Tuesday, March 18, 2008

لا تعليق



عشره مصريين سقطوا في ساحه العراك من أجل الخبز..الرقم ذكرته الأهرام في يوم13/3 في حين قال تقرير الجزيره المصور في اليوم السابق أنهم 15..الدكتور أحمد جويلي أمين مجلس الوحده الأقتصاديه وزير التموين الأسبق قال انهم لو كانوا واحدا فقط فهي كارثه


امرأه مسنه وقفت أمام جمع من أعضاء مجلس الشعب وقالت لهم أنها وأسرتها لم يذوقوا طعم اللحم من ثلاثه أشهر






لقد قال لي أحد الوزراء المخضرمين ، ان الرئيس جمال عبد الناصر كان يقول في اجتماعات مجلس الوزراء ان هناك سلعا اذا نقصت في الأسواق يوما ما فينبغي ألا يذهب الوزير المختص الي مكتبه في اليوم التالي وحدد هذه السلع بخمس هي :الخبز والقمح والفول والعدس والسكر -ما رأيكم دام فضلكم؟




من مقال الأستاذ الكبير فهمي هويدي (استحقاقات اللحظه الحرجه) الأهرام ....الثلاثاء18/3/2008


لا تعليق سوي أنه كان في زمن مضي رئيس يشعر بالفقراء وآلامهم أين هذا الرئيس الأن


حسبي الله ونعم الوكيل فيك يا مبارك فكل هؤلاء الضحايا في رقبتك

24 comments:

مصطفى محمد said...

سلامو عليكو

مادو
العزيز

المواطن المصري .. حقا .. معجزة

الرواتب تحفر أنفاقا في الأرض من الانحدار .. و الغلاء يلتهم كل السلع و الخدمات .. و أسعار العملة الأجنبية المتحكمة في الاقتصاد المصري متذبذبة .. و أسعار الكيف و الدخان هي الأخري يهددها الارتفاع (القهوة كمثل .. مش شرط حاجة وحشة) .. كل هذا و المواطن المصري صاااااامد

المشكلة ان كل زمن له معطياته .. المشكلة الأكبر ان القيادة لابد أن تدرك ده .. لابد أن تلم خيوط اللعبة صح .. يعني مثلا ازاي المؤشرات الاقتصادية اللي تحت عين نظيف كل يوم في ازدياد .. فين تأثير الكلام ده على الشارع .. فين الراحة الاقتصادية .. الراحة الأهم .. الناس الآن في صراع محموم على القرش .. جلبه من مساراته الصحيحة .. و اقتناصه من تجارة الي جانب العمل .. و اختلاسه من أي مسار آخر .. حتي بات المواطن اذا وجد عمل جاموسة مربوطة في ساقية عمال يلف يلف .. محتاج حد يجيبله البرسيم لحد عنده عشان حتي ياكل و لو حب ولا مؤاخذة ينزل حينزل في الدوران و هو ماشي .. البني آدم في طريقه الي هذا الاتجه .. تتخيل؟

رغيف العيش ده بقي الأعجوبة
تصدق بالله العظيم .. انا من يومين كنت في ميكروباص و واحدة جنبي بتحكي انها جابت رغيف عيش عارف بكام؟
اضرب سعر كده
جنيه
و يا ريته عيش ملوكي
أبدا .. ده أكدت انه فايض جيش و بايت و بنمله .. و بجنيه الرغيف.. أي بلد هذه التي تسير الي الآن بمثل هذه الظروف
احنا فعلا مالناش غير ربنا رسمييييي

بس انا عايز بجد أدعو الناس كلها تصلح من نفسها ,و عشان نبقي عملنا اللي علينا .. و اللي كويس يحسن نفسه .. أرجوكم

تحياتي

Nsreen Bsunee said...

حسبنا الله ونعم الوكيل
مع اعتراضي على ذكر عبدالناصر لانه اصل البلاء اللى احنا فيه دلوقتى ومبارك ما هو الا امتداد لعبدالناصر اللى لو كان فضل لغايه دلوقتى كان بقي حالنا اسوأ الف مره من غزه

ما علينا
فى اعتقادى انه السنه ديه حتشهد ثوره فى مصر
مش ثوره اخوان
ولا ثوره حقوقيين
ولا ثوره اشتراكيين

ثوره جياع
جياااااااااااااااااع
عارف يعني ايه بلد زى مصر يبقي فيها ثوره جياع يعني حنسقط من التاريخ لتعاد كتابتنا على اننا جياع متخلفيين رجعيين حفاه عاطلين

واحنا نستاهل لاننا سكتنا سكتنا واستخبينا جوا الحيط وخفنا لغايه ما جعنا
:(
:(
:(
:(
:(
:(

أحمد منتصر said...

