Saturday, November 1, 2008

الحزن الوطني الديمقراطي


النهارده يوم الانتخه الاسبوعي بتاع العبد لله

الويك اند يعني , النهارده صحيت كالمعتاد في كل يوم اجازه

علشان اخلص الواجبات المنزليه من غسل وطبخ وكنس ومسح والذي منه

محدش يضحك والنبي لأن في الغربه لازم كل واحد هلب يور سلف مش معقول هاجيب حد يعملي الحاجات دي يعني

معرفتش قد ايه الستات بيتعبوا الا لما اتغربت بجد ربنا يكون في عونهم

المهم بعد ما خلصت هذه المعاناه الاسبوعيه

قلت افتح التلفزيون اشوف الدنيا فيها ايه

وعلشان انا مبخت وامي دعيالي من يومي اول ما فتحت التلفزيون لاقيت مين!! ... لاقيت مين يا ولاد

لاقيت عمو صفوت الشريف ... اه عمو صفوت .. هو بعينه بغباوته بوشه العكر

هي الناس دي لسه عايشه

طبعا ياعمنا لسه عايشه وقاعدين علي قلبنا لغايه ما يخلصوا علينا واحد ورا التاني هما ليهم شغلانه غير دي

ربنا يعينهم يارب مع انهم مش هيلاقوا شعب اهبل ولا اعبط من الشعب المصري

شعب مستأنس ينضرب علي قفاه يا عيني ويقول كمان

المهم الحاج صفوت الشريف كان عمال يتكلم كالعاده بطريقته اللي مش مفهومه

اراهن اي حد لو سمع الراجل ده بيتكلم وفهم منه اي حاجه

اساسا بشك انه مش فاهم اللي بيقوله

ودي عادته من ايام ما كان ماسك وزاره الاعلام اللي جابها الارض وخللي اعلام مصر في الحضيض


سمعته بيتكلم عن المؤتمر السنوي للحزن الوطني
وعن عوائد التنميه وانها لازم تتوزع علي الشعب المصري
وان الاصلاح هدفه زياده معدلات التنميه

تنميه قال ... تنميه ايه يا عم الحاج هي فين التنميه دي اساسا

تنميه الفقر والجوع

تنميه صفايح الزباله اللي بقي ياكل منها معظم الشعب دلوقتي

تنميه القهر والجبروت والديكتاتوريه وسجن الاحرار من الشعب المصري

تنميه , تنميه ايه يا كذابين يا ولاد الكلب

حد يقلي طيب هي فين التنميه دي يا جدعان علشان انا مخي هايضرب

هي الناس دي ما بتزهقش من الكذب

كل السنين دي عمالين بيكذبوا علي الشعب الغلبان ولسه ما زهقوش

هايبطلوا امتي طيب ولا هو الكذب بقي داء عندهم مستعصي علي العلاج

الله يحرقكم يا بعدا زي ما اتحرق مجلس الشوري والمسرح القومي

وان شاء الله مش هتلاقوا حد يعبركوا

افقر حاجه بقي بجد واللي ضحكتني جدا شعار المؤتمر

فكر جديد .. لمستقبل بلدنا

طبعا اكيد قصدهم مستقبل جمال مبارك ما هي دي بلدهم

ولازم يأمنوا مستقبلها

10 comments:

راجى said...

ماجد
اجمل حاجة شغل البيت فى الغربة انا جربت حوالى 6 سنوات لغاية ما بقيت استاذ فى التدبير المنزلى ولا الحوجة
ارجو لك اوقاتا سعيدة ومفيدة فى السعودية

مصطفى محمد said...

مادو
العزيز

ههههههههههههه
ههههههههههههه
مريت بحاجة شبه كده .. و كنت باكل في طبق واحد و اشرب في كوبايو واحدة عشان مغسلش كتير
صفوت الشريف!.. المفروض تقفل التلفزيون وش أو تجيب قناة ميلودي حتي .. يا راجل انت ناقص الأشكال دي؟

أما عن الحزن الوطني الديموقراطي .. فالأشكال الضالة التي تربعت على المقاعد العليا متنقلين بين المناصب أتساءل ألم تكتفي كروشهم ألم ينفذ نهمهم .. مش كفاية كده؟ ما يعملوا حركة ذوق و يمشوا بالسياية ما هم خلاص معاهم كل اللي نفسهم فيه
أما عن جيمي بن مباركنا العتيد .. فمش قادر أقيم اذا كان مجيئه فعلا وحش و لا كويس .. انما هو طبعا حيبقي أكبر ختم على قفانا نحن المصريين لو مسك بعد أبوه

أحييك على مشاعرك الجميلة تجاه صفوت الشريف .. هذه هي الوطنية

سؤال جانبي: هو جرنان الدستور بيوصلك؟

ربنا معاك
:)

~*§¦§ Appy §¦§*~ said...

