذا الرجل أذكر أسبابي الشخصيه البحته

التي لا الزم بها أحدا فرؤيتي لهذا الرجل ليست رؤيه سياسيه قد نتفق ونختلف معها ولكنها رؤيه انسانيه

فأنا أحبه من هذا الجانب..الجانب الأنساني ولهذا فحبي له ليس حب متعصب

مثل هذا الحب الذي يعمي أصحابه عن رؤيه عيوب من يحبون

نعم عبد الناصر كان فتره حكمه بها الكثير من العيوب ولكن أيضا كان بها الكثير من الأنجازات

التي لو فعل انجاز واحد فقط منها لكفاه فخرا أنه فعله

لا أريد أن أطيل فهذا البوست قد يغنيني عن الكثير من الكلام

********************************************************************


عبد الناصر الذي أحببته

************************


وقعت في حب هذا الرجل قبل أن أعرف شئ عنه

وقعت في حبه قبل حتي أن أعرف أو أقرأ تاريخه النضالي ومشروعه القومي وأمله في أن يجعل من مصر قوه أقليميه لا يستهان بها

قد يكون السبب في ذلك عوامل الكاريزما الطاغيه التي كان يتمتع بها رحمه الله

فلقد تعرفت عليه بعيني قبل أن أقرأ أي شئ عنه

نعم رأيت هذه الكاريزما الطاغيه ولكني رأيت أيضا هذه النظره الأبويه الصادقه في عينيه

رأيت هذا التحدي وهذا الأصرار في تلك العينين

رأيت حبه للبسطاء ولكل ما هو بسيط لن أنسي تلك الصوره التي رأيتها ولم أكن قد أدركت بعد من هو عبد الناصر

كان في هذه الصوره يقف أمام جندي بسيط ينظر اليه نظره حانيه وابتسامه تنم عن عطف صادق

تجده في صوره سعيدا دائما وهو وسط العمال والفلاحين والجنود البسطاء

كان هذا هو الواقع وليست مجرد صور للشو الأعلامي

فقد كان البسطاء هم كل حياته وحياته كانت كلها لهم

لكم تمنيت أن أعيش في هذا العصر عصر الأحلام الكبيره والطموحات الواسعه التي لا يحدها حد

عصر الكرامه والصمود عصر كان يفخر فيه المصري بأنه مصري

عصر لم يتمني فيه مصري السفر الي اسرائيل وغيرها من الدول التي

يذهب اليها شباب مصر جثثا هامده

عصر لم نسمع فيه عن توريث حكم لم نسمع عن غرق عبارات وهروب أصحابها

بدون أن تنالهم يد العقاب لم نسمع عن تخلي الدوله عن مواطنيها لتتركهم فريسه سهله لجشع التجار ورجال الأعمال


عبد الناصر علي الرغم من كل هذه السنوات علي وفاته الا أنه دائما في قلوب بسطاء وفقراء هذا الوطن يتذكرونه دائما في أزماتهم ويترحمون عليه وعلي أيامه ولما لا ففي بلد يؤمن فيه الناس بالمثل القائل اللي مالوش ضهر ينضرب علي بطنه

في بلد كذلك كان ظهر الفقراء والبسطاء هو الرئيس ذاته هو من كان يدافع عنهم

ويقف بجانبهم ويحميهم، لا نتعجب اذا رأينا صور عبد الناصر الي الأن في بيوت الكثير والكثير من المصريين

فهذا له دلاله كبيره جدا هؤلاء البسطاء ممن يحتفظون بصوره الي الأن يعلمون ويميزون بين ماهو صادق وماهو زيف

يعلمون ويميزون تماما بين من كان يدافع عن حقوقهم بصدق و من يرفع شعارات حمايتهم للأستهلاك الأعلامي ليس الا

نعم عبد الناصر له أخطاء ولكن فليأتيني أحد بزعيم تاريخي بوزن عبد الناصر ليست له أخطاء في حكمه

