Saturday, December 12, 2009

!! اكتئاب






عمرك حسيت بالملل من كل حياتك


وحسيت ان حياتك مالهاش اي معني


وان كل اللي حلمت بيه بيحصل .. بس بالعكس


تسال نفسك طب ليه كده


ليه الدنيا معانده اوي كده وحطاني في دماغها


هي مالهاش شغلانه غيري ولا ايه


عمرك حسيت انك غرقان في الاحباط من فوقك لتحتك


وانك هتموت من كتر الاحباط


حاسس انه كاتم علي نفسك


وانك عاوز تصرخ باعلي صوتك


تصرخ بجد علشان تفضي الشحنه دي


بس صوتك بيبقي مكتوم جواك مش عاوز يطلع


عمرك حبيت تعيط وما قدرتش


حسيت ان الدمعه اتحجرت جوه عينيك ومش عاوزه تنزل


عمرك حسيت انه مافيش امل


وانه مهما تعمل خلاص راحت عليك يا حلو وابقي قابلني لو شفت حاجه حلوه


عمرك حسيت انك فاشل


وان سنين عمرك ضاعت في الهوا


عمرك حسيت انك مكسور


حسيت انك مخنوق


غضبان


.


طهقان


.


قرفان


.


مكتئب


.


.


كل المشاعر السلبيه اللي ممكن تتخيلها متجمعه فيك دلوقتي


عمرك حسيت الاحاسيس دي


لو محستهاش ... ولا يهمك


انا حسيتها


!!!!






Friday, December 11, 2009

!! ليس عالمي





خيل لي في لحظه ما انني ليس هنا


وانني اعيش حلما سيئا سوف استيقظ منه يوما


انا لا انتمي لهذا العالم


لا انتمي لهذه الشوارع الخاويه


وتلك البيوت المصمته


وهؤلاء الناس المتحجره قلوبهم


.


.


.


انا لا انتمي لهذا العالم


هذا العالم ليس عالمي


!!!

Friday, November 20, 2009

عن احلامنا الضائعه




شحن اعلامي زايد عن حده


واغاني وطنيه كتيره اوي


اغاني وطنيه بحق وحقيق


من اللي ما بتتذاعش غير في مناسبات من وزن يوم سته اكتوبر


وحلم الـ 80 مليون مصري


وبرامج وحوارات وتحليلات


كل ده علشان حته مباره


لعبه .. الفايز فيها هايخش كاس العالم


واكيد هايطلع من الادوار التمهيديه


وكأن الدنيا اتوقفت


و مشاكلنا خلصت

و همومنا اصبحت في خبر كان


طيب واحده واحده كده


مع نفسنا نعد كام حلم راح


كام حلم اتبدد


كام حلم جرينا وراه لقيناه في الاخر سراب


كام فقير مش لاقي ياكل


كام شاب عاطل مش لاقي شغل


كام فاسد وناهب وسارق لثروات هذا البلد


البلد بتتباع حته حته


وبتتورث بخطه شيطانيه خبيثه بدون كلل او ملل


واحنا كل همنا الصعود لكاس العالم


مش مشكله بقي علي حساب مين


في ثانيه بيتحول الاشقاء لاعداء علشان لعبه


غباء اعلامي وسقوط فكري وغوغائيه مثيره للغثيان


ليه كل اللي حصل ده


مين المستفيد منه


اكيد طبعا انها مش الشعوب


الشعوب اللي مضحوك عليها من انظمه فاسده


متجبره كاتمه علي انفاس محكوميها حتي النهايه


هذه الانظمه التي شاخت وشخت علي كراسيها من كتر القعده عليها


استنفذت كل السبل لالهاء شعوبها


طب والحل


الحل اختراع هدف وهمي , حلم خادع , لعبه كي تلهي الشعوب عن ما تفعله تلك الانظمه ولو لفتره مؤقته


فتره لالتقاط الانفاس لحين اختراع سراب اخر


ايها الشعوب العبيطه المضحوك عليها


كل ما حدث طوال الفتره الماضيه يثبت شيئا واحدا


يثبت اننا نستاهل كل ما يحدث فينا


نستاهل ان احنا ناخد علي قفانا ونقول كمان ليه لأ


نستاهل كل البلاوي اللي احنا شايفنها


لو كانت الحماسه دي اللي دفعت شعبين شقيقين انهم يوصلوا لحد التقاتل


استخدمناها في تغيير انظمتنا بالقوه لكنا الان في مصاف الدول الاولي


ولكننا نستحق ما نحن فيه


نحن شعوب بلهاء يسهل التحكم فينا


بصراحه مافيش حكام هتلاقي شعوب اهبل من كده علشان تتحكم


!!!






