Monday, June 30, 2008

!! أنا مــــــاشي

من حوالي ثلاثه أشهر تقريبا أتصل بيا واحد من أعز اصدقائي
قالي إن فيه دار نشر كبري في السعوديه عاوزه ناس مؤهلات عليا
وعرض عليا إن إحنا نروح نقدم ،
في الأول أنا كنت معارض جدآ لفكره
السفر خارج مصر
وهو كان عارف كده كويس
، قلتله كمان إني هاروح أشتغل في مجال مش تخصصي
كنت شغال وقتها مدرس بس بمرتب هزيل جدآ
بس علي الأقل مجال تخصصي اللي أنا بفهم فيه
مع إلحاحه عليا وذكره لبعض الأشخاص اللي سافروا و إشتغلوا في نفس الدار ورجعوا وفتحوا دور نشر في مصر ليها إسمها دلوقتي
قلت وماله نقدم وأهي تجربه كتبنا السير الذاتيه بتاعتنا وبعتناها علي الإميل
إتصلوا بينا وحددوا ميعاد للمقابله قابلنا صاحب مكتب الموارد البشريه
اللي هيسفرنا راجل محترم جدآ
هو اللي بيشوف الناس الأول علشان يعرف
إن كانوا مناسبين ولا لأ ، قبل مقابله المندوب السعودي

سألنا علي شويه حاجات وبعد كده قالنا هانعبت ليكوا
طبعا أنا في الأول كنت واخد الحكايه تهريج وقلتله شكلهم هايعملوا زي أي حد
لما بنروح نقدم علي شغل يقلك هانتصل بيك ولا بيتصل ولا حاجه

نسيت الموضوع خالص وما قلتش لأي حد
لأن كان عندي شك إنهم يتصلوا بينا أصلا
بعد فتره قليله لقيتهم بيتصلوا بيا وبيحددوا معايا ميعاد
لمقابله مندوب دار النشر السعوديه روحت والحمدلله نجحت في المقابله

بعد كده قالي هانبعتلك علشان تمضي علي شروط العقد
لما شوفت الشروط لاقيتها مش بطاله مرتب كويس
وعدد ساعات عمل مناسبه مع توفير المسكن والإنتقالات

وافقت علي الشروط وبعد كده بعته العقد مضيت عليه
وبدأت بقي اخلص إجراءات السفر
كل ده وأنا حاسس إني بحلم
لأني ما كونتش متوقع إن الأمر سوف يتم بهذه السرعه

أخيرا إتصلوا بيا يوم الخميس اللي فات
وقالولي إن التأشيره طلعت وإن السفر لازم يبقي
يوم السبت اللي جاي
روحت عملت إذن السفر
بتاع القوات المسلحه إكمني لسه في فتره الأحتياط وعملت تصريح العمل
و حجزت التذكره
و
إن شاء الله السفر هايبقي يوم السبت الساعه 7 مساءا
مش قادر أقولكم طبعا القلق اللي أنا فيه دلوقتي ، قلق رهيب
وخصوصا
إنها تجربه جديده عليا عمال أفكر لدرجه تعبت فيها من التفكير
برضه حاسس بحزن كبير إني هاسيب مصر
بس مش عاوز اقول لحد في البيت علي مشاعري دي لأن اساسا والدي ووالدتي
كانوا معارضين تماما لموضوع السفر خصوصا ماما
بس هاعمل إيه
بصراحه الواحد ما لاقاش فرصه زي دي في مصر
وما إشتغلش فيها ، وأهي برضه تجربه وخبره الواحد هايكتسبها
ومش هاخسر في كل الحالات
بس بجدأكتر حاجه مزعلاني
إني هاسيب التدوين ، طبعا مش هاسيبه علي طول بس
يعني هانقطع فتره عقبال ما تستقر الأمور
وأعرف الدنيا ماشيه إزاي في السعوديه
هايوحشني مدونيين كتير أوي إرتبطت بيهم و بكتاباتهم وبإبداعتهم
عاوزكوا تفتكروني بخير وأي حد أنا أسئت إليه أرجو منه أن يتقبل إعتذاري
وبطلب منكوا أمانه تدعولي إن ربنا يوفقني وأنجح في التجربه دي
إن شاء الله في أول فرصه هابقي أكتب واعرفكه أحوالي
يعني لو فيه حد مهتم أنه يعرف
أحوالي
بجد والله هاتوحشوني كلكم
أشفكوا علي خير إن شاء الله
مع السلامه
:(


30 comments:

مصطفى محمد said...

