Monday, February 18, 2008

تعليق علي أشياء تحرق الدم



انتصار غانا وانتصار أكتوبر




في الأول بس لازم أقول أن النصر الذي أحرزته مصر في بطوله غانا انتصار رائع وباهر بكل المقاييس


هذا الأنتصار يستاهل ان الشعب المصري يفرح ويزأطط ويهيص ، و بجد جدير بكل مصري أنه يفخر ببلده علشان حققت انجاز بالحجم ده


أنا واحد من الناس كنت حاسس أني طاير من الفرحه بعد ماتش الكاميرون لدرجه اني عيطت من الفرحه


صحيح احنا من حقنا نفرح ونفرح أوي


بس لما تيجي بقي الفرحه دي تنسينا نفسنا وتخلينا نقرأ في أخبار اليوم مقارنه أو بلاش مقارنه مجرد تلميح


بأن النصر الرياضي الذي حققته مصر في غانا يشبه نصر أكتوبر


فدي معلش ومع أحترامي لفرحه الملايين تبقي كارثه


ايوه انتصرنا ببطوله غانا وكان نصر غير متوقع كان نصر باهر ممكن نكتب فيه قصايد


بس ده معلش طلع ولا نزل نصر رياضي ليس الا


ان نخلط بين نصر رياضي ونصر عسكري راحت علشانه مئات بل آلاف الأرواح من الشهداء يبقي احنا كده بنهرج


وبنستهين بأرواح شهدائنا اللي راحوا فداء لهذا البلد




في أعتقادي ان احنا لازم نبسط الأمور مش لازم علشان نخلي الناس تشعر بأهميه النصر الرياضي العظيم ده ان أحنا نقولهم ان النصر


تم بروح أكتوبر مش عارف ايه دخل روح أكتوبر بنصر رياضي


كمان فيه حاجه مهمه أوي عمال بسمعها كل شويه


وهي ان النصر جه بفضل التزام اللاعبين في الصلوات والعبادات


ماشي كلام جميل ان اللعيبه بتوعنا يبقوا ملتزمين في عباداتهم وأخلاقهم شئ مهم أوي


بس نخلي ده سبب أساسي للنصر ده برضه غلط كبير لأن كده يبقي أحنا بنحول الرياضه كأنها معركه بين معسكر الكفر ومعسكر الأيمان


وكأن الفرق الأفريقيه مثلا ما كانش فيها مسلمين ولا ناس ملتزمه في عباداتها


مش عارف ليه دايما فرحتنا بأي حاجه في مصر بتخلينا نفقد سيطرتنا علي عقلنا


طيب مثلا لو مصر كانت خسرت لاقدر الله يبقي كنا هانقول ايه علي الألتزام الديني بتاع لعيبه المنتخب


ايوه طبعا توفيق ربنا كان كبير في البطوله دي بس ده علشان سبب أساسي وهو أن اللاعبين أجتهدوا وتعبوا وجدوا


يعني كان فيه سبب للنصر وهو التعب والجهد اللي شوفناه من كل اللاعبين بلا استثناء




في الأخر لازم أقول أنه ما ينفعش أبدا ان احنا نخلط ما هو رياضي بما هو ديني بما هو عسكري بما هو سياسي




عيب علينا أوي الكلام ده




*******************************************************


بدايه ضخ الغاز المصري لأسرائيل




في هدوء شديد وبدون ضجه بدأت اسرائيل تنهي استعدادها لتلقي الغاز المصري في شهر مارس المقبل


نشرت جريده الدستور أنه بناء علي الأتفاق الموقع بين هيئه كهرباء اسرائيل وبين شركه غاز شرق المتوسط


اللي بيملك أغلب أسهمها رجل الأعمال المقرب من الرئيس مبارك حسين سالم هاتقوم الشركه بضخ الغاز الطبيعي لجميع محطات توليد الكهرباء الأسرائيليه ، شركه كهرباء اسرائيل كانت اتفقت علي شراء ما يقرب ما 1،7 مليار متر مكعب في السنه لمده 15 عاما




طبعا كلامي موجه للكتاب الأشاوس اللي قوموا الدنيا ومقعدوهاش علشان دخول الفلسطينين معبر رفح وقعدوا يشنفوا آذانا بمحاضرات عن الأمن القومي المصري والمحافظه علي الأمن القومي المصري


طيب فين بقي حضره الأمن القومي ده يا حضرات الأفاضل المحترمين في تصدير الغاز المصري لأسرائيل اللي هو ملك لكل الأجيال واللي أولي بيه شعب مصر وولادها


فين بقي أمن مصر القومي في ده ، حد يرد عليا والنبي علشان أستريح أنا دمي أتحرق بجد


والأغرب من كده كمان أن احنا بعنا الغاز لأسرائيل بأبخس الأثمان يعني موت وخراب ديار


حسبي الله ونعم الوكيل




***************************************************************


أخبار اليوم لصاحبها ممتاز القط وشركاه




لا يخفي علي أحد المستوي المتدني الذي وصلت اليه جريده كبيره زي أخبار اليوم بعد ما تولي رئاسه تحريرها المدعو ممتاز القط


واحد زيه صراحه المفروض يتكسف علي دمه لأن كل مؤهلاته علشان يمسك المنصب ده هو أنه عضو في الأمانه العامه للحزب الوطني يعني راجل بتاع الحكومه كل الناس طبعا عارفه ده


