فاكره لما كنتي بتسهري معايا ونقعد نستني صوت الكروان في عز الليل .....
كنتي بتقولي أنه بيقول الملك لك لك يا صاحب الملك ... ومكنتش مقتنع
كنت بقلك ده مجرد صوت جميل
مش عارف ليه مكنتش مقتنع يمكن بعاند ... طول عمري عندي ومتمرد
بس علشان ما أزعلكيش كنت بقلك خلاص بيقول كده
تصدقي بقالي كتير أوي ما سمعتش صوت الكروان ... مشتاق لصوته أوي
تعرفي كمان مشتاق لأيه
مشتاق للمسه أيديكي
مشتاق أسمع منك كلمه بحبك
مشتاق وبتمني يجي يوم ونسهر تاني مع بعض
ونسمع صوت الكروان ... بس تعرفي ما عنتش هعاند معاكي
لأني خلاص صدقت أوي أنه كان بيقول ... الملك لك لك يا صاحب الملك
15 comments:
سلام عليكم
بجد حلو اوى البوست وكلماتك سهله بس معبره جدا
عارف انا لما بسمع صوت الكروان بردد اشكو لك لك يا صاحب الملك وبحس انه بيقولها معايا
لو كانت محبوبه يبقى ربنا يرجعكم لبعض ولو شخص قريب والفراق هو الموت يبقى ربنا يرحمها اما بما انى فضوليه وكان خيال شاعر يبقى اهنيك على احساسك الصادق
تحياتى
ماجد
يارب تكون زين
...
ماجد اقلك حاجة انا حاسة انك بتحكي عني اقصد كأنك عرفت مشاعري تجاه الكروان وكتبت عنها
سبحان الله مفيش انسان مش بيحب الكروان ولو في حد مش بيحبه ااعتقد يبقي كائن فضائي متنكر في صورة انسان
..
انا من زمان ارتبط اسمي بالكروان
لان اسمي دعاء فالكل كان يقلي دعاء الكروان
وهنادي علي رواية طه حسين يعني
لما كبرت ارتبط الكروان ويايا بذكري حلوة شاركني فيها انسان غالي عندي
وكل لما اسمع صوت الكروان قلبي ينتبه وادور عليه لكن عمري ماشفته
بس دورت عليه في النت وشفته
عسوووووووول اوييييييييي
...
كل الطيور بتسبح ربنا مش بس الكروان انا واثقة ان كل طير له الدعاء الخاص به
..
مااااااااااااااجد
كلامك والله جميل اوي وكالعادة وهفضل اقلهالك علطول بسيط ومعبر بيوصل للهدف بسرعة
...
الفراق كلنا بنخاف منه بس ساعات بيكون رحمة من ربنا
لو فارقك حد وفي رجوعه خير لكما يبقي ندعي ونقول يارب يرجع والعكس
....
اشكرك جدا ياماجد انك خلتني احس المشاعر دي
...
دودو
أن شاء الله ربنا يعوضك و ترجع سعيد تانى
ليه كده دايما غاوى قلق الناس عليك
ربنا يرجعك بالسلامه للى فى بالك
الأخ العندي المتمرد
ايه الرومانسية دي كلها؟
طب لو بتحب ...كلمها
وبلاش عند
;)
only spot
وعليكم السلام ورحمه الله وبركاته
ربنا يخليكي علي كلماتك الجميله المشجعه
مش عارف أقلك أيه صراحه ... ألف شكر
تحياتي ليكي وألف تقدير لشخصك الكريم
دعـــــاء
العزيزه
أنا فرحان أوي وحياه ربنا أن البوست عجبك وكمان فرحان علشان أنتي بتحبي صوت الكروان زيي بالظبط
تعرفي يا دعاء بحس انه صوت ملاك مش طير وخصوصا أن صوته بسمعه دايما باليل في أوقات روحانيه جدا
صحيح تعرفي أنا برضه لما عرفت أن أسمك دعاء فكري راح علي طول علي أسم روايه طه حسين الشهيره دعاء الكروان
أسمك جميل علي فكره يا دودو يمكن أول مره أقلهالك
شكرا أوي ان كلامي عجبك ومبسوط أوي انه قدر يوصلك للمشاعر الجميله دي
تحياتي ليكي يا دودو وألف تقدير لشخصك الكريم
شريف طلال
ربنا يخليك يا شريف
شكرا لزيارتك الدائمه منورني دايما والله
تحياتي ليك
آبي
الجميله
معلش والله يا آبي مش قصدي
أسف لو كنت سببتلك أي قلق يا جميل
:) :)
تحياتي ليكي يا آبي وألف تقدير لشخصك الكريم منوراني دايما يا آبي
مي بهاء
الرائعه
ازيك يا مي أنتي فين من بدري
والله وحشاني تعليقاتك كتير
هاكلمها يا مي خلاص أنا معنتش عندي ولا متمرد خالص
؛)
تحياتي ليكي يا مي والف تقدير لشخصك الكريم
سلامو عليكو
انا جيت متأخر معلش .. الدنيا بقه
ايه يا عم الكلمات القصيرة الجامدة دي .. باموت في الكلمات اللي بتختزل مشاعر كتييييييييييير .. انا مش حقولك حلو البوست .. انا حقولك مبروك .. خصوصا برضه آخر جملة .. وصلتني لاحساس حلو
:)
مصطفي محمد
الموهوب
لا يا مصطفي ولا متأخر ولا حاجه أنت تيجي في أي وقت يا باشا
تعرف بحس أنك اكتر واحد بتفهم كلامي يا مصطفي حسيت من كلمه (مبروك) اللي أنت قلتها الله يبارك فيك يا مصطفي
:) :)
تحياتي ليك يا مصطفي وألف تقدير لشخصك الكريم
قريت فى اليلوج بتاعك كتير اوى
كل مره اقرا يعجبى دماغك قبل الكلام المكتوب
وكل ما اقرا بوست معرفش اعلق
!!!
ربنا يوفقك
اللى خلانى افتح واعلق دلوقتى انى كنت فى ظروف مش لطيفه
امبارح وسمعت صوت الكروان وافتكرت البوست يتاعك
dodda
في الأول يا ألف مرحب بيكي في أول زياره ليا وأتمني بجد ما تكونش الأخيره
مش عارف بصراحه أقلك إيه علي زوقك بس بجد ألف شكر
علي فكره أنا أول ما شفت اللينك بتاع مدونتك عند مي بهاء دخلت وقريت حجات عندك بس برضه والله الفتره اللي فاتت دي ما كانش في فرصه إني أسيب تعليق عند حد خالص لأني كنت مطحون جدا
إن شاء الله هاجي عندك قريب جدا لأن أسلوبك بجد جميل أوي
تحياتي ليكي وألف تقدير لشخصك الكريم
السلام عليكم جميعا
بص بقي يا مادو انا داخله قاصده البوست ده انا تقريبا قريته من كام يوم بس مش عارفه ليه معلق معايا اوي كده يمكن لانه بجد والله رهيب ملوش حل
الي الامام
Post a Comment