Tuesday, May 6, 2008

تـــــــــــــــاج


التاج اللي هجاوب عليه دلوقتي وصلني من مي بهاء



صاحبه المدونه الرائعه نصف دسته أفكار



وهو أول تاج يوصلني من حد بس فرحان



إنه وصلني من مي بهاء لأني بحب مدونتها أوي



وبحب أسلوبها في الكتابه جدا






التاج بيقول







أذكر عشر أشياء عن نفسك.1



أختر 5 أشخاص تهدي لهم التاج وأذكر سبب إختيارك لهم.2






لا تهدي التاج لمن أهداك إياه.3



أترك لصديقك الذي أهداك التاج بأن التاج نزل وتعالي شوفه.4




*****************



طبعا حكايه إن الواحد يقول عشر أشياء عن نفسه شايفها صعبه أوي



لأن في إعتقادي من الصعب إن الواحد يتكلم عن نفسه ويبقي محايد



أكيد هايبقي فيه إنحياز لنفسه طبعا



نبدأ بقي الإجابه





إنسان بسيط بحب البساطه في كل حاجه لكن علي الرغم من كده.1

طموحي بلا حدود وبتمني من ربنا أحقق كل اللي بحلم بيه



بحب الشتا جدا وبحب المطر جدا جدا.2

وبحب أمشي في الشارع والدنيا بتمطر

الشتا علي الرغم من كئابته إلا إني بحبه و بعتبره فصل التأمل والتفكير



من غير طنطنه ومن غير كلام حنجوري كبير شايف إني دايب في حب مصر.3


بحب مصر أوي ونفسي تبقي أحسن من كده لأنها بجد ما تستاهلش اللي بيحصل فيها ده




الدنيا من غير حب بيتهيألي محدش يعرف يعيش فيها .4


وعلي الرغم إني لسه طالع من قصه حب فاشله إلا إني ما فقدتش إيماني


يوم بضروره الحب وأهميته في حياه الإنسان


وزي ما بيقول الشاعر


إذا أنت لم تعشق وتدري ما الهوا... فقم وأعتلف تبنا فأنت حمار



بحب الحياه وبحب محمد منير لأنه غني للحياه .5


كمان بحب أم كلثوم وفيروز أوي




مؤمن جدا بدور القدر في حياه الفرد لأن مهما قعد الواحد يحسبها ويرتبها.6


أكيد القدر في بعض الأحيان بيبقي ليه رأي تاني علشان كدا أنا بقيت إنسان قدري


بعمل إلي عليا وأسيب الباقي علي ربنا وده خلاني في راحه نفسيه كبيره



7.عندي قدره لتقبل كل الأراء وتقبل أي فكر يختلف مع فكري


ما دام اللي بيطرح الفكر ده


بيطرحه بصوره محترمه من غير تسفيه لأراء الأخرين


أو من غير إعتقاد إن رأيه هو الصح


والباقي غلط


وعندي إقتناع كامل بمقوله فولتير الشهيره


إنني أختلف معك في التعبير عن رأيك ولكني مستعد أن أموت دفاعا عن حريتك في التعبير عنه




8.أنا قارئ نهم إلي حد ما بحب القراءه جدا وبستغرب من الناس إللي ما بتقراش عايشه إزاي كمان متزوق للفنون


بوجه عام بيعجني أي عمل فني معمول بصدق





9.بكره الظلم وبكره أشوف واحد بيظلم بني آدم ومستعد أموت نفسي علشان أرجع حق إنسان مظلوم





10. أخيرا نفسي لما أموت أموت بهدوء من غير ما أزعج حد أو حد يشيل همي


مش عاوز أوصل إلي أرزل العمر لأن دي مسأله صعبه أوي

كده أنا خلصت إجابه علي التاج أي حد عاوز يجاوبه يتفضل لأن بصراحه كل اللي فكرت

أهديلهم التاج لقيتهم مجاوبين عليه

بس نفسي (مصطفي محمد )صاحب مدونه( لأن من السخافه أن أمتنع) يجاوب علي التاج ده









29 comments:

المبدع الناقد said...