يجي بقي بعد كده في مقاله يوم السبت اللي فات ويعيب في كاتب بوزن الأستاذ فهمي هويدي ويصفه بأنه كاتب سفيه




يبقي كده بجد لازم نقول أن اللي أختشوا ماتوا ولازم نقول كمان ان القيامه قربت




لما واحد في مستوي متدني زي ممتاز القط يقول كده علي أسياده من الكتاب المحترمين




طبعا هو ما صرحش بأسم الكاتب الكبير بس لمح علي المقال الذي كتبه الأستاذ الكبير فهمي هويدي واللي منعته الأهرام ونشرته الدستور الأسبوع اللي فات كان أستاذ فهمي هويدي عقد مقارنه بين ما حدث في غزه ودخول الفلسطينين باعداد كبيره الي مصر وبين أعداد المصريين الموجودين في ليبيا وأوضح الكاتب الكبير فهمي هويدي أننا لم نسمع مثلا من الكتاب الليبين أحدا قد أعتبر مثل هذه الأعداد المهوله للمصريين في ليبيا تمثل تهديدا لأمن ليبيا القومي


مع أن أعداد المصريين في ليبيا تقترب من نصف تعداد السكان هناك


كنت هاحترم القط لو رد علي الأستاذ فهمي هويدي بمنطق وعقل


أما أن يرد عليه بأسلوب الشوارع والعربجيه فده أساسا علشان هو كاتب ما يفهمش غير في الأساليب دي




بقي أنت يا قط تشتم الأستاذ الكبير فهمي هويدي انت تعرف الأول يا قط مين هو الأستاذ فهمي هويدي


نو نو يا قط براحتك ما أنت مش لاقي اللي يلمك وكمان ما أنت لازم ترضي أسيادك اللي عينوك في منصب ما كنتش تحلم بيه




*************************************


الحمد لله انا كده خلصت كلامي لكن مين... مصر ياما هانشوف فيها حجات تحرق الدم وتفقع المراره وتجيب للواحد أمراض الدنيا والأخره ربنا يعفينا كلنا يارب


55 comments:

مصطفى محمد said...

سلامو عليكو

اولا : ايه يا عم كل ده .. يعني ذنب الواحد انه بيخش يتابع ما يلاقيش .. يشتكي يلاقي كككول ده .. بس براحتك يا مان .. بجد في الهادف

ثانيا : يااااااااه .. ده انا متفق معاك اتفاق الابل .. الكورة كورة .. السياسة سياسة .. أما عن الدين .. فبص .. من الجميل الرقيق ان يسجد لاعب ينظر اليه آلاف الشباب .. طبعا مع الاعتراض الصائب في تحويل الأمر الي غزوة

ثالثا : الموقف المثالي هو الرفض التام لتصدير الغاز و اعلان الكيان الصهيوني عدو أثير و فضح مخططاته للتطبيع مع مصر حكومة و شعبا و كام خطبة كده عن تفضيل الموت ولا تصدير الغاز لاسرائيل .. بس بما اننا مش في الجنة .. فممكن مثلا نلتزم بالسلام اللي من طرفنا و نسكت على المذابح الاسرائيلية و نلتزم بتصريحات استراتيجية تشجب مواقف الكيان الصهيوني و نرفض تصدير الغاز في السكوت التام عشان محدش يثور علينا و يقولنا انتو مش بتساعدوهم ليه يا أعداء السامية .. انما بقه كل اللي فات مع تصدير الغاز لمدة 15 سنة كده عيني عينك عشان نقول لاسرائيل يلا يا ستي خدي اعملي بنية تحتية و اضمني للمواطنين بتوعك حياة كريمة و زودي ترسانتك العسكرية من عندنا .. من اجل ذلك اضم حرقة دمي على حرقة دمك و لنخلق محرقة كبيرة تلتهم الغاز كله .. اهو احنا مصريين و حنحرقه على حاجة مفيدة

رابعا : في الحقيقة انا بتاع اهرام مش اخبار .. بس الموقف اللي انت بتحكي عليه اتكرر قبل كده .. و عاديييي .. و اللي زي القط ده بيطلع بعد كده في برنامج جالسا و قدمه للمشاهدين و أنفه في صدارة الكاميرا قاءلا على فكرة هو مش بيحب النقد البناء هو غلطان

تحياتي اليك

sa'7so'7te said...

مش معنى ان الواحد مش لاحق يدخل البلوجات بقاله فترة انك تحرق فى دمك كدا
يا سيدى مش هقطع الزيارة تانى
:)
فى الموضوع الاول انا طبعا معاك ايه التخلف ده
فى الموضوعين التانين انا مش هفتى لانى فى السياسه اجهل من .... عموما كلامك اكيد صح حد هيشك فيك يعنى
المهم ماتحرقش دمك يا راجل

نوراى said...

ماجد اية اخبارك

يارب تكون كويس

انا اسفة بجد يا ماجد لانى بقالى كتير مش بزورك بس اعذرنى

انا بس قلت امسى عليك وهارجع اديلك مومنت على كل البوستس اللى فاتتنى

دومت بالف خير

نوراى

maii bahaa said...

