Friday, July 18, 2008

وحشتني مصــــــــــر أوي ووحشتوني كلكم


بجد مش عارف أقول إيه ، حاله إشتياق غير عاديه لكل ماهو مصري

ومع إني ما بقاليش إسبوعين في السعوديه إلا إني مشتاق لمصر أوي

أنا مش عارف أتكلم علي فكره معلش مش هاقدر أقول كل اللي عاوزه علشان مستعجل

بس في اقرب فرصه هاكتب

لأن جوايا حاجات كتير عاوز أقلها وخصوصا إنطباعتي عن السعوديه وعن الشعب السعودي

اللي خالف كل ظنوني الحقيقه ، بالإيجاب علي فكره مش بالسلب


المهم إنتوا وحشتوني فعلا وبجد لازم أوجه الشكر لكل واحد علق علي البوست اللي فات

أولهم طبعا أختي الكبيره فاتيما اللي مهما قلت ومهما كتبت فما فيش كلمه واحد هاتقدر تعبر

عن عميق شكري وإمتناني ليها

ألف شكر يا فاتيما بجد


أنا علي فكره إشتغلت في إحدي فروع مكتبه العبيكان في الرياض

بس أول ما جيت وعلي حظي كان فيه جرد لكل المكتبات علي مستوي المملكه فدخلوني في إحدي لجان الجرد

جردنا كل فروع الرياض وبكره هسافر علشان نكمل جرد باقي فروع المملكه اللي ما إتجردتش

هنسافر بكره علي منطقه تسمي عنيزه

بس علي الرغم من إرهاق الشغل إلا إني مستمتع بيه جدا لأني تقريبا لفيت كل حته في الرياض

مدينه جميله أوي ، لسه إمبارح كنا في حته إسمها البطحاء وكلنا أكل مصري صميم

باميه وبسله وفاصوليا بيضا وملوخيا ولحمه ورز كانت هيصه
كان بقالي فتره مش باكل غير كابسه ولما كنت بغير كنت باكل كنتاكي
المطاعم اللي بتقدم وجبات الفراخ هنا عامله زي مطاعم الفول والطعميه عندنا
كنت قربت أكاكي من كتر أكل الفراخ هههههههههه

أنا الحمد لله بخير ومستمتع جدا بالشغل في العبيكان إحدي أكبر دور النشر في السعوديه

إن شاء الله بعد ما أرجع من السفر هابقي أكتب عن كل حاجه عاوز أقلها


سلامي للجميع ومعلش أنا أسف جدا علي عدم ردي علي التعليقات في البوست اللي فات

بس أنا ممتن جدا لكل واحد كتب تعليق

بجد ألف ألف شكر للجميع

25 comments:

فاتيما said...

بتشكرنا على إيه يا مادو
يا ولد إحنا اخواتك
الحمدلله إنك بخير
و طمنتنا عليك
يلا يا عم هيص وسط الكتب و القراية
و ربنا يكرمك كمان و كمان
لو دارالنشر دى ليها موقع على النت قولى عليه و احنا
ندخل اعملك شغل
و حركات و نوريهم إنك عاملهم دعاية حلوة فى مصر و كدا
ربنا يوفقك فى كل خطوة تخطيها
تحياتى يا عزيزى

مدحت محمد said...

صحيح ميحسش بحب مصر
غير اللى اتغرب

بس فعلا السعودية جميلة

واهلها انت بتقول عكس مابنسمع
بس انت بقالك اسبوعين بس ياعم يمكن تكون الفراخ ليها دور فى الموضوع دهههههههه

بجد ربنا يوفقك ان شاء الله فى شغلك
ده وتقدر تتحمل الغربة بعون الله

تحياتى

appy said...

مادو انت كمان وحشتنا خالص ربنا يوفقك يا رب

nasimlibya said...

مادو ازيك الحمد علي السلامة وان شاء الله ترجع مصر وانت بصحة وسلامة
انتظر ادراجتك بفارغ الصبر المهم تكون بخير وتستمتع بكل لحظة في هذه التجربة

موناليزا said...