الأخطاء وارده لأي حاكم ولأي نظام حكم ولكن اذا قارنا حجم الأخطاء بحجم الأنجازات التي فعلها عبد الناصر

أعتقد أن الغلبه ستكون للأنجازات فأنجازات عبد الناصر كثيره كان يكفي أي حاكم فخرا لو أنجز واحدا منها فقط

هل ننسي السد العالي هل ننسي تأميم قناه السويس

هلي ننسي هذه الصروح الصناعيه التي أدخلت مصر عصر الصناعات الثقيله

أعتقد أن قائمه الأنجازات كبيره وأعتقد ايضا أنها جديره بأن نحترم هذا الرجل

هكذا أحببت عبد الناصر وهكذا سوف أظل أحبه وأحترمه وأقدره مدي حياتي

رحم الله عبد الناصر رحمه واسعه

34 comments:

EGYPT EYES said...

على الرغم من أختلافي مع الكثير مما فعله عبد الناصر فقد اضطهد الرجل الكثيرين ومنهم التيار الذي يمثل حلمي إلا أنني أعترف أنني احس بالأعجاب تجاهه فقد كان الرجل يتميز بكاريزما لم تتوافر في رجل بعده في مصر وبعيد عن أختلافي معه أنا أشهد ان البكباشي كان رجل شريف
تحياتي

appy said...

بص انا قولت قبل كده لنسرين انا ولا بشجع عبد الناصر ولا السادات وطبعا ولا حونكل مبارك انما انا مع القذافى هههههههههه
عمما وجهه نظرى فى اخطأ ناصر هى حاجه واحده انه كان فى مرحله انتقاليه يعنى بينقل مصر من نظام ملكى الى نظام جمهورى وده فى حد ذاته لازم يوقعه فى حاجات كتير مع انى بصراحه بكن له وللسادات كل الاحترام يكفى ان فيه ناس فى عهدهم لم تكرههم كثيرا زى حونكل مبارك دلوقتى بصراحه

only spot said...

اعتقد لو كان قدر للبلد دى انها تستمر بنفس اهداف الثوره كانت هتبقى قوه صحيح ناصر كان يملك انجازات كثيره ولكن اهم انجاز عند ناصر استطاع من خلال ذكائه ان يجعل التاريخ يغفر له اخطائه الكثيره انه استطاع ان يجعل الناس تحبه وانه استطاع ان يزرع داخل الناس انتمائهم لهذا البلد وحبهم لها
للاسف فيه كتير من شبابنا تايه تلك الايام والفضل يرجع للى باعو البلد للفساد
تحياتى

سارة said...

كثيرين اعتقد مثلك
لم اكن ادرك مساوئ الرجل حين احببته
كنت صغيرة على ذلك
ولكن تعلق بصرى وقلبى بصورة الراجل المرابطة فى بيت جدى

مين ده يا جدو ؟؟
الرئيس جمال عبد الناصر

تعلقت به من ايامها

ورغم انى اصبحت على علم بما ارتكبه بحق مصر
من خير وشر
الا ان احترامى له لم يفارقنى

تحية طيبة

نوسه said...

انا معاك انه عنده كاريزما وكانوا كتير بيحبوه
وكنا ايامها تحس اننا دوله قويه وبنرد على اللى يهينا وكانوا بيعملوا حسابنا
ومش هننسى السد العالى ولا تاميم قناة السويس
بس بردو هو مكنش ملاك
اولا دوره فى عزل الرئيس محمد نجيب اللى الثوره قامت على اكتافه اصلا
ثانيا كم الاعتقالات اللى حصلت ايامه
ثالثا النكسه
وفى حاجات كتيره بس ذهنى مش حاضر دلوقتى اقولها
ومع ذلك الله يرحمه على الاقل كان بيحب شعبه واكيد مكنش يقصد بيه شر

على فكره انا مع آآبى بشجع عمو معمر القذافى :)

انين الحزن said...