إزيك يا ماجد

ياللي داخل شمال ومقتحم وميه ميه

معاك طبعا الإنجاز الرياضي لا يقارن بالعسكري اللي راح ضحيته آلاف الشهداء

النقطتين اللي بعد كده مافيش بعد اللي انت قلته
حسبي الله ونعم الوكيل

سيبك انت ...اعجابي بمستوى ثقافتك مع سنك عمال يزيد
إلى الأمام
:)

appy said...

كده كده كده انا تعمل فيه كده الله يسمحك انا عارفه انى هطلع فى نهايه خدمة البلوجات على العباسيه اذا مكنتش كامل العدد
بص يا قمر كونهم يشبهوا اويلمحوا بده الرياضه باكتوبر امال يا راجل مش لازم يكون فيه جاز قصدى انجاز فى عصر اونكل مبارك ولا ايه سيبك انت مفيش احلى من الكبارى المتعلقه هههههههه
اما الغاز فبصراحه مسمعتش عن الموضوع ده وبعدين يعنى مع احترامى للدستور يا سيدنا مش بثق فيها اوى بس حتى لو حصل كده يبقى مفيش غير انى اقعد على سور البلكونه وادلدل رجلى وادعى عليهم ينفجر طيب ما يخلصوا فى مصر الاول ولا هو اقرع ونزهى

اما موقف القط ده فقط تعمل ليه ايه يعنى وبعدين يا ابنى فتح دماغك تفتكر ازاى يحافظ على الكرسى ويحوله من تيفال بمعنى انه ميلزقش ويخرجه لحديد او خشب عليه غراء لازم يشتم حتى فى الشعب نفسه عارف الريس لو قاله اشتمنى هيشتمه صباحه حرقة دم يا مادو ادعلى عليك بايه روح وارجع تانى بقى بسرعه متتأخرش

mado80 said...

مصطفي محمد

وعليكم السلام يا درش

معلش يا مصطفي أنا عارف أن البوست طويل وومكن يكون رخم حبتيين بس هاعمل ايه يا مصطفي بجدالواحد لو ما كانش كتب البوست ده كان ممكن يجيله نقطه ربنا يعفينا جميعا

كويس يا مصطفي أنك متفق معايا أن الكوره كوره
والسياسه سياسه
والدين دين برضه يا مصطفي مش عارف وسائل الأعلام الفتره اللي فات حسستني أن الفريق القومي كان في حرب دينيه
ماهو للأسف كل حاجه عندنا سلطه

بالنسبه للغاز ايوه معاك حق ماهو مصر لما تشوف كل جرايم اسرائيل دي ومع ذلك تصدرلها الغاز ولمده 15 سنه يبقي ده معناه ايه معناه مثلا أن مصر بتكافئ اسرائيل علي الجرايم دي يعني ولا ايه
لأ بجد حاجه تحرق الدم

سواء بتاع الأهرام أو الأخبار كلها صحف قوميه تستاهل الحرق
الواحد والله غصب عنه بيقرا الصحف دي

الأهرام ما تفرقش عن الأخبار كتير في الموالسه للسلطه بس هي يمكن أكثر أحتراما حبتيين للقارئ بتاعها

بس أكيد فيها ناس من عينه القط اللي بينو نو عمال علي بطال للحكومه ومبارك وانجازات مبارك

تحياتي ليك يا درش معلش لو كنت عملتك ازعاج بالبوست الطوووويل ده

mado80 said...

sa7so7ty

ازيك يا ساره عامله ايه

عاش من شافك يا شيخه ايه الغيبه الطويله دي

شوفتي بقي غيبتك عليا عملت فيا ايه
شوفتي حرقه الدم اللي أنا فيها

كويس أنك بتتفقي معايا أنه غلط نقارن حرب أكتوبر بنصر كأس أفريقا

أما بقي بالنسبه للسياسه فأنا برضه ماليش فيها خاااالص
سياسه ايه يا بنتي أنا ما بتكلمش في السياسه خاااالص

معلش يا ساره ليكون حد مراقبنا ولا حاجه
هههههههههههههههههه

تحياتي ليكي يا ساره ونورتيني وما تبقيش بقي تقطعي الزياره تاني مش ناقصه حرقه دم

:) :)

mado80 said...

نوراي

أنا الحمد لله انتي ازيك بجد

ايه الغيبه الطويله دي أنا عرفت أنك عملتي حادثه بالعربيه ودخلت سيبتلك كومنت علي البوست اللي انتي كتبيتيه وقلتي فيه انك عملتي حادثه
بس انتي ما ردتيش عليا فقلت دي أكيد تعبانه ولا حاجه

المهم انتي كويسه دلوقتي ان شاالله تكوني بخير يارب

سعيد أوي والله اني شوفت تعليقك ونورتيني بجد وبلاش بقي الغيبه الطويله دي

mado80 said...

مي بهاء

ازيك أنتي يا مي يارب تكوني بخير

أعجابك بمستوي ثقافتي ده يا مي بجد والله ما تعرفيش عامل فيا ايه مخليني طاير بجد من الفرحه والله

أساسا يا مي كون أنك تدخلي علي مدونتي وتسيبي تعليق ده لوحده شرف كبير أوي ليا والله
ما بالك بقي كلماتك الرقيقه وتشجيعك المتواصل ليا مش عارف بجد أشكرك ازاي

وكويس برضه أن احنا متفقين في اراءنا ده شئ برضه أسعدني جداا

تحياتي ليكي يا مي وألف تقدير لشخصك الكريم

mado80 said...