ربنا يوفقك وترجع مصر بالسلامة ان شاء الله

مصطفى محمد said...

:)

dodda said...

ياااه
من يوم ما سافرت وانا عندى حاله من التبلد ومش مصدقه...

اكتر من مره افتح مدونتك واقعد اقرا اللى كتبته...بس التعليق كان صعب عليه اوى

اعاتبك انك كنت مش بتمهد انك مسافر؟؟
والا اقولك انى افتقدك جدا من اول ما عرفت انك مسافر من قبل حتلى ما تسيب مصر؟؟؟

بجد متأثره جدا لانى شايفه فيك اخويا..
ربنا يكرمك ويكرمه ومش بنساك فى الدعاء..
وجيالك يوم التلات ربنا انعم عليا بتحقيق حلم العمره
الف حمد وشكر...
يا ريت تطمنا عليك
الله خير حافظا وهو ارحم الراحمين

إيما ( أم البنين) said...

الحمد لله إنك بخير ..ويارب تكون مبسوط في الرياض ..وأولحاجه تعملها إن شاء الله أول ظروفك ما تسمح إنك تيجي مكه وتعمل عمره ده هيهون عليك كتير ..وربنا معاك
تحياتي

المنسى said...

ربنا يوفقك يامادو ورجعك لينا بالسلامة

ونشوفك على ألف خير

haneen said...

بقى كده يا مادو اغيب عن بلوجك شويه ارجع الاقيك سافرت وبدون سابق انذار كمان ... على العموم ربنا معاك ويوفقك انشاء الله ،بس ما تنساش الدعاء لو روحت مكه والمدينه امانه تدعيلنا جميعاً .. ترجع بألف سلامه

تحياتى

dido said...

السلام عليكم يا شباب
السلام عليكم يا شيخ مااادو
حياك الله
هي دي اللغه اللي عندك ولا انا بعك
المهم وحشتنا موووووووووووووووت والله بجد ربنا يحفظك يا رب ويحميك ويرجعك
مصر بالف سلامه يا ابو الامجاد

dido said...

السلام عليكم تاني يا شيخ العرب
اخوك الصغنن نجح واتخرج لولولولووووي
كنت عاوزه اعلق فرع نور هنا بس مش لاقيه حد فاضي موسم بقي
كان مبسوط اوي انك كلمته يوم النتيجه يا رب دايما الموبيلات تقصر المسافات كده ويا رب النت يدخل كل بيت
يا رب ترجع بالف سلامه

mado80 said...

فاتيما
مدحت محمد
appy
nasimlibya
موناليزا
مصطفي محمد
doddaaa
إيما أم البنين
المنسي
haneen
didooo

شكرا لكم جميعا
تعليقاتكم أسعدتني كثيرا
معلش مش قادر أرد علي كل واحد

متاسف جدا

shasha said...

مدونة متميزة واحساسك بالغربة ده اكيد شئ طبيعى تحياتى وربنا يوفقك

فاتيما said...

مادوووو
ازيك
انا أسفة و مقصرة فى حقك بس سامحنى كنت متدهولة شوية الفترة اللى فاتت ما بين مشواير عائلية و ألزهايمر بقى إنت عارف أختك كبرت بقى و شكلى هنسى إسمى بعد شهرين و لا حاجة
المهم إنت عامل إيه و اخبارك إيه ؟؟
يا رب تكون دايما بخير و فى أتم صحة و أحسن حال
كل سنة و إنت طيب داخلين على رمضان أهو
طبعاً أول رمضان تقضيه بعيد عن مصر و مش بالساهل بس معلشى و إنت قدها و قدود و يلا شد حيلك و دخل النت عندك فى بيتك عشان نقعد ندوشك و متبقاش فاضى خالص و لا تحسس بملل و لا إفتقاد عشان هننقلك كل الاخبار اول بأول من المحروسة و باقى المحافظات
تقبل تحياتى و تمنياتى ليك بدوام الصحة و الخير كله يا ماجد
اختك ام يوسف

dodda said...