مادو

عامل ايه

هو انا مليش في السياسه اوي
بس انا بحب الراجل ده علي الاقل عمل حاجه لمصر

وبحب انور السادات لانه عمل لمصر وكان عايز يعمل لسه بس ربنا افتكره بقه

وحسني مبارك لما يتكل هاابقي اقولك شعوري ناحيته
ربنا يجعل كلامنا خفيف عليه

بااااااااي ياقمر

maii bahaa said...

جميل منك أوي البوست ده يا ماجد

وعاجبني أوي إن رغم سنك الصغير بتقرا وتعرف تاريخنا في زمن الشباب فيه ماعندهمش فكرة عن أسامي الوزرا بتوعنا

لأ وكمان عندك فكر...بدليل الصور اللي على المدونة

برافو عليك
وتحية عظيمة ليك
:)

مصطفى محمد said...

في رواية "عودة الروح" لتوفيق الحكيم
شرح الحكيم وجهة نظره لطبيعة الشخصية المصرية
من ضمن ما قال : ان المصري يقدم كل شئ لمعبوده
و هو مسرور
لذلك بنيت الاهرامات .. لأن المعبود كان خوفو .. حيث سطا على القلوب فكان من السهل تشييد معجزة
خوفو على الجانب الآخر له بلاوي مدللة

عبدالناصر برضه كده
جاء ليسطو على القلوب و الأفئدة
طبيعته كده
فكان من السهل الخطو نحو المعجزة
ناصر بغض النظر عن التأميم و السد
كان يمشي في الشارع بعربية مكشوفة و الناس من حوله في هتاف لا ينقطع
هذه ميزة خطيرة .. بالنسبة لي كفاية لأحترمه
بس
ناصر كان له بلاوي
بل .. و كارهين
حتلاقيهم الناس اللي اتضروا منه
زي اللي اعتقلو و اللي اتعذبوا
و المحبين على حق
و الكارهين على حق

سلامي اليك

Zika said...

بعيجا عن انه خرب الزراعه وبوظ الاقتصاد وكان شبه ديكتاتور في حكمه . طارد الاخوان ومكانش فيه ديمقراطيه في حكمه
الا اني معجب جدا بعد الناصر في خوفه علي بلده وحبه ليها
علي ان كل الحاجات اللي هو عملها غلط طانت للاسف بدوافع ونوايا طيبه كان الغرض منها تحسين مستوي معيشة المصريين , بس طبعا الحسبه طلعت معاه غلط
وده ميمنعش انه كان راجل شريف
لا عنده ابن هيورثه الحكم ولا عنده حاشيه محتكرين الاسمنت والحديد والمواد الغذائيه
ولا عنده وزرا كدابين ولا حراميه
هو بس كان بيمل تصرفات غلط
سيبك انت
احمد ذكي في الفيلم كان مالوش حل
:)
تحياتي ليك يا باشا

عـــــــــــــــروبة said...

هذا البوست رائع جدّا
ليس فقط لان اسم ناصر يزينه ويطغي عليه ميزة العظمة .
قد نكون جميعنا قد وقعنا في حبّه فانسانيتنا لا ترضى ان تستمر من غير ان يغزوها هذا الاحساس .
بغض النظر عن الجانب السياسي النقيّ .
فكونه انسان هو جل ما يهمنا
تحياتي لك\\

عاشقة الوطن said...

السلام عليكم

ازيك ياماجد

عبدالناصر انا برضه بحب حاجات لعبدالناصر وعجبنى اسلوب حياته البسيط والموتواضع وقربه من الشعب واحساسه بيهم والانجازات اللى عملها
وشعور المصري بآدميته وانه فعلا مكنش عاوز يطلع من مصر أيامها

لكن برضه لعبدالناصر غلطات كتير
هو اى نعم مفيش انسان معصوم من الخطأ
لكن غلطاته ديه بجد بتخلى الواحد يزعل ان انسان بالجمال ده كله ومكملش جماله ده

لكن فى النهاية بقول ان عبدالناصر كان رجل
والرجال فى مصر قليلون

رحم الله عبدالناصر ورحمنا من اللى احنا فيه دلوقتى

تحياتى ليك وللموضوع الجميل

راجى said...