Wednesday, November 4, 2009

!!! الـم




لا شئ مثل الالم يقفز بنا فوق مدارج الزمن

لاشئ مثل الالم يخرج اقوي مافي النفس

شريطه ان يكون الما حقيقيا من يحتمله ويعبره
يصعد به درجه من درجات الكمال

ذلك ما تبينه وهو يعبر صحاري جرداء الا من صبارات مره
يمتص ماءها لكي يواصل الحياه

من روايه كتاب الودعاء .. لـ جمال مقار



Monday, October 26, 2009

!! عاوز اتكلم



عاوز اتكلم في حاجات كتير
اتكلم عن اقتحام الصهاينه للمسجد الاقصي وسكوت حكامنا المخنثين عن اي فعل
اتكلم عن قطارات لسه بتتصدم ببعضها ولسه ناس ابرياء بيموتوا
بسبب اهمال وفساد شبعنا منهم وكفايه كده عليهم اوي
اتكلم عن بلد بتتورث وخلاص معدش فيه امل جمال مبارك عمل موقع تلميعي ليه
بدأ الحمله الانتخابيه بدري اوي ابن الكلب
اتكلم عن شيخ ازهر جاهل ازال النقاب عن بنت صغيره وقالها انا بفهم في الدين اكتر من ابوكي
طب باماره ايه ايها الشيخ الجاهل
اتكلم عن قاهره المعز اللي الخديو اسماعيل كان عاوز يخليها قطعه من اوروبا
واللي اتحولت في عهد مبارك الميمون لمزبله البهايم تقرف تعيش فيها
اتكلم عن شباب زي الورد متغرب وطالع عين امه في الغربه ولا حد حاسس بيه
اتكلم عن بلد قامت ومقعدتش علشان حفيد الريس مات طيب انا موافق
والناس الغلابه اللي بيموتوا كل يوم بسبب حرق او غرق او تصادم قطارات
الدنيا ما قامتش عليهم ليه .. ماهم اصلهم ناس ولاد كلب
حد قالهم يطلعوا غلابه ولا فقرا ما طلعوش ولاد رؤساء ليه
عاوز اتكلم واتكلم واتكلم
ولا اقلك ... مش متكلم في حاجه

!!!




Saturday, October 24, 2009

!!! مرآه




نظرت في المرآه ... دققت النظر

ثم سألت نفسي .. ان كنت قد رأيت هذا الوجه البائس من قبل

!!!

Tuesday, October 13, 2009

!!! حياه




وددت لو اخبرته ان الحياه تختار مساراتها

وكثيرا ما تكتشفون لاحقا انها كانت اكثر حكمه منكم

رغم انكم وقت الالم تخبطون اقدامكم في الارض كأطفال مدللين

تبكون حتي تتحجر الدموع في اعينكم

وتصرخون فتخز صرخاتكم قلوب الالهه

!!!


من روايه نون ... لسحر الموجي

Saturday, October 3, 2009

!! ضربه قلب



لما رجليا بتاخدني بالغلط والقي نفسي في المكان اللي كنا بنتقابل فيه


بتعمد اني اقعد علي نفس الترابيزه اللي كنا بنقعد فيها مع بعض

واطلب نفس المشروب اللي كنت بطلبه معاكي , فاكراه .. كنتي بتحبي تطلبي نفس المشروب

بقعد وافتكر ايام جميله قضيناها مع بعض .. وبسال نفسي هي ليه الحكايه خلصت بدري اوي كده

ما اكدبش عليكي ببقي حاسس ان فيه سكينه جوا قلبي حد غرزها ببطء شديد اوي علشان كده لسه المها واجعني

