Wednesday, April 30, 2008

إعتذار وشكر وأشياء أخري



يـــــــــاه أخيرا الواحد قدر يشم نفسه بعد أيام من المعاناه الحقيقيه
وكأني بالظبط كنت في دوامه
وكان بيتهيألي إني مش هاقدر أخرج منها
الحمد لله بجد علي كل شئ
بعتذر طبعا علي تقصيري في حق الأصدقاء من المدونين بس بجد ما كانش في فرصه أبدا إني أخش عند أي حد مع إني كنت بعدي علي الطاير كده علي بعض المدونات القريبه من قلبي بس ما كنتش بقدر أسيب أي تعليق
كمان بجد بشكر أي حد سأل عليا في الفتره اللي فاتت دي و بصراحه بشعر بكثير من الإمتنان لكل واحد سأل عليا وحاول يعرف إيه أخباري

بشكر جدا جدا الجميله نسرين بسيوني الإسكندرانيه الجدعه أوي

جدا جدا علي سؤالها الطيب only spotبشكر شيماء
بشكر مصطفي محمد الموهوب
طبعا مش هاقدر أنسي مي بهاء الرائعه اللي أهدتني أول تاج ليا في عالم التدوين

بجد شكرا أوي بصراحه حتي الشكر شايف إنه قليل أوي


*********************************

أشياء أخري


**********


طبعا أنا جاي وفيه حجات كتير أوي عندي عاوز أقلها وبصراحه معبي كتير جدا

بس فيه موضوعين مهمين أوي عاوز أتكلم فيهم مع إنهم يعتبروا قدام شويه


الموضوع الأول موضوع


إلقاء القبض علي إسراء عبد الفتاح اللي إتهمتها الحكومه بإنها المحرك الرئيسي

للدعوه لإضراب السادس من إبريل

طبعا هي تم الإفراج عنها الحمد لله بس أنا شايف إن مجرد إعتقال فتاه

وهو الإعتقال الأول لفتاه من 26 سنه معناه إن النظام خلاص فقد السيطره علي نفسه

وبدأ يترنح وشايف إن إنهياره بقت مسأله وقت مش أكتر

علي فكره أنا هارجع للموضوع ده تاني لأن إعتقال إسراء

بيدل علي خسه ونداله هذا النظام المتعفن


***********************

الموضوع التاني بقي هو موضوع التقسيمات الإداريه الأخيره اللي عملتها الحكومه

واللي كانت نتيجتها إنشاء محافظتين جداد لانج

في الأول قالوا إن التقسيم ده كانت نتيجه دراسات إستغرقت 10 سنوات

فرحت جدا لما سمعت ده وقلت والله مصر بقت تمشي بخطط مستقبليه أكيد التقسيم ده هايكون فتحه خير علي مصر

مع إني ما كنتش مقتنع أساسا بالتقسيم ده إلا إني كنت بحاول أقنع نفسي وأقول يا واد دي 10 سنين دراسه

أكيد هما شايفين صح حتي لو كانت محافظه حلوان بتضم مدن بدر والشروق والقاهره الجديده أكيد هما شايفين الأصلح

لكن للأسف طلع فرحي بالتقسيم الإداري فرحه الخيبه والسخام علي راس حكومتنا النظيفه جدا

وطلعت التقسيمات الإداريه تقسيمات مهلبيه من غير دراسه ولا يحزنون

والدليل علي كده الفضايح اللي سمعنا بيها بعد كده ليس أقلها طبعا موضوع مكان المحكمه الدستوريه العليا
اللي المفروض بنص الدستور إنها تكون في القاهره فأصبحت في التقسيمات الأخيره تبع حلوان

ودي طبعا مشكله دستوريه عويصه جدا فده معناه إن إنعقاد المحكمه الدستوريه القادم في 4 مايو غير دستوري

طبعا مسخره بس الطريف اللي قريته في مدونه الجيزاوي إن محافظه الجيزه أصبحت بلا عيد قومي

لأن العيد القومي لمحافظه الجيزه كان علشان صمود قريه من قري الجيزه أمام الإحتلال الإنجليزي

القريه دي دلوقت بقت تبع محافظه تانيه

وسلملي طبعا علي الدراسات المهلبيه والأرانب بالملوخيه والرز بالشعريه

يلا كفايه إزعاج كده معلش بقي أنا قلت من الأول إني جاي ومعبي كتيرأوي






19 comments:

مصطفى محمد said...