اصفق لك على تاجك الجميل

http://fekrety.blogspot.com/


أستاذي الفاضل
زر مدونتي رجـــــاء

dodda said...

madoooo
اخيرا جيت يعنى لازم تيجى بمنصب ملوكى ولابس تاج كمان؟؟
تستاهل كل خير
من يوم ما مى بعتته وانا مستنبه ترد عليه
وردك جميل طبعا
وبشكرك لانك مررته لحد يستحقه
بتعجبنى كتباته ومستينه رده هو كمان

mado80 said...

المبدع الناقد

شكرا علي مجاملتك الرقيقه

وإن شاء الله هازور مدونتك

تحياتي ليك

mado80 said...

dodda

الثائره

ربنا يخليكي يا دوددا يارب مش عارف أقلك إيه والله

بس شكرا علي كلامك الجميل

بقلك إيه يا دوددا ياريت إنتي كمان تجاوبي علي التاج ده هابقي سعيد جدا لو جاوبتي عليه

شكرا ليكي يا دوددا ومنوراني دايما يارب

paranoia,magnetic & dramatic girl said...

ازيك ياماجد يارب تكون بخير
؟؟
اشكلارك لانك كنت هتدعوني للتاج
ملحوقة
..
اجاباتك حلوة اوي بس اكتر اجابة شدتني هي الاجابة الخاصة بالقدر
مخطرش علي بالي اجيب سيرة القدر وساعات بيبقي غصب عني بعترض عليه في لحظة غضب وببقي معاندة له عشان كده اجابتك شدتني
..
انا زيك بستغرب من الناس الي مش بتقرا
وبعشق الشتا والمطر
..
يارب تفضل طموح دايما وربنا يغدق عليه من خيره
..
تسلم ياماجد

paranoia,magnetic & dramatic girl said...

التعليق ده انا كتبته عندي بس بوصله عندك اسرع
...
انا لسه قارية ردك علي تعليقي بتاع دعاء الكروان
ربنا يخليك مبسوطة اوي والله انك فكرت في ده ناحيتي
وبشكرك جدا لانك فكرت تهديني التاج
دايم الخير لك ياماجد
انت خلتني احب اسمي انا كنت بكرهه وبحسه مش لايق عليا وكان نفسي يبقي اسمي مريم او اريج
او سارة
..
دايم الخير لك ياماجد

صوت من مصر said...

التاج ده لف مصر من اولها لاخرها صح

appy said...

اللى مش بيقروا
عايشين على جنبهم اليمين زى يا مادو ههههههههههههههه
حلو اجاباتك وادبست قبل كده يا عم الهادى انت

تــــــــــ(حـنة)ـــــــر said...

السلام عليكم
اول زيارة واتمنى انها متكنش اخر زيارة
وعايزة اقولك بجد التاج دة انا شفته كتير و جالى اكتر ومع كل دة لسه معملتوش
بس اجاباتك موضوعيه و جميلة فى نفس الوقت
ربنا يوفقك
تمرحنة

مصطفى محمد said...

سلامو عليكو

............
............
............

EmY said...

لا فعلآ كنت محايد تعرف بجد الظلم ده ابشع احساس خصوصآ لما تقف عاجز قدامه

تحياتي

عاشقة الوطن said...

السلام عليكم


ازيك ياماجد ايه الاخبار

أولا اجابة التاج جميلة

نمسك بقي نقطة نقطة

من ناحية البساطة مفيش احلى منها مع اصرارك على تحقيق طموحك ده شئ هايل
،،،،،،،،،،،،،،،،

من ناحية الشتا فبصراحة الشتا ارحم بكتير من الصيف ولو على المطر انا عن نفسي بكون سعيدة لو مشيت فى الشارع والدنيا بتمطر ياااااه بكون فى منتهى السعادة بحس بحرية وانطلاق مش طبيعي

،،،،،،،،،،،،،،

مصر من غير كلام كتير

هى أنضحك عليها زى مابينضحك علينا
دلوقتى وزى ماانت قولتحرام اللى بيحصل في مصر ده
ربنا يقوينا ويعينا على اننا فعلا نقدر تغيرها