ياسلام يا ماجد
دكر يابنى وراجل من ضهر راجل ، اللى عاش ايام عبد الناصر مثلى هو اللى يعرف مقدار حب الناس الطاغى له
وانا الان متأكد انه كان خالص النيه عندما اراد ان يحقق حلم مصر والعرب فى الكرامة والوحدة
ولانه بشر وليس ملاكا فقد اخطأ وهذا مقبول على المستوى الانسانى فمن من الحكام لم يخطيء؟
وشهادة اعدائة انه طاهر اليد وعفيف هى شهادة حق لانهم لو وجدوا له مسلبا لما تركوه بغير تضخيم
وطهارة اليد والعفة تدل على شخصية صاحبهم بما لايدع مجالا للشك انه كان انسان جدير بالاحترام
رحمه الله وادعو الله له ان يسكنه فسيح جناته ان شاء سبحانه
شكرا لك يا ماجدمرة اخرى

mado80 said...

egypt eyes

أشكرك اولا علي تشريفك لي بالزياره وأتمني منك ان تتكرر

أحييك أيضا بأنه علي الرغم من اختلافك مع عبد الناصر الا أنك لا تنكر مميزاته

أريد فقط أن اقول أن الأضطهاد الذي واجهته بعض الفصائل السياسيه شئ طبيعي في الثورات عموما

هذا ليس تبريرا لما حدث ولكن أعتقد أن كل الثورات في جميع أنحاء العالم قد شهدت مثل هذه التجاوزات

اعتقد أيضا أنه من الظلم أن ننسب لعبد الناصر كل التجاوزات في عصره

تخياتي لك والف تقدير لشخصك الكريم

mado80 said...

آبي

ازيك

والله يا آبي ما فيه احسن من القذافي ولا تقوليلي السادات ولا عبد الناصر
هههههههههههههه
تعرفي نفسي بس اعرف بيضرب شعره في أني خلاط
ههههههههههه

بصي يا آبي فعلا زي ما انتي بتقولي
المجتمع في عبد الناصر كان بيمر في مرحله انتقاليه فكان لازم يبقي فيه بعض التجاوزات ده علي فكره في رأيي ما كانش فيه مفر منه

بيتهيألي يا آبي الرئيس الوحيد اللي الناس كلها اتفقت علي كرهه هو حونكل مبارك

تحياتي ليكي يا آبي وألف تقدير لشخصك الكريم

mado80 said...

only spot

ازيك

للأسف كل حاجه حلوه عملتها الثوره راحت وكل انجاز عملته الثوره اما انهم شوهوا صورته أو اتباع زي المصانع الكتيره اللي كان الفضل في انشائها الثوره واتباعت بتراب الفلوس

تجياتي ليكي وألف تقدير لشخصك الكريم
وأشكرك جدا علي تكرار الزياره

mado80 said...

ساره

أشكرك أولا علي تشريفك لي بالزياره وأتمني منك أن تتكرر وأن تكون بدايه لتواصل بيننا

أعتقد يا ساره أنه علي الرغم من كل أخطاء عبد الناصر الا انه جدير بأن يحترم

تحياتي لكي يا ساره وشكرا مره أخري علي زيارتك

mado80 said...

نوووووسه

ازيك

علي فكره يا نوسه أنا ما قلتش انه ملاك أكيد مافيش حد ملاك

بالنسبه لدور محمد نجيب فدوره اتقال فيه كلام كتير أوي
وأنا في رأيي أنه دوره ما كانش كبير أوي
لأن تنظيم الضباط الأحرار كان قايم علي كتف عبد الناصر مش حد تاني

الأعتقالات برضه كانت خطأ بس بيتهيألي كل الثورات شافت خطأ الأعتقالات وكبت الحريات ما تنسيش انها كانت فتره انتقال من حكم لحكم تاني خالص

بالنسبه للنكسه أعتقد أيضا أنها لم تكن خطأ عبد الناصر وحده ومع ذلك فقد تحمل هو كل مسؤليتها

تحياتي لكي يا نوسه وألف تقدير لشخصك الكريم بتنوريني دايما والله يا نوسه

mado80 said...