هههههههههههههه سيبك من كل ده علشان تعرفوا بس ان البنات بتتعب النبى فرحانه فيك خالص
تستاهل
هههههههههه
وكمان بتعاقب نفسك وتشوف صفوت يا راجل طيب كفايه العقاب المنزلى

dido said...

السلام عليكم
مادوووووو
منور يا كبير والله ايه يا عم الكلام الكبير ده
بس بجد كلامك كله لازم يتعلق عليه
بس اهم حاجه شغل البيت هههههههههههههههههههه تسلم ايدك يا مان:)
وايه الكلام الكبير ده يا مادو مش تسيب الناس تعمل تنميه مستكتر علينا شويه التنميه سيبنا نعلي شويه
وبعدين هو حد يقول علي بابا صفوت كده هههههههههههههه
ده حبيب هارتي
ملحوظه علشان كده الهارت جه لكل المصريين :) :)
والله ليك وحشه كبيره جدا يا مان
بس اهم حاجه انك اتعلمت الطبيخ :)
ربنا يعينك علشان تعرفوا احنا بنتعب اد ايه وتقولوا الحمد لله
ربنا يرجعك لينا بالف سلامه

mado80 said...

استاذ راجي
العزيز

هههههههههههه طبعا ولا الحوجه

ربنا يخليك يا استاذ راجي وشكرا جدا لإطلالتك الجميله

مع كل التحيه والتقدير

mado80 said...

مصطفي محمد
صديقي الموهوب

ازيك يا مصطفي عامل ايه

لا ياعم الحمد لله انا باكل وبشرب في اللي انا عايزه

مع ان غسل الصحون هوارخم حاجه ممكن تقابل الواحد لو قاعد لوحده
:)

تعرف يا مصطفي يوميها كنت عاوز اتفرج علي قنوات مصريه عاوز اعرف ايه الاخبار وكده
لكن ما تزعلش في الاخر قفلت التلفزيون بس وانا ميت من كتر الغيظ

مش فاهم يعني ايه اعلام دوله كبيره زي مصر يتسخر من اجل الحديث عن حزب واحد ورجل واحد وولي عهد واحد

حاجه تقرف بجد

لأ زوق ايه يا مصطفي هي الناس دي لو عندها ذره زوق ولا ذره دم كانت قعدت كل ده

انا اللي بحييك يا مصطفي لأن مشاعرنا لازم تبقي كده تجاه كل من مص ولسه بيمص في دم هذا البلد الطيب

لا والله يا مصطفي تصدق ما قابلتش لغايه دلوقتي الدستور والله العظيم
وكنت لسه بكلم واحد صاحبي في الحكايه دي
الصحف الحكوميه المصريه هي الاكتر انتشارا هنا فببقي مضطر لما احب اقرا جرنال مصري اني اجيب الاخبار او الاهرام

كل التحيه والتقدير ليك يا مصطفي

mado80 said...

appyyyyy

ماشي يا آبي حقك تشمتي فيا
بس ايه رأيك بقي اني بعمل الحاجات دي وانا مستمتع جدا

وش بيطلع لسانه
:)

لأ فعلا صفوت الشريف كان يوميها هو اكبر عقاب ممكن اشوفه في غربتي

كل التحيه والتقدير ليكي يا ابي يا قمر

mado80 said...

didoooo

عامله ايه اه اتعلمت الطبيخ

بكره اجي مصر واعملك يخني ايه عجب عجب
ههههههههههههههههه

انا لسه بتعلم يا ستي بس اهو قربت ابقي محترف حرق رز ومكرونه
ههههههههههه

ليكي وحشه والله يا جميل انت عامله ايه
والدراسه ايه اخبارها
ربنا يوفقك يا ديدو يارب

كل التحيه وكل التقدير ليكي يا ديدو

سومه...مجنونه فى بلد عاقل said...

سيبك من الحزن وشكرا على انك مدحت فى تعب الستات واعترف باننا بنشوف الويل

mado80 said...

سومه ... مجنونه في بلد عاقل

شكرا ليكي انتي يا سومه علي زيارتك الكريمه
وعلي فكره الستات بيتعبوا فعلا ربنا يكون في عونهم

كل التحيه ليكي