،،،،،،،،،،،،،،،

بالنسبة للحب والدنيا اللى من غير حب هى فعلا متبقاش دنيا ومينفعش ومش لازم حب واحد وواحدة.. لا الحب بصفة عامة الحب بين الناس ،، بينك وبين اصدقائك ومعارفك واقاريبك
وياسلام بقي لو حب الأحبة يبقي الواحد فى منتهى السعادة

وبيت الشعر اللى انت كاتبه ده تحفففففففففة بجد

،،،،،،،،،،،،،،،،

منير وفيروز وام كلثوم كويسين واغانيهم واصواتهم واحساسهم باللى بيغنوه جميل ومش محتاجة شهادتى فى حاجة اكيد

،،،،،،،،،،،،،،،،،،،،،،

القدر وان ربنا يكون كاتب شئ وانت كنت عاوز حاجة تانية اكيد ربنا شايف اللى احنا مش شايفينه
قدرنا ونصيبنا افضل اكيد لما يكون ربنا كاتبه والاجمل انك تتقبله وترضي بيه

،،،،،،،،،،،،،،،،،،،،

أكتر حاجة اكرهها اوى برضه الظلم
الواحد بيبقي حاسس ان الدنيا كلها هتتهد لو ظلم حد او شاف حد مظلوم
بيوجعنى اوى الظلم بجد بيألمنى ان الظلم يكون موجود فى أمة المفروض انها متعرفش غير العدل

،،،،،،،،،،،،،،،،،،،،

أنت عارف اكتر حاجة مش عاوزاها تكون انى اكبر فى السن او ان حد يشيل همى
مش عاوزة اكبر واعجز واكون فى يوم من الايام محتاجة ان حد يسندنى او يشيلنى مهما كان الحد ده مين
احب اعيش واموت وانا شايلة نفسي بنفسي



اجاباتك فى منتهى الروعة والجمال ياماجد

تحياتى الشديدة جداااااا ليك ولإجاباتك

maii bahaa said...

ماجد

كما توقعت منك ...إجابات يغلب عليها الرومانسية والتأمل
وحاجات مشتركة بيننا ... إجاباتك حلوة أوي يا ماجد وعندي طلبين
الأول .. تسعى ورا حلمك وماتسيبوش
التاني .. تفضل تدور على الحب وماتفكرش في ماضي مؤلم
ربنا يحققلك كل اللي تتمناه
وتفضل محافظ على ابتسامتك المذهلة دي على طول
شكرا ياصديقي على الإستجابة
وياريت مصطفى يجاوب ياريت
تحياتي
:)

المنسى said...

تاج رائعة
وأسئلة هايلة
وإجابات جميلة
كان نفسى أنا كمان اجاوب عليه
تحياتى
magedmado80@yahoo.com

راجى said...

شخصية جميلة وصفات حميدة
لك التحية والتقدير

Eman Eltaher said...

Mado
ف الأول انا مكنتش عارفة انك بعدت فترة عن التدوين لانه صدفت انى كنت أصلا بعيدة انا كمان عن التدوين و مكنتش بدخل حتى مدونتى

حمد الله على السلامة و لو انها متأخرة

عجبنى اوى البوست بتاع " الملك لك لك يا صاحب الملك "
جميل ف بساطته و تعبيراته اللى بين السطور

بخصوص التاج متهيألى لو كان اتبعتلى مكنتش عرفت أجاوب عليه بربع التلقائية اللى حسيتها فى اجاباتك و ف نفس الوقت النضج التفكيرى اللى نادرا ما يكون موجود

صحيح كنت هنسى

عجبنى اوى بيت الشعر :))))

PrInCeSS BeRy said...

حلوة اوى المدونة ودى اول زيارة ان شاء الله متكنش الاخيرة

mado80 said...