ايييه؟
انا حاليا مندهش و مصدوم
أستوعب الموضوع و أرجع أكتب تعليقي


:(
:(
:(
:(

هبة ربيع said...

تروح وترجع بالسلامة
ابقى اكتب بوستات من هناك وحَدِث المدونة كل ما تقدر عشات نتابع أخبارك
:)

appy said...

تروح وترجع بالسلامه يا رب يا مادوو وربنا يوفقك بجد هستنى تطمنا عليك وخلى بالك من نفسك

إيما ( أم البنين) said...

أول مره أدخل المدونه ألاقيك مسافر ..لكنك جاي عندي برضه أنا كمان في السعوديه ,,ربنا يوفقك..لكن أوصيك بالصبر وفكر دايما إن أحلى حاجه هتحصل عليها هنا إنك هتحج..وتزور قبر رسول الله ..ربنا يكرمك
إبقى طمنا عليك
تحياتي

Zika said...

الي اللقاء يا صاحبي
مسير الحي يتلاقي يا مادو
هتوحشنا والله
لكن طالما هتشوف مستقبلك
فاحب اقولك مبروك
وربنا يوفقك
ولو احتاجت حاجه وانت في السعوديه ما تترددش انك تبعتلي علي الايميل
وانا باذن الله اقدر اساعدك
كان نفسي اسيبلك رقم موبايلي بس للاسف الخط اتوقف بسبب حيوانات سرقة الخطوط ربنا يولع فيهم
تحياتي يا مادو

فاتيما said...

مادو
متخفشى يا بنى
ربنا إن شاء الله يكرمك آخر كرم لما تروح هناك
بلاش القلق دا
دى السعودية يعنى فركة كعب
و لو محصلش راحة ترجع علطول
بس إن شاء الله هتلاقى كل خير
ربنا كاتبلك الخير عشان واضح إنك أنسان كويس و تستاهل كل خير
أنا اللى مزعلنى حاجة واحدة بس
أنك مش هينفع تيجى يوم التبرع بالدم و كان نفسنا نشوفك و كنت هوريك صورة أخويا اللى أنت شبهه قووى
معلش ملحوقة بقى
المهم تخلى بالك على روحك
و أهو فى السفر فوايد كتير
عارف أكبر ميزة بتعجبنى فى حكاية سفر أى حد برا إيه؟؟
إنه مش بس هيستفيد لوحده
لأ
دا هو و أسرته و زوجة المستقبل و اولاده
و كمان بلده هتستفيد لما يكون واجهة مشرفة ليها برا
و الحمدلله دلوقتى بقى فيه موبايل و دش و إنترنت و مية وسيلة إتصال يعنى هتكون على تواصل إن شاء الله مع كل أحبائك
طبعا فى الأول هنستنى عليك
بس بعد شوية لازم تطمنا على أحوالك بقى
و متتحجشش بقى دى دار نشر و أكيد فيه نت فى الشغل و إلا تبقى عيبة قوى
ربنا يوفقك يا مادو
دا اجمل خبر النهاردة

قوس قزح said...

ان شاء الله يكون باب رزق و خير لك
ربنا يوفقك و تروح و ترجع بالف سلامة

يمكن الغربة صعبة فى اولها بس ان شاء الله تلاقى الاصدقاء الكويسين اللى يساعدوك على تحملها

ربنا معاك

إيمان said...