آبي

ازيك

معلش والله لو كان البوست زعلك بس أعمل ايه طيب ما أنا اتحرق دمي أعمل ايه طيب

صحيح يا آبي الراجل بعد 27 سنه حكم ما فيش أي انجاز يقدر يقول انه عمله طبعا باستثناء الكباري
الراجل كان ناقص يعمل كوبري لكل مواطن

ليهم حق بعد كده يمسكه في أي حاجه ويقلك أنجاز السيد الرئيس حتي لو كان أنجاز رياضي مالوش اي دخل في تحقيقه

ليه كده يا آبي ما بتثقيش في الدستور ليه دي جريده محترمه جداا والله
بس علي فكره مش الدستور بس اللي كتبت موضوع الغاز ده تقريبا كل صحف المعارضه كتبت عن الموضوع ده
أطمني ما تقلقيش كلنا هاندلدل رجلينا وندعي ربنا يفجرلهم أنابيب الغاز

بالنسبه بقي لعمو القط فصحيح بتفق معاكي في كل كلمه قلتيها فعلا الراجل عنده استعداد يعمل أي حاجه علشان الكرسي

حسبي الله ونعم الوكيل في اللي قعدوا عليه أصلا ما كانش يحلم القط أنه يمسك منصب زي ده في حياته

ألف تحيه ليكي يا آبي ومعلش لو كنت زعلتك هاعمل ايه بقي
وكمان لو مكنتيش ها تستحمليني مين يعني اللي هايستحملني

وما تخافيش ان شاء الله مش هايكون فيها عباسيه ولا حاجه
:) :) :)

حسام مصطفي إبراهيم said...

أول مرة اتشرف بدخول مدونتك
ايه يا عم كل ده .. دا انت جامد قوي وانا ما اعرفش..
بجد موضوعاتك بتلعب على كل الأوتار السخنة في البلد .. بحييك على جرأتك واسلوبك الرشيق الممتاز .. هم دول المعلمين ولا بلاش .. سعيد بالتعرف إلى شخص متميز مثلك .. ولعلها تكون بداية صداقة قوية .. شكرا على تشريفك مدونمتك ورأيك القيم الذي أعتز به كثيرا

mado80 said...

حسام مصطفي ابراهيم

أنا بجد والله مش مصدق نفسي

الأستاذ:حسام مصطفي ابراهيم بذات نفسه سايب عندي تعليق لأ بجد أنا فرحان أوي وسعيد لدرجه ما تتخيلهاش

تعرف ان شاء الله لما ربنا يوفقك كده وتشتهر وتبقي ملء السمع والبصر

هافتخر دايما أنك جيت في يوم وسيبت عندي تعليق ، هاحط رجل علي رجل وأقول لصحابي الأستاذ حسام مصطفي أبراهيم كان بيدخل المدونه بتاعتي ويعلق علي الحجات اللي كا تبها

ربنا يخليك يا حسام بجد وألف شكر علي مجاملتك الرقيقه ورأيك في اللي أنا كاتبه
هي دي روح المعلمين ولا بلاش
:) :)

لأ وبتقولي يا حسام لعلها تكون بدايه لصداقه قويه

ده أنا يشرفني بجد ان يكون بينا مجرد صداقه
ما بالك بقي لما تبقي قويه كمان

ألف شكر بجد يا حسام وياريت بجد ما تقطعش الود وان شاء الله يبقي بينا بالفعل صداقه قويه

ألف شكر مره تانيه يا حسام علي تشريفك ليا، بجد المدونه نورت بيك

a7med3bdelfta7 said...

أراء محترمة جدًا

أحمد منتصر said...

مدونتك عجبتني :)

تحياتي

mado80 said...

أحمد عبد الفتاح

أشكرك علي زيارتك الطيبه التي أرجو الا تنقطع

وألف شكر علي مجاملتك الرقيقه

تحياتي لك

انين الحزن said...

مادو

ازيك اخبارك ايه


حلوه فكره البوست

احنا فرحنا اه بس مش معني كدا اننا نشبها بانتصارنا في اكتوبر

تحياتي ليك ياقمر

وزة

mado80 said...

أحمد منتصر

ازيك

ألف شكر علي زيارتك دي وياريت ما تكونش الأخيره

وشكرا جداا علي المجامله الرقيقه

تحياتي ليك يا أحمد وألف تقدير لشخصك الكريم

mado80 said...

وزه

عامله ايه
انتي فينك بقالك كتير مش باينه ليه

كويس يا وزه انك متفقه معايا أنه ما ينفعش نشبه انتصار رياضي بأنتصار عسكري

تحياتي ليكي يا وزه وألف تقدير لشخصك الكريم
بتنوريني والله يا وزوزه ما تبقيش تغيبي تاني بقي

gannah said...

هايل والله معك حق

عـــــــــــــــروبة said...

مقالة تلامس الجرح مباشرة .

نتخبط بين انتصاراتنا لندرك في النهاية انها مجردّ ابرة تخدير كي نحتمل هزائمنا اللاحقة والقادمة

..
وما نلبث ان نصفع صفعة قوية على وجههنا كي نعلم بأن انتصارنا هذا هو هزيمة بطريقة اخرى

تحياتي لك\\

فضفضة said...