دعــــــــــاء

إزيك يا دود عامله إيه
معلش علي تأخري في الرد عليكي

معلش كلنا سعات بنغضب من حجات إحنا ما بنكونش عاوزينها بس في الأخر ما فيش مفر هو ده بيقبي قدرنا لازم نرضي بيه وأكيد ربنا بيبقي ليه حكمه في كده أكيد ،أنا لما وصلت للإقتناع ده بقيت في راحه نفسيه كبيره أوي


مبسوط إن فيه قدر من الأفكار المشتركه بينا

زي حب القراءه والشتا والمطر

بخصوص بقي إجابتي علي تعليقك بتاع دعاء الكروان


فبجد أسمك جميل جدا جدا ومش مجامله

تعرفي عندي بنت في أولي إبتدائي بموت فيها بنت لمضه كده وزي العسل
إسمها دعاء برضه

مش عارف ليه كل ما أنادي عليها أفتكرك علي طول

لأ بجد أسمك جميل أوي يا دعاء

تحياتي ليكي وألف تقدير لشخصك الكريم وأسف مره أخري علي تأخري في الرد

mado80 said...

صوت مصر

إزيك

أه صح التاج لف لمصر كلها بس كفايه إنه جالي من مي بهاء

ده لوحده كفايه علشان أجاوب عليه

نورتني يا باشا وأسف علي تأخري في الرد

mado80 said...

آبــــي

معقوله يا آبي مش بتقري مش مصدق الحكايه دي

تلاقيكي خايفه من الحسد ولا حاجه
ههههههههههه

تحياتي ليكي يا آبي وأسف علي تأخري في الرد

mado80 said...

تمر حنه

ربنا يخليكي
وشكرا علي زيارتك الكريمه وأتمني بجد ما تكونش الزياره الأخيره
وأن تكون بدايه لتواصل بيننا

تحياتي ليكي وأسف علي تأخري في الرد

mado80 said...

مصطفي محمد

وعليكم السلام ورحمه الله وبركاته

أنا حاسس إني دبستك في التاج لو مش عاوز تجاوب عليه بلاش

دي أسئله إختياري مش إجباري
:) :)

تحياتي ليك يا مصطفي وأسف جدا علي تأخري في الرد

mado80 said...

Emy

صحيح يا آيمي
الظلم ده أبشع حاجه ممكن الواحد يتعرضلها

تحياتي ليكي وأسف علي تأخري في الرد

mado80 said...

عاشقه الوطن

إزيك يا رضوي

معلش يا رضوي أنا مقصر في حقك ومش بازورك كتير أنا أسف والله مشغول شويتين

مش عارف أقلك إيه صراحه أو أشكرك إزاي
إنتي رديتي عليا في كل نقطه من أسئله التاج وما سبتيش حاجه

بس برضه أنا مبسوط إن فيه قدر من الأفكار المشتركه بيننا

تحياتي ليكي يا رضوي وأسف جدا جدا علي تأخري في الرد

mado80 said...

مي بهاء

إزيك يا مي

مكنتش اقدر يا مي يجيلي تاج منك
وما اجاوبش عليه

ربنا يعلم يا مي قد إيه
بحب كتاباتك جدا وبقيت من عشاق مدونتك وما تكتبيه فيها

لو فيه يا مي حجات مشتركه بينا فده شرف ليا أكيد

شكرا جدا يا مي علي كلماتك الرقيقه

وألف تحيه ليكي وألف تقدير ومتأسف جدا لتأخري في الرد

mado80 said...

المنسي

شكرا أوي يا منسي علي مجاملتك الرقيقه

وجاوب عليه يا منسي ما فيش أي مانع إنك تجاوب علي التاج ده

إعتبرني أهديتهولك

شكرا لزيارتك الكريمه يا منسي وأسف علي تأخري في الرد عليك

mado80 said...

أستاذ راجي

ربنا يخليك يا أستاذ راجي وشكرا لكلماتك الجميله

لك كل التحيه والتقدير
ومتأسف جدا علي تأخري في الرد

mado80 said...

إيمان الطاهر
الجميله

الله يسلمك يا إيمان ومش متأخره ولا حاجه

أنا عارف إنك كنتي غايبه فتره برضه

طبعا رأيك فيما أكتبه مش قادر اقلك بيسعدني أقد إيه

وبجد مش قادر أقلك مدي سعادتي بكلماتك دي

شكرا جدا يا إيمان وألف تقدير لشخصك الكريم

وأسف جدا جدا علي تأخري في الرد

mado80 said...

princess bery

شكرا لزيارتك يا بري ومنوراني دايما

أسف علي تأخري في الرد عليكي