انين الحزن

ازيك يا جميل عامله ايه

باحييكي لحبك عبد الناصر والسادات برضه ما فيش مانع

حسني بقي بيتهيألي أنه قدامه كتير علي ما يتكل الراجل ماسك في الدنيا أوي

:)
تحياتي ليكي ونورتيني بجد

mado80 said...

مي بهاء

ازيك يا مي

بجد ألف شكر علي كلماتك الرقيقه دي ومش عارف أقلك ايه

بس علي فكره يا مي انا مش صغير أوي يعني
ههههههههههههه

علي فكره فعلا زي ما بتقولي للأسف فيه كتير من شبابنا ما يعرفش التاريخ بتاعنا حتي ما يعرفوش أسماء الوزرا بتوعنا
ودي مصيبه بجد

شكرا يا مي وألف تحيه وتقدير ليكي نورتيني بجد

النجمة الصامدة said...

شاركني بالتصويت على فكرة كتابي الأول
www.somood.blogspot.com

mado80 said...

مصطفي

ازيك

علي فكره اللي انتي قولته ده يا مصطفي مش عارف سعات كتير بيحيرني بجد

مش عارف ليه في بعض الأوقات بشعر ان الحكم المناسب للشعب المصري هو حكم الفرد أو المستبد العادل كما يقال

سعات بقول لأ ده مصر كان فيها حياه ديمقراطيه كبيره قبل الثوره وما يصحش يكون فيها حكم فردي مهما كانت عداله هذا الحكم

بس تفتكر كان الأديب الكبير توفيق الحكيم كان عنده حق في كلامه ان الشعب المصري يقدم كل شئ لمعبوده وهو مسرور

تفتكر يا مصطفي ان اللي يحكم
الشعب المصر لازم يبقي معبود ما ينفعش يبقي عابد زي خلق الله
مش عارف بس الموضوع يحير بجد

بيتهيألي علشان أحنا نفسنا شعب محير

تحياتي ليك يا مصطفي وألف تقدير لشخصك كريم

mado80 said...

zika

ازيك يا مان

بس مين قال انه خرب الزراعه وبوظ الأقتصاد

يا زيكا ده معظم الأراضي المستصلحه كانت في عهد عبد الناصر
كمان معظم الصناعات الثقيله كانت في عهده
يبقي خرب الزراعه وبوظ الأقتصاد ازاي يا زيكا بس

أنت أكيد بتتكلم عن أحمد زكي

هههههههههههه

بس بحييك بجد علي أعجابك بهذا الرجل لأنه أهل لهذا الأعجاب فعلا

تحياتي يا زيكا ليك والف تقدير لشخصك الكريم
بتنورني بجد يا زيكا

mado80 said...

عروبه
ازيك

شكرا علي أعجابك بالبوست

وأعتقد ان كلماتك علي الرغم من أنها موجزه الا انها تحمل الكثير من معاني الحب والوفاء لهذا الرجل العظيم بحق

تحياتي لكي وألف تقدير لشخصك الكريم وشكرا جزيلا لتكرار الزياره

mado80 said...

عاشقه الوطن

وعليكم السلام ورحمه الله وبركاته

أزيك يا رضوي
يارب تكوني بخير

بحييكي يا رضوي علي حبك وأعجابك بعبد الناصر

وأعتقد كما قلتي أنه لا أحد معصوم من الخطأ ويكفي بالفعل أن عبد الناصر كان رجلا بحق في زمن قل فيه الرجال

تحياتي ليكي يا رضوي والف تقدير لشخصك الكريم
نورتيني والله يا رضوي

mado80 said...