مفتقداك جدا فينك
فين كتبابك؟؟
فين تعليقاتك؟؟
لاوم تعرف انك انت كمان ...فعلا وحشت مصر
ربنا يوفقك
طمنا عليك

مصر يا موكوسه .....يا مزارع الكوسه said...

بسم الله الرحمن الرحيم
يقوم مجموعه من المدونين وانا من ضمنهم بتكوين رابطه لانقاذ ومساعدة اطفال الشوارع
التفاصيل كلها هنا
http://awraqwasrar.blogspot.com/
يسعدنا انضمامكم

فاتيما said...

مادو
ازيك يا صديقى
أخبارك إيه فى السعودية و إحنا داخلين على أيام مفترجة إن شاء الله
يا رب تكون فى احسن حال
يعنى إبقى طمنا عليك من وقت للتانى كدا بأى حاجة و لو سطرين تلاتة فى بوست صغنن
نطمن عليك بس
كان عندنا تبرع للدم و كان نفسى تيجى و نشوفك
و عندنا سفرية للقاء مدونى الإسكندرية و برضو كان نفسى تيجى
بس معلش
و ملحوقة لما ترجع إن شاء الله
المهم تخلى بيالك من نفسك و صحتك
و ربنا يكرمك فى كل خطوة تخطيها عندك و هنا
كل سنة و إنت طيب يا ماجد
و رمضان كريم عليك يا اخى العزيز

مصر يا موكوسه .....يا مزارع الكوسه said...

السلام عليكم ورحمة الله وبركاته
حملة كى يكونو حقا احياء
لمساعدة اطفال الشوارع ستبدا هذا الاسبوع
باقى التفاصيل هنا
http://awraqwasrar.blogspot.com/
للاشتراك يرسل الى
quloobrhema@yahoo.com
لنقم بالاتفاق على تحديد مكان وزمان
اللقاء
يسعدنا اشتراك الجميع

mado80 said...

shasha

ربنا يخليكي وشكرا جدا جدا لكلماتك الرقيقه

كل التحيه والتقدير ليكي

mado80 said...

فاتيما
ازيك

ما تعرفيش يا فاتيما مدي تأثير كلماتك في رفع حالتي المعنويه قدإيه

ما فيش تقصير ولا حاجه يا فاتيما ده يمكن أنا اللي مقصر والله

أنا الحمد لله بخير قابلتني الفتره اللي فاتت مشاكل بس الحمد لله عدت
وكان ليا زمايلي ساكنين معايا اتوزعوا لفروع تانيه فمش عارف حاسس بالغربه والوحده اليومين دول
بس هانقول ايه هي الغربه كده

فاتيما أنا بشكرك جدا جدا علي إهتمامك بجد الف شكر

mado80 said...

dodda

معلش يا دودا اسف جدا مقصر والله انا عارف

أنا بجد اللي مفتقد كتاباتك وابدعاتك زي ما مفتقد حجات كتير اوي في مصر

شكرا يا دودا علي اهتمامك ألف شكر

mado80 said...

مصر يا موكوسه ... يا مزارع الكوسه

أنا معاكه في اي حاجه مكن تتعمل لاطفال الشوارع بجد عار علي مصر إن يكون لسه فيه المشكله دي عندها لغايه دلوقتي

بس قلولي إيه اللي اقدر اعمله من هنا وانا اعمله

شكرا لمرورك الكريم

مهندس مصري said...

انت شغال في العبيكان في الرياض ؟
انا شفت فرعهم في حائل
كويس و كبير
ربنا يوفقك يا بني
و يهون علينا غربتنا
انا ضفتك عندي في الريدر خلاص
و متابعك دايماً بإذن الله

mado80 said...

مهندس مصري

يا أهلا ياأهلا
ازيك يا باشمهندس محمد
يارب تكون بخير وألف ألف مبروك للحج
حج مبرور ان شاء الله

ايوه يا محمد أنا شغال في فرع من فروع العبيكان في الرياض
آمين يا محمد يارب يهونها علينا

طبعا إضافتي عندك شرف كبير ليا ربنا يكرمك يارب مش عارف اقولك ايه

كل التحيه والتقدير ليك يا محمد