Monday, June 9, 2008

حاجه تكسف


نازل من علي سلم محطه مترو سراي القبه ونازل قدامي شاب زي الشحط طول بعرض من نوعيه الشباب اللي بياخدوا الحقن علشان ينفخوا أجسامهم ويمشوا كده ولا حد قدهم كل واحد حر في جسمه انا مالي بس بقي اللي هلكني من الضحك إن الشاب ده لا قيته لابس تي شيرت لونه مش بطال بس علي ضهره بقي مرسوم إيه مرسوم العلامه اللي علي شكل راس أرنب اللوجو بتاع أشهر مجله إباحيه في العالم (مجله البلاي بوي ) ... طيب أخينا ده ما يعرفش اللي هو لابسه ما يعرفش إنه كده عامل زي اللطخ وبيعمل دعايه مجانيه لمجله إباحيه ، قلت في نفسي يمكن فعلا ما يعرفش وممكن يكون حد أداله التي شيرت ده علشان يضحك عليه مثلا ، بس ما كنتش متخيل بقي إن الاقي التي شيرتات دي بتتباع في كذا محل ملابس لأ ومعلقينهم في الفتارين كده علني ، هو فيه إيه بالظبط هي الموضه السنه دي بلاي بوي ولا إيه سألت أخويا اللي أصغر مني بحوالي خمس سنين يعني تلاقيه دايس وعارف الموضوع ده لاقيته بيقولي أه ده التي شيرتات دي كل المحلات بتبعها موضه السنه دي ، يا نهار زي بعضه يعني كده فعلا زي ما أنا قلت بنعمل دعايه مجانيه لأشهر مجله إباحيه في العالم حاجه بجد تكسف ومش عارف لغايه إمتي هانفضل نقلد الموضه بشكل أعمي حتي لو ما كانتش تتناسب مع عاداتنا و تقاليدنا
ليه ما نعملش إحنا موضتنا بنفسنا ليه ما نحاولش نبدع ونبتكر اللي بنلبسه حكايه التي شيرتات دي بتفكرني بالموضه السخيفه اللي إنتشرت ما بين الشباب بتاعه تسقيط البنطلونات تلاقي الشاب من دول ماشي ومسقط بنطلونه كأنه خارج لسه من الحمام حاجه تخنق بجد بس تيجي بقي لحد إن كل واحد من شبابنا يبقي ماشي وحاطط علي صدره او علي ضهره البادج بتاع مجله البلاي بوي زي بالظبط ما الواحد يبقي ماشي وكاتب علي ضهره عنوان شقه مفروشه من إياهم ، لما لاقيت الحكايه منتشره بالشكل ده قلت لأ الواحد مش لازم يسكت بقي ، واحد زميلي فاتح محل ملابس روحت وقلتله علي الحكايه دي وبصراحه هو ما كانش يعرف هو بس كان يعرف إن دي ماركه البلاي بوي بس إيه بقي البلاي بوي ده ما يعرفش ، وقلت بقي أنا هاحاول أي حد اعرفه أقله علشان نلحق نلم المصيبه دي وخصوصا بقي إن اللبس اليومين دول معدش بيفرق بين شاب وشابه يعني ممكن نلاقي لاقدر الله بنات لابسه تي شيرتات بلاي بوي تبقي مصيبه ، أنا قلت أكتب عن المصيبه دي علشان أعرف الجميع وكل اللي يقدر علي حاجه يعملها ... ربنا يستربقي

28 comments:

paranoia,magnetic & dramatic girl said...

ازيك ياماجد يارب تكون بخير
معاك حق والله
عارف بقي ان برضه دي مشكلة عند البنات
في تي شيرتات بيبقي مكتوب عليها
i`m sexy
take me
touch me
والمشكلة ان الي بيلبسوا كده متبقاش فاهم هما عارفين وبيستهبلوا ولا غافلين
الله اعلم
ربنا ينور بصيرتنا
..
دودو

mado80 said...