آآآآآآآآآآآآآدي آخرة الرأسمالية ذات التطبيق الفهلوي المصري

لا تعليق على رأيك

تحياتي

only spot said...

مادو
تحياتى وسلم قلمك واوافق كل ما كتبت سوى اخر سطر وللعلم لست ضد احد على حساب احد ولكن منذ متى وهو يدافع عن حق الفقراء للاسف لم ياتى احد وجلس على الكرسى وفكر يوم فى الفقراء
خمس وعشرين سنه وهو يتحدث عن محدودى الدخل الى ان صفاهم وجعلهم مع عديمى الدخل والباقيه تاتى
الفقراء يا سيدى سلعه يتاجر بها كل من يجلس الكرسى كى يدافع بها عن بقائه وكارت يشبه الولد فى الكوتشينه ولكن تلك المره حرق الكارت واصبح عديم القيمه
تحياتى

انين الحزن said...

مادو ازيك
انا معاك في الكلمه الاخيرة دي

حسبي الله ونعم الوكيل فيهم كلهم


سلاموووووووووووز
وزة

النجمة الصامدة said...

كثيرا ما راودني هذا المشهد

مشهد سؤال كل رئيس عن هذه الجموع التي كانت في رقبته

؟؟؟؟؟؟؟؟

إنه حقا لموقف عسير

paranoia,magnetic & dramatic girl said...

صباح الفراولة ياماجد
...
انا لسه سامعة ان هيقننوا شرا العيش وهيخلوا كل واحد يجيب بجنيه بس
..
وسمعت حاجة افظع واحد راح يجيب عيش لقي الفرن زحمة
راح مشي
روح بيته عمل مكرونة تقريبا وحط فيها سم ماتوا عياله وعاش هو ومراته
هههههه
مأساة وحياة ربنا
هم يضحك وهم يبكي
..
قول جمال عبد الناصر ده اكثر من رائع انا اول مرة اعرفه
...
مبارك سلمنا للهلاك اساسا
ليه رؤسائنا مش بيعملوا زي الخلفاء الراشدين ليه عمر بن الخطاب ميبقاش قدوة في القيادة
الناس دي ماتت معدمة لان مالها كان لاهل البلد
..
حسبي الله
..
ماجد بوستك رائع والله
عارف ياماجد بيعجبني في بوستاتك ايش
اولا طبعا انها هادفة
بس الاهم من كل ده انها سريعة وبتدخل علطول في الموضوع بدون تطويل وبتأدي هدفها
..
ربنا يكرمك ياماجد
الله حافظ
دودو

Zika said...

بارضه هتقولي تاني جمال عبد الناصر
...
المهم
احمد نظيف بيه بيقول ان نسبة الغلاء بتزيد سنويا 3% ونحن نعمل علي ان نخفضها الي 1.50% ولولا اني محترم وفي بلوج محترم كنت قلت كلام مش محترم .
تحياتي ليك يا مادو.بس بالله عليك ياريت تشيل من دماغك موضوع عبدالناصر ده

appy said...

ههههههههههه هيحلوها التعليق عندى فىالبوست الجديد بس يا رب تطبق

ده فى موضوع العيش اما الباقى انا مالى يا خويا انا مليش فى الباميا انت عارف هههههههههههههه

haneen said...

ازيك يا مادو

ياترى هنشوف فى الراجل دا يوم قبل اما نموت احنا واضح انه هيموت الشعب كله وهو هيفضل قاعد على تلها بعد ما يخربها هما الناس دى ما بيموتوش ليه الا عمرنا ما سمعنا عن رئيس مات موتة ربنا الا كلهم بيتقتلوا وبيتسمموا حتى كل الحاشيه بتاعته اللى ما سمعنا عن حد بيعيا ولا بيجيلوا انفلونزا الطيور ولا شلل معيز حتى . من الاته المحلوله اللى عايشين فيها يابا يبقى هيجيلهم المرض منين بيكلوا احسن اكل ويشربوا احسن شرب احنا بس اللى بيجيلنا كل البلاوى .. ربنا ينتقم منهم وياخدهم جميعاً أخذ عزيز مقتدر ويجيلهم شوطة فراخ قادر يا كريم

سلام يا جميل

عاشقة الوطن said...