سلامو عليكوو

مادو
العزيز

ألف مليون حمد الله على السلامة بجد .. النت من غير بوستاتك و الله العظيم ناقص .. و ألف سلامة على والدك

بالنسبة لاسراء .. انا قلبي انقيض لما عرفت انهم مسكوها .. انا معرفهاش بس انا عارف ان ورا الشمس مكان مش كويس .. لكن الحمد لله نوارة قالت على البلوج عندها ان كله تمام

بالنسبة لتقسيم المحافظات .. فانا فعلا مش فاهم ايه المهلبية اللي حصلت دي .. ده كأنهم قصقصوا محافظة القاهرة من الأول و من الآخر .. طب يعني هما عارفين يمشوا 26 محافظة بمسؤليتها و أعباءها عشان يخلوها 28 .. يعني كده زاد عدد المسئولين في البلد اتنين كمان .. هي البلد ناقصة

ننتظر ازعاجكم/بوستكم القادم بفارغ الصبر

:)
حمد الله على السلامة

dodda said...

يا عينى يابنى
انت متاخدش فى نفسك اوى كده
الزعل مش حيفيد
وحديدعلى حديد
يفعل الله ما يريد
(من بتاع الفيتامين مش بتاع عز اللعين)

mado80 said...

مصطفي

الموهوب

الله يسلمك يا مصطفي وشكرا علي سؤالك يا درش مش عارف أشكرك إزاي والله

أكيد يا مصطفي ورا الشمس مش كويس خالص بس تعرف مكنتش متصور إن خسه ونداله هذا النظام توصل أنه يقبض علي فتاه مجرد فتاه حاولت التعبير عن رأيها وهو ده اللي كان عاملي إزعاج فعلا

طبعا موضوع المحافظات ده مهلبيه بحق حقيق و التقسيم العشوائي اللي عملوه بيدل أن البلد دي ماشيه بالبركه ولا تخطيط ولايحزنون هما بس حاولوا يوهمونا أنه تخطيط ودراسات وحركات أونطه كده وكأن البلد ناقصه صحيح

تحياتي ليك يا مصطفي وألف شكر مره تانيه علي سؤالك الطيب

mado80 said...

dodda

هههههههههههه

معلش بقي هاعمل إيه
كان بقالي كتير ما بكتبش حاجه فقلت فرصه بقي

بس صحيح حديد علي حديد يفعل الله ما يريد ... ربنا يقدم ما فيه الخير

تحياتي ليكي يا دوددا ومنوراني دايما كده يارب

انين الحزن said...

مادو

ازيك اخبارك ايه

انا كمان مكنتش موجوده الفترة اللي فاتت دي

بس الحمد لله انك كويس وبخير

وبعدين انت تيجي معبي زي ما انت عايز مش انت لوحدك اللي ملياااااان

سلاموووووووووز
وزة

paranoia,magnetic & dramatic girl said...

ماجد صباحك فراولة
اسفة جدا والله انا كمان كنت غايبة
بسبب النت فاصل
اشكرك جداااااااا لانك سألت عني
تسلم يارب
موضوع جميل ياماجد
وحمد الله علي سلامتك..وربنا يطمنا دايما علي عمو
..
عارف انا كنت مرعوبة اوي والله بعد حكاية اسراء دي وخايفة يأذوها بس الحمد لله افرجوا عنها
ربنا يحفظنا
انا بقيت مرعوبة من كل حاجة حواليا الايام دي
وبخاف اوي والله علي اخواتي
عندنا في المنطقة كمان سفاحة وبتقتل الاطفال وصورها مالية المنطقة
:((
...
مش عارفة حكاية المحافظتين دول عاجبني حاسة ان التقسيم ده هيسهل حاجات كتير
...
ماجد مفتقدة الكتابة والرغي وياك
:))
اصل انا بحب افضفض عندك
..
شكرا ياماجد تاني لانك سألت عني
ويارب دايما منور بينا
تكرم يارب

mado80 said...

وزه

إزيك يا قمر عامله إيه

كويس إنك بخير وحمد الله علي السلامه الظاهر إني مش أنا بس اللي كنت غايب بس كويس إنك طمنتيني عليكي

:) :)

الف تحيه ليكي يا وزه منوراني دايما يا قمر

mado80 said...