إزيك يا دودو
أنا بخير الحمد لله

طبعا أللي إنتي بتقولي عليه ده في رأيي خيبه قويه

يعني لو البنت اللي بتلبس تي شيرتات زي اللي بتقولي عليها دي وعارفه معناها تبقي مصيبه ولو مش عارفه تبقي مصيبه أكبر طبعا
يعني مش قادر افهم واحد يلبس حاجه مش عارف إيه اللي مكتوب عليها ما يمكن مكتوب عليها شتيمه مثلا .. حاجه بجد تكسف والله العظيم

تعرفي يا دودو فعلا والله بجد أنا بدعي زي ما بتقولي ربنا ينور بصيرتنا

تحياتي ليكي يا دودو وألف تقدير لشخصك الكريم ودايما منوراني يا جميل

paranoia,magnetic & dramatic girl said...

شكرا ياماجد لردك وتعليقك
وامين يارب يستجيب الدعاء
عارف لما انت قلت ممكن تبقي شتيمة علي التي شيرت وهو مش عارف
فكرتني بزمان اول لما اتعلمنا انجلش كان واحد تلميذ معانا بيقول لصاحبه وهو بيشتمه
i`m donkey
:))))))
اقصد بيشتم نفسه وهو مش عارف
ربنا يثبتنا

mado80 said...

هههههههههههه

أيوه يا دودو صح
ده كان مقلب بنعمله في بعض وإحنا صغيرين
نجيب أي حد ضعيف شويه في الأنجلش ونقوله قول
I'm donky

وطبعا ما بيبقاش عارف إنه بيشتم نفسه
كنا شريرين زمان
:D :D
أهي حكايه التي شيرتات عامله زيها بالظبط فعلا هههههههههه

يلا ربنا ينور بصيرتنا ويهدي الجميع يارب

ألف تحيه ليكي يا دودو وشكرا أوي علي تواجدك الدائم في مدونتي المتواضعه
بجد بتنوريني والله

صاحب المضيفة said...

ربنا يستر علينا فعلا


والحاد مش عارف هايلاقيها نم اللبس الشبابي اللي شبه لبس البنات ولا من اللبس اللي بينشر لحاجات اباحية


ربنا يستر تاني


زيارتك أسعدتني ومدونتك جميلة ورقيقة


تحياتي

mado80 said...

صاحب المضيفه

في الأول أنا اللي زيارتك أسعدتني كثيرا
ونورت البلوج كله يا ألف مرحب بيك

ثانيا فعلا مشكله اللبس دي مشكله كبيره
أنا بس اللي غايظني إزاي شاب طول بعرض يقبل علي نفسه إنه يمشي كده وعلي صدره إعلان لمجله إباحيه
حاجه تغيظ بجد

تحياتي ليك وشكرا علي تكريمك ليا بالزياره وألف تقدير لشخصك الكريم

راجى said...

يا ماجد باشا والله انت راجل طيب وابن حلال
انمت عارف من سبعينات القرن الماضى يوجد محل ملابس فى شارع شريف اسمه بلاى بوى واذا كان على كده بس تبقى هينة لكن زى ما دودو بتقول فى عبارات فظيعة خادشة للحياء بتكتب على التى شرتات للاولاد والبنات
والحاجة الافظع بقى انهم ممكن يروحوا يصلوا الجمعة وعلى ظهر التى شيرت العبارات البذيئة دى
عارف مرة كان فى بنوته قمر فى الجامعة كاتبة على صدر التى شيرت وبالضبط فى المكان المناسب
bon bon
نهارك سعيد ياباشا

د/أبويحيى وادم said...

السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

فاتيما said...

الله ينور عليك يا مادو
بس تعرف فيه ناس مبتبقاش عارفة فعلاً الماركة دى بتاعة إيه و أقربهم صاحبك دا اللى فاكرها ماركة ملابس و خلاص و ميعرفش أصلها و فصلها
و ناس تانية بقى بجحة و يندب فى عينها رصاصة و بتعمل كدا عشان تبقى كول و ضد المجتمع التقليدى البالى من وجهة نظرهم
ربنا يهدى
و البوست دا ربنا يكتبه فى ميزان حسناتك
تحياتى يا مادو

mado80 said...

أستاذ راجي

إزي حضرتك

محل من السبعينات ... دي مشكله قديمه بقي وأنا مش واخد بالي

بس فعلا كله كوم والعبارات الخادشه للحياء دي كوم تاني
طيب لو قلنا إن البنات بتلفت بيها نظر وده غلط طبعا، الولاد يحطوا حاجه علي صدرهم كده ليه حاجه تقرف بجد

تحياتي ليك يا استاذ راجي ومنورني دايما ياباشا

mado80 said...