يا بختك اولا

انك فضفضت وبعبعت وفضيت جعبتك كلها فى وشنا هههه

ثانيا

يا دماغك يا شيخ

زعلان من انتصارات المغاوير فى حربهم فى غانا

هو ده مش كفاح مسلح ولا اية يا راجل

ومن غير تبنى بابا مبارك للرياضة والرياضيين

ومن غير ماما سوزان ما تمسك العلم وتمرجح فيه شمال ويمن

كنا انتصارنا ولا كنا شفنا انتصار اصلا

ومن غير اتصالات

مالك مصر وولى عهده الامين

باللعيبة

ودعمهم معنويا مكنوش رجعوا لنا حاملين كاس الفتوحات الاكبر

انت صحيح مفترى

اكتوبر اية

اللى يتقارن
بغانا واللى حصل فى غانا

وبطولات غانا
وفتوحات غانا

يا رااااااااجل

وبعدين تعالى هنا يا بتاع اكتوبر

وكل بتوع اكتوبر يجيوا كمان

جيتوا خلاص

اوك

بذمتك وبذممكم

هو لولا ان الريس كان قائد
فى اكتوبر كنتم شفتوا النصر بعينكم هههههههه

مش كده ولا اية

وبالنسبة للغاز انا معرفشي حاجة عنه

كل اللى اعرفه ان

فيه بلاد كتير عندنا

مش لاقين ريحته

وبيستخدموا وابور الجاز

اللى بيعمل
ووووووووش وووووووش

وطرش دائم ده

لحد الان

تحياااااتى

ريح شوية انت بقى لان البوست ده اكيد تعبك جدا

MĕŢø & ŘǿŖêĔ said...

السلام عليكم
اول شي الحمد لله ان مصر انتصرت بالكأس لان النصر كان للوطن العربي كلو
بس حاليا نصر رياضي ولا البلاش
يعني هو في رئيس عربي بسترجي يقول اوقفو الحصار عن غزة او يمسك الجيوش الي بتحرس قصره ويقول يلا نحرر القدس والعراق والجولان ؟
احنا باخر زمن الاخ يقتل ويخون اخوه ويتفق مع عدوه على اهله
ما هم الرعب معاهم اقوى سلاح ضدد الصهاينه وامريكا وهو النفط
بس حكام الرعب عالم خانوا الله قبل ان يخونوا اوطانهم ورقصوا بالسيوف مع بوش على دماء اهل غزة هون عليك يا رفيقي وبلاش حرقت دم عشان هادا الموضوع بجيبلي عصبي
:D
وزي دايما انا اخر من يعلم وتعليقي متأخر
دمت بود

احمد الجيزاوى said...

الحمد الله انى الواحد غير منافق
انا جى اسلم عليك كتير لانك وحشنى وفعلا انا كنت بعيد كام يوم عن النت
بس الحمد الله انا هنا علشان اسلم عليك حول اشوفك قريبنا
بخصوص تصدير الغاز الى اسرائيل هل تعتقد انه هذا الفعل جريمه خيانه عظمه
اما منافقين الحكومه انا بسميهم المنافقين الجدد
تحاتى لك والى مدونتك الرائعه
احمد الجيزاوى

haneen said...

والله العظيم يا مادو يا اخويا انا كمان دمى محروق وعندى كآبة الدنيا اكتر منك بس هقول ايه هقول ايه هقول اييييييييييييييييه

حسبى الله ونعم الوكيل فى كل الظالمين

حقيقى يا مادو ياريت كل الشباب والمدونين يعملوا زيك كده ويكون عندهم الشجاعه الكافيه انهم يعبروا عن ارائهم وحتى اضعف الايمان يقولوه على مدونتهم علشان نبان حتى ادام نفسنا بلاش ادام العالم اننا معترضين ومش راضيين على المهازل اللى بتحصل لنا دى وبجد يا مادو انتى اوجزت فأنجزت جزاك الله كل خير على مجهودك ونحن لـــنـا الله

خالص تحياتى وتقديرى

Eman Eltaher said...

والله لك حق ف كل حاجة

فعلا حاجات كتير بنشوفها من ناس مصر مستفزة و تحرق الدم

مش عارفة فعلا إيه علاقة نصر الكورة بنصر اكتوبر !!!!

ومصر اللى المفروض تكون ضد اسرائيل بعد المهزلة اللى حصلت بسببها تروح مصدرلها مواردنا و لا كإن فيه حاجة

أما ممتاز القط
فأنا بصراحة مكنتش ملمة بالموضوع ده
بس اذا كان زى ما بتقول يبقى فعلا عندك حق نقول
نو نو
ههههههههههههه
تعبير على هيافته و دنو تفكيره


على فكرة الأبراج لسة موجودة بخيرها
هو بس واحد ضرب و عملتله ريفريش
ههههههههههههههه

تحياتى عل البوست

نوسه said...

كلللل ده يامادووو
معلش روق هنعمل ايه دى بلدنا هنتبرا منها يعنى ولا نرميها للقطط؟
بسسس انا فرحانه انى مليش فى الكوره وربنا عشان مش ناقصه حرقة دم منها هيا كمان
وفرحانه اكتر انى مبقراش جرايد خااااالص
فى حاجات كتيييير غيرهم تحرق دمى :)

شريف طلال said...