دعــــــــــــاء

صباح كل حاجه حلوه يا دودو

والله أنا فرحان جدا إنك بخير أنا أول ما رجعت رحت المدونه ما لقيتكيش كاتبه حاجه جديده قلقت جدا والله
الحمد لله إنك بخير وربنا يحميكي يا دودو يارب

طبعا يا دعاء أكيد لازم نقلق كلنا بعد اللي حصل لإسراء يعني كون إنها بنت ما منعش النظام أنه يقبض عليها ودي حاجه في رأيي مرعبه ومزعجه في نفس الوقت بس هاقول إيه حسبي الله ونعم الوكيل

أنا سمعت عن حكايه خطف الأطفال دي بس في المنصوره وبعد كده عرفت إنها طلعت إشاعات أنا مش عارف إنتي ساكنه فين بالظبط بس علي الله يطلع اللي إنتي بتقولي عليه ده مجرد إشاعات لأن الحكايه بجد مش ناقصه مصيبه كبيره زي دي ربنا يستر يارب ويحميكي يا دعاء

أما بقي بخصوص المحافظتين يا دودو فأنا كنت متفائل زيك كده بالظبط لكن بعد ما عرفت أنهم عملوا المحافظتين دول من غير تفكير ولا دراسات وبعد ما بانت سلبيات القرار أستعجبت هما ليه أساسا قسموا المحافظات كده يمكن هما شايفين حاجه إحنا مش شا يفينها وعلي الله يطلع ظني مش في محله

والله يا دود ما تعرفيش أنا مفتقد الكلام برضه والفضفضه معاكي قد إيه ربنا يديم الود بينا يا دودو يارب وشكرا لسؤالك عن والدي

ألف تحيه ليكي يا دودو

appy said...

انت بتقول دراسات انا سمعت فين الكلمه دى قبل كده اممممممممم
ايون خدناها فى اعدادى باين صح
دراسات ايه يا مهند دول لعبوا دومينو وقفلت معاهم قوم ايه قالك نقفلها علىالناس او
عندهم واحد نفسه يشتغل محافظ وبيجملوه بس يا مهند قلبى واجعنى بقى وشكلى طالعه على مارينا قريب
حمد لله على السلامه

EmY said...

الاول اهلا بيك نورت البلوج تاني و وحشتنا

هاروح اقرا و اجي تاني

تحياتي

عاشقة الوطن said...
This comment has been removed by the author.
عاشقة الوطن said...

السلام عليكم

ازيك ياعم ماجد
ايه اخبارك

موضوع اسراء ده بيدل اكيد ان الحكومة مش عارفة تلاقيها مينن وللا منين وده برضه بيدل على ان الشعب مبقاش مستحمل وفاض وكفي اللى فيه وخلاص مش قادر يستحمل


بالنسبة للموضوع التانى فربنا يتولانا كله بقي كوسة يابنى

كل سنة وانت طيب ياماجد
تحياتى

راجى said...

حمدا لله على السلامة

dodda said...

ya maged enta fiiiiiiin???kol da we mesh btkteb ay 7aga???

mado80 said...

آبــــي

الجميله إزيك

إيه يا آبي هو أنا غبت كتير كده لدرجه إنك مش فاكره إسمي أنا أسمي ماجد مش مهند ههههههههه

صحيح هو زي ما بتقولي شكلهم حبوا يجاملوا ناس علي قفا الشعب فقالوا نشغلهم محافظين ... قال يعني البلد ناقصه

شكرا يا آبي علي الزياره ودايما منوراني

mado80 said...

emy

إزيك

الله يخليكي يا إيمي إنتي اللي منوره البلوج

شكرا لزيارتك يا إيمي وألف تحيه ليكي

mado80 said...

عاشقه الوطن

رضـــــــوي

إنتي فين من زمان يا رضوي ليكي وحشه كبيره والله

صحيح يا رضوي ربنا يتولانا

ألف شكر لزيارتك يا رضوي وألف تحيه ليكي وألف تقدير لشخصك الكريم

mado80 said...

أستاذ راجي

إزيك يا أستاذ راجي

الله يسلم حضرتك يارب

منورني يا أستاذ راجي دايما وألف شكر ليك

mado80 said...

dodda

إزيك يا دوددا

أنا موجود أهو بس معلش أصل الإمتحانات قربت فمشغول شويه مع الطلبه بتوعي مراجعات وكده يعني

ألف شكر علي السؤال يا دوددا ومنوراني دايما