د/أبو يحي وآدم

طبعا لوتكلمنا عن جماليات وروعه اللغه العربيه سوف نتكلم عليها إلي ما لا نهايه لذلك فأنا متضامن معك أخي الكريم وسوف أعمل ما بوسعي لنجاح هذه الحمله الكريمه

شكرا لك وخالص تقديري وإحترامي

mado80 said...

فاتيما

يا اهلا ويا الف مرحب بيكي يا فاتيما نورتي المدونه ومش عاوز اقلك مدي سعادتي لما شوفت تعليقك
بجد أن سعيد جدا

طبعا يا فاتيما في ناس ما بتبقاش عارفه فعلا أنا لما فكرت أكتب البوست ده قلت علشان أعرف الجميع واللي ليه صاحب أو حد يعرفه يحاول يقله علشان تتلم الحكايه دي
وربنا يتقبل دعوتك ويجعله في ميزان حسناتي وفي ميزان حسنات أي حد يحاول ينبه اي شخص لحاجه زي كده

شكرا ليكي يا فاتيما وألف تحيه ليكي وألف تقدير لشخصك الكريم نورتيني والله

حنين.. said...

والله مش عارفه اقول دا تقليد اعمى ولا علمنا بقى اعمى ولا اخلاقنا هى اللى عاميه ولا احنا اللى بقينا عامين, انا والله مره دخلت محل لبس, واخترت تى شيرت انا واصحابى, وبسال البنوته على سعره قاللتى لمين؟ قولته ليا.. ردت عليا وقالتلى ده رجالى يا انسه! وبحييك على مدونتك .

مصطفى محمد said...

سلامو عليكو
مادو العزيز

معلش جيت متأخر .. بس انت فاهم بقه

بص بقه

أولا: طبعا التصرف اللي انت عملته ( البوست ده ) تجاه حاجة مش عجباك ( حوار اللوجوهات ) أمر أحييك عليه .. لأنك بالفعل حتلفت نظر ناس كتير ان شاء الله و يبقي خير ليك و للمستفيد

ثانيا : موضوع اللوجوهات لو بصيت له من جانب تحليلي بحت .. أعتقد ان الأمر يرجع لحجم المبيعات .. اللي هو حجم الاقبال عليه .. اللي هو رغبة الأكثرية في شراء هذا المنتج .. يعني ممكن يكون في استنكار و ممكن يكون اللوجو معناه مقرف و وسخ .. لكن الأكثرية تحب مثلا صفع المجتمع بالمثير فتقبل عليه .. أو ان الأكثرية دول عندهم اعتقاد ان اللوجو الوسخ ده نوع من أنواع الحرية أو الروشنة أو اثبات موقف أو أي حاجة .. فيظل لللوجو زبون يدفع مقابل الحصول عليه .. العيب يا صديقي العزيز في المنظومة الأخلاقية و الظروف الاقتصادية

ثالثا : أو ممكن يكون الموضوع في اتجاه تاني خالص .. وهو بكل بساطة الجهل .. واحد لابس حاجة مش فاهمها .. زي مثلا لو لبست تي شيرت عليه رمز صيني .. ولقيت الناس كلها ضدك .. البعض حيقول طب والله العظيم لالبس كل الألوان منه عندا فيهم .. و البعض حيسأل هو الناس بصاله كده ليه

مالآخر .. استعد .. لن تنتهي الظاهرة .. انها من السبعينيات كما قال أستاذ راجي و في البنات أيضا كما قالت دودو

معلش طولت .. و معلش سوداوي شوية

:)

EGYPT EYES said...

أهو أنا عندي أخويا الصغير من نفس نوعية الشباب دول بيلبس حجات اقل مايمكن أوصفها بيها انها حجات غريبه والغريب في الأمر أنه بيتجاهل الألفاظ والكلمات الغير لائقه اللي بتبقى مكتوب على بعض التي شيرتات على الرغم من انه فاهم معناه وبيعتبر دي روشنه !!!
هنقول أيه يامادو ربنا يهديهم D:
شكرا على البوست الجميل ياصديقي

dido said...