أستاذ راجي

والله يا أستاذ راجي ما تعرفش كلماتك دي فرحتني قد ايه

وبجد أنا اللي لازم أشكرك وأحييك علي تقديرك لرجل في قامه وعظمه ناصر رحمه الله

بالفعل يا أستاذ راجي طهاره يد عبد الناصر وعفته تدل علي الكثير والكثير أعتقد أنه من النادر أن نجد حكاما مثل ذلك
وخصوصا ان عبد الناصر بكل شعبيته وجماهيريته كان يستطيع أن يفعل ما يشاء

الا أن الشخصيه النقيه والنظيفه تظل كذلك علي الرغم من كل الأغراءات

تعرف يا أستاذ راجي اللي خلاني أحترم عبد الناصر أكتر هو ايه

شهاده اعدائه

هو ده اللي خلاني أحترمه وأقدره أكتر من الأول
قريت قبل كده ان عبد الناصر لما مات

مناحم بيجن قال
وفاه عبد الناصر تعني وفاه عدو مر لقد كان أخطر عدو لأسرائيل

قد ايه كانوا بيخافوا منه وبيحترموه علشان كده كل ما أشوف الوضع اللي احنا وصلناله لازم أترحم عليه وعلي أيامه

ربنا يرحمه كان رجلا عظيما بحق

أنا بجد بحييك وأشكرك ياأستاذ راجي علي كلماتك
ألف تحيه وألف تقدير لشخصك الكريم

mado80 said...

النجمه الصامده

ذهبت الي مدونتك
وأعطيت صوتي
لحكايات انسانيه عن أشخاص قابلتهم

وان كنت أفضل أن تؤلفي ما تشعرين به أنتي وليس ما يريده الأخرون

haneen said...