أنا شفت بوست حكاية السفر عند الغالية فاتيما

ولما قرأت بوستك عرفت مخاوفك مصدرها اية يمكن عشان فكرة السفر مكنتش فى ذهنك من الاساس ...يعنى مكنش فى شحن معنوى لها من البداية

تانى حاجة التخصص يبدو مش تخصصك....فده عملك قلق....ياترى هتلاقى نفسك فيه ولا لأ

بس اقولك طالما الامور مشيت على خير
فأعرف أن علامة الإذن التيسير
وربنا إن شاء الله رايد لك الخير
ويا سيدى لما تبقى صاحب نشر إن شاء الله يمكن تفيدنا وانشر عندك لما أعمل كتب واعملك دعاية محترمة
وكمان تنشر لزملائك المدونين ....

كمان تعرف انك بتمارس النشر من غير ما تخطط بكتاباتك فى المدونة...يعنى بردو مش هتروح بعيد

ربنا يوفقك ويكرمك وتروح وتيجى سالما غانما وتنساش تدعيلى فى السعودية ...وتدعى لكل اصدقائنا المدونين .....


تحياتى وتقديرى

الطائر الحزين said...

تروح ورتجع بالسلامة
وفقكم الله

بت خيخة وأى كلام said...

اول مرة اجيى عندك

جاية اقولك
خوض التجربة لحد الاخر
مش هتخسر حاجة
لكن اكيد هتكسب حاجات
هتكسب خبرة
هتكسب اعتماد على النفس اكتر
هتكسب شوية فلوس
هتكسب اصدقاء
هتكسب انك هتعرف قيمة بلدك اكتر

ربنا يا وفقك يا مادو
وترجعلنا بالسلامة
ارمى حمولك على الله
واكتبلنا من هناك حياتك عاملة ازاى
واحنا كلنا معاك
متخافش مش هنسساك لو اتأخرت علينا شوية فى التدوين

تروح وترجع بالف سلامة يارب

سلام
اختك خيخة

dido said...

السلام عليكم
مادووووووو
:(
تروج وترجع بالف سلامه بس والله زعلانه جدا ومش بحب لحظات الوداع دي
:( :(
ان شاء الله ميكونش في قلق ولا حاجه وكل حاجه هتبقي كويسه والمكان هناك يكون مريح وان شاء الله تكلمنا من هناك وتقولنا اخبارك واكييييد ان شاء الله في نت
:( :( :( :(
في امان الله وربنا يحفظك ويحميك يا رب

يوميات فنانه مفروسه جداا said...

سلامو عليكو يا استاذ مادو

رايح السعوديه ان شاء الله وقلقان ليه يعني هه قولي كده دا ديتها ساعتين وتبقي مصر يعني اقل من اسكندريه

تعرف انا واحده صحبتي سافرت وربنا كنت بعرف اخبار صوحابي اللي مصر منها طول النهار قاعده عالنت فاتحاه وكل الناس بتكلمها ولا كأنها هنا وطبعا ربنا يكرمك بجهاز كمبويوتر وتبقي كأنك في مصر وبعدبن فيها ايه عدل مصر ديه دانت ربنا بيحبك

ربنا يوديك ويرجعك لاهلك بألف سلامه

سلامز

اه امانه لو عملت عمره او حجيت تدعيلنا كلنا ماشي

مـحـمـد مـفـيـد said...

انا اول مره اجي عندك وعرفت من عند فاتيما
ربنا يعينك ويقويك علي الغربه
وعليك بالصبر
وربنا هيكرمك
وابقي طمن الجميع عليك

نونو said...

السلام عليكم
اول زيارة
وتروح وتيجي بالف سلامة
ربنا يطمنا عليك

ابتسم من فضلك said...

تروح وترجع بالسلامة يا رب

صاحب المضيفة said...

ربنا معاك يارب وزي الفل وعقبال الحج والعمرة بقى


انوي بس وربك كريم


ومش تخاف من حاجه

الدنيا هناك سهلة وحلوة باذن الله

هي صعبة في الاول التعود على مسالة الغربة دي بس بتروح مع الوقت


ربنا يرزقك الصحبة الصالحة يارب هناك ويبعد عنك كل مكروه



سلامات يا جميل

kahramana said...

ربنا يوفقك و يكرمك و يقدملك ما فيه الخير
توكل على الله

على الرغم من المفاجأة لكن هنقول ايه ده مستقبل

متغبش علينا و حاول ترستأامورك بسرعة و ترجع للبلوج تانى

النور هيقطع من بلوجك لحد بلوجنا

فى انتظار عودة سعيدة ناجحة باذن الله

EGYPT EYES said...