بص يا باشا
حقيقى كل الى انت كتبت عنه انا متفق معاك فيهم 100 فى ال100 بجد
و خصوصاً موضوع نصر غانا
يعنى شهداء اكتوبر لو يعرفوا الى بنقوله هيعملوا ايييييه؟؟؟
و برده شهداء اكتوبر لما يعرفوا اننا بنصدر الغاز لألى قتلهم
يعملوا ايييييييه؟؟؟

عاشقة الوطن said...

السلام عليكم


ازيك ياماجد
انت فين يابنى من زمان بقالى كتير مش شوفتك عندى فى المدونة
يارب تكون بخير

EmY said...

الاول عايزه احييك علي بوست ناصر لاني بحبه زيك

البوست ده جميل و حاجات تحرق الدم و تجيب تخلف عقلي فعلآ

اسلوبك عجبني اوي

تحياتي

Nsreen Bsunee said...

عزيزى ماجد
المبالغه فى تقدير اى شئ بتخنقنى
كنت فرحانه وطايره من الفرحه كمان لما كسبنا كوتديفوار بالذات فى قبل النهائي وكنت سعيده جدا بزيدان واحترمت موقف ابوتريكه بتاع غزه لكن تحويل ابوتريكه لبطل قومى وصلاح الدين الايوبي وتحويل الفوز فى غانه لتحرير ونصر اسطورى ده اسمه مبالغه وسخافه لا تحتملها اعصابي المتهالكه

بالنسبه لتحويل الغاز لاسرائيل اتمنى تشوفلنا اسرائيل بتدفع زى السعر العالمي وبتدفع كويس ولا لا
ولو بتدفع كويس فا بتدفع كام وبيروح فين وعائدات الغاز الطبيعي اللى بيروح اسرائيل اة غيرها كام وبتروح فين
هو ده اللى يشغلنى بصراحه يشغلنى فلوسي فين وفلوس الشعب الغلبان ده اللى مش لاقي اقل حقوقه فى الاكل واللبس والشرب والجواز لكن ميشغلنيش ان اسرائيل هى اللى بتاخد الغاز ولا سوريا ولا جزر القمر حتى

لا اتابع الصحف خاصه الحكوميه يادوب باتجول فى المصري اليوم والدستور عشان كده معرفش حاجه عن مقال القط اللى بخصوص فهمى هويدي
لكن الحقيقه انا باحترم فهمى هويدى جدا جدا وباتابع كتاباته فى الصفحه الاخيره من الدستور
والقطه بتاعه الحكومه معروف انها بتاعه الحكومه ومش منتظر منها غير كده ده انا كنت حاتخض واقلق لو مكنش القط ده كده كان حيبقي فيه حاجه غلط

انا كنت فاكره فاتنى بوستات كتير طلع هو واحد بس بتاع المرحوم عبناصر افندى
طبعا انت عارف رأيي بس تعليق ع الماشي كده

مينفعش نحكم على رئيس جمهوريه بالشكل العاطفي ده لكن ده ميمنعش انى لازم احترم مشاعر الناس اللى بيحبوه
لكن نظره بسيطه للتاريخ ولو حنحكم على اى رئيس او حاكم على اساس الحال اللى ترك عليه البلد فا حنلاقي ان ناصر ساب البلد محتله معاديه لمعظم الدول المجاوره منهكه اقتصاديا فاشله فى مجال التعليم والبحث العلمى كل مثقفينها فى السجون الاف المظلومين فى السجون بلد مافيهاش حراك سياسي مفيهاش احزاب متعدده تزايد خرافي فى عدد السكان لاول مره يخرج المصري بره بلده ويهان فى دول الخليج وغيرها كان فى عهد ناصر تاريخ منهوب واسره مالكه ومواطنين مصريين نزعت عنهم الجنسيه بدون وجه حق وطردو من بلدهم قصور اصبحت مرتعا للضباط وعشيقاتهم جيش منهك ومحطم وخزينه فارغه وشعب جائع بسبب توزيعه الاموال على اسلحه سوفيتيه وتشيكوسلافيكيه لم توظف وتم تحطيمها فى غضون ساعات من قبل الجيش الاسرائيلى منفردا دون تدخل امريكي حتى شهداء مصريين فى سجون مصريه قمع للشباب الجامعي شهداء مصريين على اراضي يمنيه وتدخل سافر فى شؤون دول ذات سياده مثل اليمن والسعوديه والاردن وسوريا التى لم تحتمل تسلط ناصر وانفصلت عنه
لذلك فاسمح لى ان الوم كل العاطفيين اللى بيسمعو تامر حسني ويقولولك انا بحب ناثر اثل عنده كاريزثما وعنيه معبره ومثاعره مرهفه
مصر عندى اغلى من اشخاص بعينهم اغلى من مجرد شخص انانى بلطجى لديه احلام واوهام وامراض السلطه والنفوذ استغل مصر وشعبها لتحقيق بطولات وهميه دون التفكير فى ابناء بلده واصحابها الحقيقيون نزع عنا خصوصيتنا وتميزنا فى المنطقه بل وحملنا كل مصائبها لذلك حبي لمصر يمنعنى من التعاطف مع عنيه السود ورموشه المحكله ونواياه الخفيه انا اعرف شئ واحد هو الحقائق والتاريخ اللى بكل المقاييس لا يجعلنى سوي ان اكره البكباشي ناصر

مروة الزارع said...