السلام عليكم

ازيك ياماجد
عارفة انى مقصرة جدا فى زيارة مدوتنك والمدونات التتانية بس مشغولة فى الكلية والمحاضرات دعواتك بقي اخر سنة

بالنسبة لرغيف العيش اللى فيه ناس راحت ضحيته
وناس تانية فقدت عنيها وهى بتجيب العيش

حسبي الله ونعم لاوكيل
بيتهيألى ان الشعب لو عمل انقلاب مش هيبقي عيب ولا غلط ولا خرج عن الصح

سيبك بقي من رغيف العيش وندخل فى موضوع تانى

اكيد عرفت بوضوع حملة حماية للاستاذ عمرو خالد
الحملة ديه عاشن ننقذ شبابنا وبناتنا من خطر المخدرات اللى ممكن نقع فيه
ياريت نقدر بقدر الامكان ننشر الحملة ديه ونساعد فى انقاذ روح بشرية واحدة ربنا هيحاسبنا على كل اللى ماتوا وضاعوزا واحنا واقفين نتفرج عليهم
ياريت نقدر نعمل اى حاجة كنوع من التوعية عن الحملة وعن الحماية ضد المخدرات
لو حتى اتكلمنا مع اصدقائنا اللى بدأوا بالسجاير
دلوقتى سجاير وشوية وهتقلب مخدرات
ممكن نتكلم معاهم بطريقة سهلة وجميلة نخليهم يحبونا ويسمعونا وهما اللى يحبوا يسمعونا ويمشوا معانا فى طريق الصح

ياريت نتكلم معاهم بحب وبطريقة صح عاشن نكسبهم وناخد بايديهم للصح ونبعد بيهم عن طريق الغلط

ياريت نقدر نحافظ على نفسنا وعلى اخواتنا وصحابنا والعالم العربي كله ونكون بنى آدمين صح

شكرا ياماجد

mado80 said...

مصطفي محمد

وعليكم السلام يا درش

أنت بتقول فيها طبعا المواطن المصري معجزه


اللي يتحمل كل اللي احنا شايفينه ده ويصبر يبقي اكيد معجزه

اللي يشوف كل اللي بيحصل ده ويسكت ولا يتحرك يبقي أكيد برضه معجزه.. حاجه تجنن بجد

صحيح رئيس الوزراء بيقول كل شويه معدل التنميه ومعدل النمو وكلام كده ماليش فيه فين بقي ده صحيح علي الناس الغلابه فين

بالنسبه للرغيف أبو جنيه ده انا كان أخر علمي أنه وصل ل75 انما جنيه يا نهار اسود ده برضه ان دل علي شئ فبيدل علي اي قيمه وصلها الجنيه

ايوه طبعا لازم نحسن ونظبط نفسنا شويه بجد انا معاك في دعوتك دي بس ده ما يمنعش برضه أنه في طريقنا لتغير النفس للأحسن ان أحنا نتحرك ونتعترض ونحتج لما نشوف حاجه غلط صح ولا ايه

تحياتي ليك يا مصطفي وألف تقدير لشخصك الكريم

واسف علي تأخري في الرد

mado80 said...

نسرين

ازيك

مع أعتراضي علي أعتراضك لذكر عبد الناصر
:)

الا اني شايف أن مبارك امتداد للسادات وليس عبد الناصر كل سياسات مبارك امتداد لسياسات السادات

ومع كل تقدير للسادات طبعا لأن مبارك اكثر غباءا بالفعل

بالنسبه للثوره فده أنا شايفه قريب أوي وان شاء مش هانطلع من التاريخ ولا حاجه وحتي لو ده حصل فمصر قادره علي تحقيق المعجزات لو شاءت ذلك

ألف تحيه ليكي يا نسرين بتنوريني جدا جدا

وأسف علي تاخري في الرد

mado80 said...