بالتوفيق ياصديقي العزيز
ابقي طمنا عليك
تحياتي وتقديري لك

only spot said...

سلام عليكم
مادو تسافر بالف سلامه ويا رب كده تبقى فتحة خير عليك ويرزقك من الحلال
بجد انت من المدونين المحترمين الى سعدت بزياره البلوج بتاعهم او زيارتهم ليا فى البلوج يوم ما .حتوحشنا تدويناتك بس الاهم ان ربنا يوفقك ومبروك عليك الشغل الجديد ويا رب تبقى فتحة خير عليك
تحياتى القلبيه ليك ولكل مصرى متغرب وربنا يهون غربتك
اختك شيكو

فاتيما said...

مادو
زمانك سافرت بالسلامة النهاردة
أنا بس جيت أقولك ربنا يطمنا عليك
و تلاقى كل خير فى سفرك و ترحالك
إبقى طمنا عليك اول ما تستقر
و أحكيلنا بقى على المغامرات
تحياتى يا عزيزى

المنسى said...

مادو

انااسف على التاخير

يارب تكون بخير وترجع بألف خير وسلامة

كان نفسى أشوف وأعرفك عن قرب قبل السفر
ولكن

قدر الله وماشاء فعل

أستودعك الله

صفية الجفري said...

يارب تتوفق .. الغريب قريب من ربنا .. خليني اتكلم عن جدة .. جدة جميلة لو الواحد اراد ان يرى جمالها .. كانها لا تكشف نقابها إلا لمن يريد أن يراها بكل حب واحترام .. وكذا كل مدينة فيما أتصور .. لو جينا بنفسية مقبلة على اكتشاف الجمال سنجده ولو بعد حين .. وسننعم به .. أسأل الله لك كمال الفتح والرزق الطيب والصحبة الدافئة التي تضييف إليك ألقا جديدا

صفية الجفري said...

يارب تتوفق .. الغريب قريب من ربنا .. خليني اتكلم عن جدة .. جدة جميلة لو الواحد اراد ان يرى جمالها .. كانها لا تكشف نقابها إلا لمن يريد أن يراها بكل حب واحترام .. وكذا كل مدينة فيما أتصور .. لو جينا بنفسية مقبلة على اكتشاف الجمال سنجده ولو بعد حين .. وسننعم به .. أسأل الله لك كمال الفتح والرزق الطيب والصحبة الدافئة التي تضييف إليك ألقا جديدا

إبراهيم فرغلي said...

ابتسم فقط يا صديقي
أكرر نصيحة من التعليقات
كن محبا لنفسك في أي مكان

فاتيما said...

واد يا مادو
اخبارك إيه دلوقت ؟؟
طمنا عليك يا جدع طيب
و قولنا عامل إيه ؟؟
ربنا يطمنا عليك دايما
تحياتى يا ماجد

dodda said...

ربنا يكرمك ويفتحها عليك
اعتقد ان مصر مفتقداك جدا
..

طمنا عليك بسرعه
ربنا يهون عليك كل صعب ويرزقك

القبول ويحبب فيك خلقه...
امين

mostafa rayan said...

ربنا يوفقك وتحقق كل اللي في نفسك وترجع لأهلك ولأصحابك بخير

nasimlibya said...

انا علي امل ان اجد قريبا بوست جديد يا مادو فلا تطيل علينا الكل بانتظارك
هل تعرف كم انت محبوب ؟؟؟؟؟
اظنك تعرف الان فهنيئا لك بحيهم جميعا ووفائهم لك

alzaher said...

اتمنى لك سفرا موفقا
وعودة سالمة الى أرض الوطن
وليكن الوطن في فلبك
حتى في غربتك

فاتيما said...

مادو
أنا جاية أشوف آخر أخبارك إيه ؟؟
طب لسه يعنى مجتش فرصة تدخل و تطمنا عليك ؟
طيييييب
يا رب تكون بخير يا صديقى
و فى أحسن حال
تحياتى يا مادو