السلام عليكم
مادو اولا البوست حلو اوي وانت كمان بتتكلم في موضوع محوري انا شايفه ان ده حال الشباب من زمان في الفتره اللي ظهر فيها عبده الشيطان كان الهدوم عليها جماجم ومن فتره قريبه كان الهدوم عليها نبات المريجوانه مش عارفه بقي دي سطحيه من الشباب وفراغ ولا ايه بس انا شايفه ان ده اقلل واجب لازم يطلع منهم تعليم بايظ وقراه مبيقروش وحاجات كتير
يبقي لازم يكون في تقليد وخلاص
وانا شايفه ان حته الحياء عنده الشباب مبقتش قويه اوي ربنا يهدينا
وتسلم ايدك علي البوست الجامد ده ومنظرين المزيد

عاشقة الوطن said...

السلام عليكم

ازيك يامادو ايه اخبارك

بصراحة احنا بقينا ممكن نقلد اى حاجة وفى اى وقت
مبقاش فيه حاجة اسمها انك تعرف ايه اللى انت بتقلده ده ولا ايه اصله اصلا
يعنى ياترى لاشئ اللى غيرنا بيعمله ممكن يتناسب معانا احنا

حتى لو كان حاجة حد من اصحابنا بيعملها برضه لازم نوقف مع نفسنا ونشوف ايه اللى احنا عاوزين نعمله وياترى نقدر نقلده ولا لأ
ما بالك بقي بالتقليد الأعمى للغرب
وكمان حاجات غير مقبولة نهائيا

ربنا يسترها علينا ويرحمنا برحمته

شكرا على الموضوع المهم ده يامادو

تحياتى

mado80 said...

حنين
إزيك

والله يا حنين كل اللي إنتي قلتي عليه سواء تقليد أو علم أو أخلاق كل دول ا صابهم العمي

تحياتي ليكي يا حنين ونورتيني في أول زياره التي أتمني أن تتكرر

mado80 said...

مصطفي محمد

صديقي الموهوب

لا متأخر ولا حاجه إنت تيجي في أي وقت...المهم إيه اخبار الأمتحانات

بص يا مصطفي إنت جبت من الأخر العيب في المنظومه الأخلاقيه تعرف يا مصطفي ساعات بسأل نفسي وبقول علي الرغم من إنتشار كل القنوات الدينيه دي
وعلي الرغم من كل هؤلاء الدعاه

إلا أن أسلوب حياتنا لم يتغير

طبعا أنا مش واعظ ديني أو أخلاقي بس بصراحه الحكايه دي محيره أوي
ممكن برضه يكون سن المراهقه والتمرد علي كل القيود يبقي ليه عامل كبير في حكايه اللبس دي

بس هتلاقي إن فيه ناس بتلبس حجات هي مش عارفه معناها طب نسميه إيه ده بقي
طبعا الظاهره قديمه بس بتمني إن الشباب يكون عندهم وعي أكتر من كده

لا يا مصطفي ما طولتش ولا حاجه اكتب وقول براحتك ببقي سعيد جدا بالكلام والمناقشه معاك والله يا مصطفي

ألف تحيه ليك يا مصطفي

mado80 said...

egypt eyes

صحيح يا عيون مصر في شباب بيبقوا عارفين إن العبارات اللي مكتوبه علي التي شيرتات اللي لابسينها بتبقي عبارات خادشه للحياء ومع ذلك بيلبسوها

ربنا يهدي الجميع فعلا

تحياتي ليك يا عيون مصر ومنورني دائما

mado80 said...

ديــــــــــــــــــدو

إزيك عامله إيه فينك من زمان
:D

يا ديدو فعلا أنا واثق إن الشباب اللي بتلبس حاجه زي كده بيبقي عندهم سطحيه في التفكير وعدم وعي وإلا ما كانوش لبسوا اللي بيلبسوه ده أصلا

تحياتي ليكي يا ديدو ودايما منوراني بتعليقاتك يا جميل

mado80 said...

عاشقه الوطن

إزيك يا رضوي عامله إيه يارب تكوني بخير

حكايه التقليد الأعمي دي بقت حاجه مزعجه

المشكله إن فيه ناس بتقلد لمجرد التقليد فعلا يعني ممكن ما يكونش اللي بيقلدوه ده بيتناسب معاهم هما شخصيا ومع ذلك بيقلدوه لمجرد إنهم يبقوا مسايرين للموضه

ربنا يهدي الجميع

تحياتي ليكي يا رضوي وألف تقدير لشخصك الكريم
منوراني دايما يا رضوي

ASMA said...