عزيزى مادو

لماذا انا احب الزعيم عبد الناصر

هذا الرجل العظيم على الرغم من رحيله منذ نحو 38 عاماً ما زال له حضوره القوى والمؤثر بل ويزداد يوماً بعد يوم وخصوصاً بعد ان رأينا هذه الايام الصعبه التى نعيشها الان الخاليه من اية معانى للحياه والمليئه بأنصاف الرجال الذين يحكموننا اما ناصر فكان رجل والرجال قليلاً حقاً بمعنى الكلمه وتلك ظاهره غير اعتياديه بالنسبه للحكام السابقين خاصة والراحلين خصوصاً والذين اصبحوا لا يملكون من امرهم شيئاً خاصة عبد الناصر الذى قوض اركان امبراطوريات كانت لا تغيب عنها الشمس وضرب معاقل الاستغلال والاستبداد الاجنبى والمحلى وانه اعز مصر والمصرين بإبائه وكرامته وكبريائه حيث كان المصرى له مكانته وكرامته فى اى بلد يذهب اليها وكنا نشعر دائماً ان ورائنا ضهر ورجل اسد يحمينا ويأخذ لنا بحقوقنا فكنا اعزة ولا نهان فى عهده والذين يتهمونه بأنه كثرت فى عهده السجون والمعتقلات والتعذيب للكثيرين من خيرة المثقفين والادباء والمفكرين . فالحقيقه ان هذا كان يحدث بعيداً عن علمه لانه عندما عرف وبعد استشهاد المناضل الوطنى شهدى عطيه الشافعى نتيجة التعذيب المفرط واللا انسانى والذى كان يأمر به ويشهده احد كبار ظباط امن الدوله المعروف بشذوذه ... اصدر عبد الناصر الامر بإيقاف اى تجاوزات فى حق المعتقلين واجراء تحقيق صارم فيما تم من تجاوز ورغم كل ذلك فلقد خرج الكثير من المعتقلات والسجون وهم لا يحملون للزعيم حقد او كره والدليل على ذلك كلمات الشاعر الكبير احمد عبد المعطى حجازى التى تصلح شهاده على ذلك فى قصيدته " مرثية للعمر الجميل" وهناك العديد من نماذج السجناء فى العهد الناصرى لم تتغير قناعتهم وحبهم للزعيم مثل الصحفى محمد عوده ويقول الصحفى صلاح عيسى انه بالرغم من اعتقاله مرتين فى عهد عبد الناصر بسبب مشاركته فى مظاهرات والاخرى بسبب مقالات كتبها الا انه عندما مات عبد الناصر نزلت دموعه ودموع الجميع عليه نسينا الاعتقال ولم نتذكر الا موته فالرجل بالرغم مما اصاب البعض من عذابات فأنه احتل قلوبهم وافئدتهم فكان حبيب الملايين لانه كان صادق فى وطنيته شجاعاً فى مواقفه التى جسدت الآلام وطموحات شعب فاقت معاناته كل التصورات وصحيح ان الديمقراطيه كانت معدومه بإلغاء الاحزاب وكافة مؤسسات المجتمع المدنى او المنظمات الحقوقيه ولكن الفلاحين والفقراء عاشوا ازهى عصورهم واخذوا كل حقوقهم كامله وهذا يحسب له بالقطع ولكن كان كثير من الامور تدار بعيداً عنه ودون علمه وان وصلته انباءها فإنها تصله من خلال من دبروا الامر كله وتدبروا امر ابلاغه به لقطع الطريق امام من يمكن ان يبلغه الخبر اليقين. فلم يكن عبد الناصر حاكماً مستبداً وذلك أن ايمانه بالحريه وعشقه الاثير لديه كانت ممارسة الديمقراطيه بأوسع معانيها لانها كانت من صميم تكوينه الشخصى وهناك عشرات الدلائل والمواقف التى تؤيد ذلك وتقطع به موقفه من طبع كتاب سيد قطب " معالم فى الطريق"ورفض مصادرته والموافقه على طبعه 6 طبعات متواليه وموقفه من المفكر الاسلامى خالد محمد خالد وموقفه من نجيب محفوظ والمفكر احمد بهاء الدين ومن حافظ محمود شيخ الصحفيين ونقيبهم ومواقفه من حرية الرأى . اما انحيازه للفقراء والكادحين فكان ابو الفقراء وسند المحتاجين وغوث المظلومين وقمه فى التواضع والتلاحم مع الشعب والدليل على ذلك جنازته التى لم يشهد العالم كله مثلها من روعتها وجلالها وعظمتها فكان دائماً مناضل وطنى شجاع لم تسقط راية وطنه من يده . رحمه الله رحمة واسعه وجعل قبره روضة من رياض الجنه واسكنه مع الشهداء والصديقين . انه الزعيم خالد الذكر جمال عبد الناصر الذى سوف يظل دائماً وابدا حياً نابضاً فى قلوب شعبه وشعوب العالم المحبه للحرية والسلام.
اسفه للاطاله بس دا واجب وامانه يجب ان تقال فى حق رجل عظيم مثله انا من عشاقه


خالص تحياتى

Zika said...

الفكره في بوظان الاقتصاد هي بوظان الزراعه
والزراعه باظت لما ساب معظم الاراضي للفلاحين
وبكده
نص الارض الزراعيه في مصر بقت مباني , انا نفسي ساكن في حي امبابه
واحب علي كلام والدي انه من 20 سنه بس كان شارعنا وشارع تاني ودول الشوارع الرئيسيه واهم شارعين في الحي لانهم بيوصلوا بين الكيت كات واحمد عرابي وجامعة الدور وبين المعادي ومدينة نصر ومدن القاهره عن طريق مخرج الطريق الدائري
لو انت مصراوي هتعرف قصدي ايه
المهم يعني بعد الخريطه اللي انا وصفتهالك دي يا باشا
علي كلامه
ان المنطقة دي اللي يسكنها حوالي اكتر من مليون فرد كانت عبارة عن اراضي زراعيه
وان حي امبابه كله علي بعضه ( وتخيل ده في محافظة الجيزه بس ما بالك بقي بقيت مصر )
بمعني ان مصر بعد ما اتكل علي الله
فقدت نص قدرتها الزراعيه وبالتالي الصناعيه وبالتالي الاقتصاديه بسببه هو
بسبب الخطا اللي ارتكبه لما وزع اراضي مصر الزراعيه علي الفلاحين
واكنه كان بيخلص حق
وده في حد ذاته هو 50 من سبب تدهور مصر
تحياتي ليك يا باشا والمدونه منوره بصاحبها وبناسها
بالمناسبه انا غيرت اسم المدونة بتاعتي
واللينك
معلش بقي بتعبك معايا
http://adirector.blogspot.com/