احمد منتصر

طبعا ده لو سمينا اللي أحنا بنطبقه في مصر ده رأسماليه اساسا

تحياتي ليك يا بوب

واسف علي تأخري في الرد

mado80 said...

only spot

صحيح 25 سنه كلام عن محدودي الدخل الي أن أنقرضوا اساسا

من كتر ما تكلم مبارك عن محدودي الدخل فقدت الكلمه قيمتها بالفعل

تحياتي لكي وأسف علي تاخري في الرد

mado80 said...

وزه

ازيك

فعلا حسبي الله ونعم الوكيل


تحياتي ليكي يا وزه بتنوريني والله

واسف علي تاخري في الرد

mado80 said...

النجمه الصامده

صحيح موقف عسير بس تفتكر بيجي علي بالهم أساسا

تحياتي لكي

واسف علي تأخري في الرد

mado80 said...

دعـــــــــاء

صباح الفل عليكي

المنتحرين من أجل لقمه العيش كتير أوي في عصر مبارك ما تعديش

ايوه قول عبد الناصر برضه أنا أول مره أعرفه من مقال أستاذ فهمي هويدي وبيدل أنه كان عظيما بالفعل

لأ يا دعاء خلفاء راشدين ايه ده تلاقي مبارك ما يعرفش مين هما الخلفاء الراشدين أصلا علشان يعمل زي الخليفه العادل عمر بن الخطاب

ربنا يخليكي يا دعـــاء علي رأيك في بوستاتي ويارب دايما أفضل عند حسن ظنك

ألف تحيه ليكي والف تقدير

اسف بجد يا دعاء علي تأخري في الرد

mado80 said...

زيكا

ايوه يا عم هاقول جمال عبد الناصر تاني
وتالت
ومليون
ههههههههههههه

ان كان عاجب بقي

ههههههههههههههههه

أنا مش عارف أن مش بتحبه ليه بصراحه يلا ياعم براحتك انا مالي أنت الخسران

بالنسبه بقي لأ حمد نظيف فأنت تقول اللي في نفسك فيه يا زيكا قول زي ما أنت عاوز يا مان هنا ما فيش أي رقابه :)

تحياتي ليك يا زيكا ودايما منور المدونه بتعليقاتك الجميله

واسف علي تأخري في الرد

mado80 said...

آبي

ازيك

طيب فكرك يعني لو حلوا مشكله العيش الناس هاتاكل العيش حاف ولا ايه

:) :)

ده مصر مليانه بلاوي يا آبي

أنا برضه ماليش في الباميا ولا بحب اكلها حتي هههههههههه

تحياتي ليكي يا أبي والف تقدير لشخصك الكريم

وأسف يا آبي علي تاخري في الرد

معلش الطابور في الفرنه اللي بجيب منها العيش كان طويل أوي هههههههههه

mado80 said...

حنين

ازيك عامله ايه

صحيح الراجل ده ناوي يخلص علي الشعب كله ده داخل للشعب تحدي وكأنه بيقول للشعب لأنا يا أنتو

ربنا ياخدوا يارب هو وكل اللي حواليه آمين

دايما منوراني يا حنين

واسف جدا علي تأخري في الرد

mado80 said...

عاشقه الوطن

ازيك يا رضوي عامله ايه

عارف والله أنك مشغوله في الدراسه ربنا معاكي وشدي حيلك

طبعا حسبي الله ونعم الوكيل فيهم


بالنسبه لحمله عمرو خالد ضد المخدرات فبجد حمله هايله أوي لازم الكل يقف وراها

انا عن نفسي بحاول اكلم أي حد أعرفه عن خطوره المخدرات وخصوصا الحشيش اللي أنتشر أوي بين الشباب

كمان أحنا بنحاول دلوقتي ننشر البوست بتاع الحمله وربنا يوفق الجميع يارب

تحياتي ليكي يا رضوي ومنوراني دايما
أسف علي تأخري في الرد

f four a said...

الناس تموت لو ماكلتش عيش....وتموت عشان تجيب رغيف العيش

mado80 said...

f four a

ازيك

صحيح ماهو ده من المساخر اللي بنشوفها في مصر

الناس بتموت لو ما كلتش عيش وبتموت علشان تجيب العيش

صحيح حاجه مسخره بجد

تحياتي ليكي والف شكر علي تعليقك الجميل