سلاااااااااااام..شفت مدونتك بالصدفة بس بجد حلوة والموضوع قوي لانة يحكي عن مصيبة مستمرة متكررة ولكن كل يوم تظهر بطريقة معينة ...يلا ربي يستر علينا ...

dodda said...

انا اخرت الرد على البوست ده
عشان انا شخصيا شاعتى عليها لوجو playboy
وجوزى جبهالى هديه فى الخطوبه
الفكره ان دى ماركه ومنتجاتها غاليه جدابتعمل ساعات ولبس...والارنوب انا بحبه لانه لابس كل فروته
مش مرتبطه بالمجله


اما عن باقى الكلام العجيب اللى بيتكتب على التى شيرت
فبجد حاجه تكسف لو مقصود ومفهوم او مش!!!

mado80 said...

asma

أولا مرحبا بكي في أول زياره

ثانيا هي بالفعل مصيبه
نتمني من الله أن تنتهي

كل التحيه ليكي وكل التقدير ... شرفتيني بهذه الزياره بالفعل

mado80 said...

dodda

يا ألف مرحب يا الف مرحب
والله العظيم أنا فكرتك زعلانه مني
إكمنك بقالك فتره ما بتجيش
:D :D

بصي أنا طبعا بحييكي جدآ علي صراحتك يعني كان ممكن ما تقوليش
إنك عندك ساعه بلاي بوي
وكان ممكن ما تعلقيش اصلا علي الموضوع

بصي بقي يا دودا أنا لما سألت عرفت إنها ماركه مشهوره وغاليه فعلا
بس يا دودا أنا مقتنع إنها ليها صله بالمجله الإباحيه

تعرفي ليه .. علشان دي بتعتبر علامه تجاريه للمجله وإنتي فاهمه بقي بيبقي ليها حقوق ملكيه فكريه وكده

فأكيد لو الماركه دي علي ساعه أو تي شيرت أو جينز أكيد المجله هي اللي بتسمح بكده
أو هي اللي بتدي إذن للمصانع إنهم يستغلوا العلامه التجاريه بتاعتها

بس هي لو جت علي الساعه
هايبقي الأمر هين
علي فكره برضه هو الأرنب شكله حلو أنا معاكي ، بس هو مرتبط عندي بالمجله الإباحيه دي فكرهت منظره صراحه

مش عارف أقول غيه تاني يا دودا بس هو ده رأيي ، ممكن يكون بيختلف عن رأيك شويه صح

أنا بصراحه خايف لرأيي ده يزعلك
بس هو وجهه نظر قد تحتمل الخطأ
ممكن نتفق فيها ممكن نختلف بس أكيد الخلاف لن يفسد للود قضيه كما يقال

أنا خايف لكون زعلتك بس لو رأيي مش عاجبك ممكن ترميه لأقرب صفيحه زباله
:D

تحياتي ليكي يا دودا ومنوراني دايما وياريت متغبيش كده
:D :D :D

dodda said...

ههههه
مش زعلانه
والساعه لو انا مقولتش انها بلاى بوى
محدش حياخد باله
...
واه فى رساله لصاحبك الموهوب
اللى مطنش التاج اللى فات بتاع 10 اشياء
خليه يخلص الواجب اللى عليه
عشان ده مش بيتمسح باى مساحيق تنظيف

ربنا يكرمك يا ماجد واحنا مش مختلفين فى الرأى مع ان بلاى بوى تبقى زى ميكى بالمقارنه بقنوات الاغانى والا ايه؟؟؟

mado80 said...

دودا

أنا كنت خايف لتزعلي
:D
لأ دي قنوات الأغاني مصيبه كبري برضه
ربنا يحفظنا

لأ مصطفي باين عليه متعود يؤجل واجب اليوم الي الغد
هههههه

أنا حسيت أنه مش عاوز يجاوب علي التاج فمرضيتش ابقي رخم واتقل عليه
بس هاقوله تاني
:D

كل التحيه ليكي يا دودا وكل التقدير لشخصك الكريم