MĕŢø & ŘǿŖêĔ said...

عبد الناصر يا جماعه ملاك بالنسبة للعمايل الي بيعملوها رؤساء العرب
احنا لو عندنا اتنين رؤساء زيو يبقى اتحررت فلسطين ورجعت العراق بس لو هو عمل اشياء بحكمو غلط ممكن بس احسن من غيرو بضل

**
دمت بود اخي

mado80 said...

حنين

ازيك

سعيد جداا بتعليقك هذا وسعيد أكثر اننا نتفق في حب واحترام هذا الرجل العظيم الذي فعل لبلده الكثير والكثير

يكفي أحترام أعداءه له ويكفي أن حبه في القلوب الي الأن علي الرغم من كل تلك السنوات علي رحيله


رحم الله هذا الرجل رحمه واسعه

تحياتي لكي حنين وألف تقدير لشخصك الكريم

mado80 said...

زيكا

بس برضه يا زيكا مش ذنب عبد الناصر أن وزع الأراضي علي الفلاحين وبعدين الفلاحين بنوا عليها

البناء علي الأراضي الزراعيه بيتهيألي جه بعد فتره عبد الناصر

وكمان مش عيب ان عبد الناصر وزع الأراضي علي الفلاحين بل بالعكس ده كان بيرد الحق لأصحابه

الفلاحين دول اللي كانوا بيشقوا ويتعبوا في الأراضي وفي الأخر ياخدوا الفتات من الأرض اللي تعبوا فيها

بنوا بقي عليها الفلاحين بعد كده ده مش ذنب عبد الناصر ده ذنب الحكومات اللي جت بعد كه ومعرفتش تحكم العمليه دي

تحياتي يا زيكا ليك وألف تقدير لشخصك الكريم

mado80 said...

روري

ازيك

طبعا يا روري عبد الناصر بالنسبه للرؤساء اللي بيحكمونا دلوقتي ملاك

الرؤساء دول اللي كفروا الشعوب وما سابوش حاجه الا وعملوها في شعوبهم

عبد الناصر نوعيه من الزعماء اللي صعب انها تتكرر كتير

الله يرحمه رحمه واسعه

تحياتي لكي روري وألف تقدير لشخصك الكريم

العنقـــــــاء said...

مفيش انسان كامل ومفيش انسان معصوم من الخطأ

وما نقدرش نجزأ الانسان وناخد الحلو والطيب والخير وتسيب الباقي

اعتقد ان عبد الناصر من جواه كان نضيف اوي

لولا وجود بعض الفاسدين اللي حاوطوه

وكانوا متواجدين خلال حكمة

تحياتي لفكرك الراقي والجميل

وربنا يرحمنا جميعا ويجمعنا بخيره الناس في الجنه باذن الله

اختك موءة

mado80 said...

العنقاء
ازيك

صحيح زي ما بتقولي ما فيش انسان عموما معصوم من الخطأ

عبد الناصر كان ليه أخطاءه مافيش حد ينكر بس علي الرغم من كده كان ليه انجازات كتيره أوي صعب ان احنا نغفلها

ربنا يرحمه كان رجلا عظيما

تحياتي لكي وألف تقدير لشخصك الكريم