تحفة يا مادو

صحيح جالى تشنج عصبى وعاوزة اكل 20 سندوتش عشان اهدى

بس بصراحة انت مش ممكن تحفة

اسفة انى بتأخر غصبن عنى والله

EGYPT EYES said...

أتفق معك في موضوع فوز المنتخب أما بالنسبه لممتاز وأصدقائه من القططه فهذا ليس غريب عليهم فهم عبيد السلطه والسلطان

monaliza said...

تعليقى على المشهد الاول هو يمكن ان مصر ماعملتش حاجة تفرح من يوم نصر اكتوبر حتى الكرة اللى فرحوا بيها شوية والموضوع هيتنسى وبرضه مش هيفضل غير نصر اكتوبر فياريت نعمل حاجة قريب تفرح الشعب المصرى غير الكرة وعايزة اسأل ياترى لو الأسعار نزلت وبقت فى متداول الجميع وبالذات معدومى
الدخل فرحة الشعب هتكون ازاى

mado80 said...

gannah

شكرا علي تعليقك و ومجاملتك الرقيقه

والف شكر علي تشريفك ليا بالزياره

تحياتي

mado80 said...

عروبه

ازيك

لا ادري متي نفيق ومتي نفرح لأنتصار حقيقي بين كل الأنتصارات الزائفه التي نحققها
ولكني علي الرغم من ذلك أشعر أن هناك أمل

تحياتي لكي

mado80 said...

فضفضه

ازيك

ايوه والله كان لازم افضفض وابعبع واقول كل اللي في نفسي غير كده كان الواحد طق
مش أحسن برضه ان الواحد يفضفض

تحياتي ليكي وألف شكر لتشريفك لي بالزياره التي أتمني ألا تنقطع

mado80 said...

روري

ازيك

ببقي سعيد جدا لما بشوف تعليقك
وعندك حق في كل اللي قلتيه

تحياتي لكي والف تقدير لشخصك الكريم

mado80 said...

أحمد الجيزاوي

ازيك يا راجل والله ليك وحشه كبيره أوي يا أحمد أنا نفسي اشوفك بجد والله

انت بقالك كتير مش بتفتح الأميل ليه يا أبو حميد.... أتمني تكون بخير يارب

تحياتي ليك يا أحمد وألف تقدير لشخصك الكريم

mado80 said...

حنين

ازيك

أنا متفق معاكي تماما أن احنا مش لازم نسكت ولازم اللي يشوف حاجه يتكلم كفيانه سكوت بقي

تحياتي ليكي يا حنين وألف تقدير لشخصك الكريم

mado80 said...

eman eltaher
ازيك عامله ايه ... يارب تكوني بخير

كويس ان احنا متفقين

وكويس أوي انك طمنطيني علي الأبراج انا كنت قلقان أوي عليهم
ههههههههههه

بس علي فكره انا كنت بهزر معاكي لما قلت أن الأبراج اتنسفت أنا عارف ان أبراجك بخير الحمد لله ربنا يديم عليكي الصحه والعافيه وتمتعينا دايما بالبوستات الرائعه
:) :)

تحياتي ليكي يا أيمان وألف تقدير لشخصك الكريم

mado80 said...

نوسه

معلش يا نوسه عارف انه بوست طويـــــل بس هاعمل ايه بس في حرقه الدم

كويس أوي انك مش بتقري جرايد مش ناقصه حرقه دم صحيح

تحياتي ليكي يا نوسه وألف تقدير لشخصك الكريم

mado80 said...

شريف طلال
ازيك

سعيد بتشريفك ليا بالزياره وأتمني انها تكون بدايه لتواصل بيننا

صحيح يا شريف أنا بسأل نفس السؤال لو شهداء أكتوبر عرفه ان أحنا بنصدر غاز لأسرائيل ها يعمله ايه

حسبي الله ونعم الوكيل

تحياتي ليك يا شريف وألف تقدير لشخصك الكريم

mado80 said...

عاشقه الوطن

ازيك يا رضوي

أنا عارف اني مقصر في حقك كتير والله معلش كنت مشغول شويه انا أسف جدا جدا

تحياتي ليكي يا رضوي والف تقدير لشخصك الكريم

بتنوريني يا رضوي والله

mado80 said...

emy

ازيك

شرفتيني بالزياره بجد وشكرا علي المجامله الرقيقه

أنا فرحان أوي انك بتحبي عبد الناصر زيي

تحياتي ليكي وألف تقدير لشخصك الكريم

mado80 said...

نسرين بسيوني

ازيك يا نسرين

ليكي وحشـــــه كبيـــــره اوي

عارف انك مشغوله علي الأخر ربنا يوفقك يارب

كويس انك متفقه معايا في موضوع المبالغه وتضخيم أمور لا يجب أن تضخم

بالنسبه لموضوع الغاز طبعا أن معترض تماما أن الغاز يصدر لأسرائيل مش عاوزيين ننسي انها دوله محتله وعدوه بس لو تغاضينا عن ده وقلنا ان أحنا نصدر الغاز لأسرائيل

هنلاقي ان الحكومه صدرت الغاز لأسرائيل بأقل من أسعاره العالميه يعني موت وخراب ديار طبعا ده في اهدار لملايين الجنيهات اللي أولي بيها مصر وشعبها

بالنسبه للصحف اليوميه كويس أوي انك مش بتابعي الصحف القوميه اللي بتجيب نخلف عقلي بس هو الواحد مضطر في الحقيقه في قراءه صحف زي دي

نيجي بقي للمهم وهو موضوع عبد الناصر
أنا ما أنكرتش يا نسرين ان عبد الناصر ليه أخطاء بس لما نيجي نحكم علي فتره حكم لازم نحكم عليها كلها
فلو بصينا لفتره حكم عبد الناصر هنلاقيها فيها عيوب وفيها مميزات كتيره أوي وفي أعتقادي أن مميزاتها أكتر بكتير من سلبياتها

بصي بقي يا نسرين أن يمكن قلت ده في الرساله اللي بعتها علي الفيس بوك

انتي تكرهي عبد الناصر أنا أحبه المهم أن احنا نحترم رأي كل واحد فيه

وانا زي ما قلتلك بحترم رأيك لأنه رأي جدير بالأحترام

علي فكره يا نسرين ببقي سعيد أوي بالمناقشه معاكي
تعرفي ليه علشان انتي مش بتعرفي تجاملي وجريئه أوي في أرائك

تحياتي ليكي يا نسرين وألف تقدير لشخصك الكريم

mado80 said...

مروه الزارع

ازيك يا مـــــروه انتي فيــــن من زمـــــان

معلش يا مروه لو أنا السبب في التشنج العصبي ده

بس كويس ان التشنج عندك بخليكي تاكلي أنا التشنج بيسد نفسي وبيحرق دمي عافانا الله جميعا من حرقه الدم والتشنج العصبي

تحياتي ليكي يا مروه والف تقدير لشخصك الكريم

mado80 said...

egypt eyes

الف شكر علي مرورك الكريم وسعيد أن احنا متفقين في أراءنا

تحياتي ليك والف تقدير لشخصك الكريم

mado80 said...

monaliza
ازيك

أشكرك كثيرا علي تشريفك ليا بالزياره التي أتمني أن تتكرر وان تكون بدايه لتواصل

أعتقد الأن ان فرحه الناس بهبوط الأسعار وهبوط مستوي الغلاء سوف تكون فرحه عارمه تفوق فرحه نصر غانا

تحياتي ليكي وألف شكر علي تشريفك لي بالزياره مره أخري

maii bahaa said...

فينك يا ماجد
مش بتكتب ليه؟
:(

paranoia,magnetic & dramatic girl said...

يارب تكون ياماجد بخير
انا لسه راجعة امبارح من السفر
وشفت سؤالك عني يارب يكرمك
مش هعرف اشكرك ازاي
شكرا ياماجد
..
بوستك الاخير حلو اوي
انا معاك ان نصر راكتور مينفعش نقارنه بأي نصر
تصدير الغاز المصري لاسرائيل انا ضده من الاول وكان نفسي صوتنا يوصل للمسؤولين ويمنعوا التصدير لكن محدش طبعا بيسمع لنا
..
موفق دايما يامادو
دودو

نوسه said...

انت مكتبتش حاجه جديده من يوم 18 فبراير خد بالك
كده عندك مخالفه وغرراامه :)

mado80 said...

مي بهاء

معلش يا مي كنت مشغول أوي

ألف شكر علي سؤالك

mado80 said...

دعــــــــــــــاء

ازيك

ليكي وحشه كبيره أوي يا دعاء

كنت مفتقد طلتك عليا والله العظيم ..الحمد لله انك رجعتي بالسلامه

شكرا علي تعليقك علي البوست وكويس أوي ان أحنا متفقين

تحياتي ليكي يا دعاء وألف تقدير لشخصك الكريم

mado80 said...

نوووووسه

ازيك

معلش يا نوسه كنت مشغول شويه...بس أنا مستعد لدفع الغرامه هههههههههه

ألف شكر علي سؤالك يا نـــــــــوسه

lazare said...

Warm welcome to Alnemat TheGrace Arabic Christian Internet Magazine, We love you! Please visit us at:

In TheGrace opportunity to meet Jesus the Savior / في النعمة فرصة للقاء المُخلِّص يسوع المسيح
http://www.TheGrace.net

Salvation pardon peace life certitude mercy in Jesus / خلاص غفران سلام حياة يقين رحمة في المسيح
http://www.TheGrace.org

Arabic Christian Magazine The Grace offering the Arabic Bible / النعمة تقدم الإنجيل الكتاب المقدس
http://www.TheGrace.com

نتمنى لكم الفرح والسلام والمحبة لأن السلام افضل من الحرب والمحبة افضل من الكراهية كما ان النور أفضل من الظلمة
سلام لكم في محبة الله.نتأمل زياراتكم الكريمة لموقع النعمة موقع مجلة النعمة يقدم كلمة الله الكتاب المقدس الإنجيل رسالة السيد يسوع المسيح قراءات مختارة مواضيع مصيرية قصص واقعية شهادات شخصية ترانيم ممتازة ردود مؤكدة كتب بنّاءة رسوم تسالي تأملات يوميات
Bible audio Read search in Arabic Studys Stories Testimonies Hymns and Poems Answers Books Links Daily devotions Acappella Music Graphics /
Alnemat Journal Arabe Chrétien La Grâce la Revue Arabe sur Internet offre La Sainte Bible Al-Injil L’Evangile de Jésus Christ gratuit, Bienvenue a La Grâce.