وحشتني اوي ضحكتك ... لمسه ايديكي ... خجلك ووشك لما بيحمر من الكسوف لما بقلك اني مستعد ابوسك قدام كل
الناس .. فاكره .. كنت بتقوليلي انت مجنون .. كنت برد عليكي واقلك ان الحب هو الجنون ذاته فلو عملت كده هتبقي

حاجه بسيطه جداا بالنسبه لحبي ليكي .. كنتي بتبصيلي بصه كانت بتقتلني بحس منها اني قدام مشاعر كتير اوي

كنت بدووووب فيها البصه دي كنت ببقي عاوز اخدك بالحضن .. كنت ببقي عاوز اصرخ ، ازعق واقول لكل اللي

قاعدين بصوت عالي اني بحبك مش عارف لو كنتي لسه فاكره ده ولا لأ

تعرفي النهارده وبالغلط برضه لاقتني رايح لنفس المكان اللي شهد اخر لقاء بينا

تصدقي اول مره اروحه من ساعه ما سيبنا بعض مش عارف ايه اللي وداني هناك

انتي اللي اخترتيه ولما قلتلك تعالي نروح لنفس المكان اللي بنقعد فيه علي طول قلتيلي مش عاوزه مكان لقائنا يبقي هو

نفس مكان فراقنا ساعتها اتصدمت وعرفت ان خلاص حكايتنا قربت اوي علي النهايه


مش عارف مين السبب في النهايه دي انتي ولا انا ... مش عارف ليه عملنا كده مع اننا اتواعدنا ان قصه حبنا هتعيش لغايه الموت ... مش عارف ليه ساعتها سكت
ومقدرتش اتكلم حتي كلمه , اتكلمتي انتي وانا وقفت ساكت . مندهش . مش مصدق

بس اللي عارفه دلوقتي واللي متأكد منه اوي ان احنا سيبنا بعض للابد

Thursday, October 1, 2009

فعلتها السعوديه



بدون احاديث ممله عن الرياده وعن القياده

وبدون احاديث سقيمه عن قدم الحضاره وقدم العلم

وبدون ضجه كبيره في الحقيقه تم افتتاح صرح علمي في السعوديه ينبغي ان يفخر به كل عربي

اتحدث عن جامعه الملك عبدالله للعلوم والتقنيه (كاوست) التي افتتحها الملك عبدالله في ذكري اليوم الوطني للمملكه الذي وافق هذا العام يوم 23 سبتمبر
هذه الجامعه التي اعتبرها دكتور طارق الغزالي حرب في مقاله للمصري اليوم يوم الاثنين الماضي كانت تمثل حلما للدكتور زويل
وهو ما اجهضته قوي الفساد في مصر

تعتبر هذه الجامعه نقطه تحول هامه في المملكه فهذه الجامعه سوف يسمح فيها لاول مره بالاختلاط بين النساء والرجال كما لن يتم اجبار النساء علي لبس العباءه وسوف يسمح لهن بقياده السيارات داخل الحرم الجامعي, في واقع الامر تعتبر هذه الامور هامشيه جدا مع اهميتها لمجتمع محافظ وشديد الخصوصيه كالمجتمع السعودي

فمنذ قدوم الملك عبدالله وهورجل جدير بان يحترم وهو يحاول جاهدا الحد من نفوذ المؤسسه الدينيه

المهم فعلا في الموضوع هو ما ستضيفه هذه الجامعه التي ارجو ان تكون فاتحه خير ليس للسعوديه فحسب ولكن للوطن العربي كله بالنظر الي التخصصات النادره التي سوف تقوم الجامعه بدعم الابحاث فيه

المضحك المبكي في هذا الامر انه لم تقم ايا من صحفنا القوميه الباسله بالاشاره مجرد اشاره لهذا الحدث الهام

لا اخفي شعوري بالسعاده لأن دوله عربيه كبيره بحجم السعوديه قامت بمثل هذه الخطوه التي يجب جميعا ان ننحني لها احتراما وتقديرا

كما لا اخفي في نفس الوقت شعوري بخيبه الامل لأن دوله بحجم مصر وبتاريخها لم تقم مبكرا بمثل هذه الخطوه

كان جديرا بمصر هذا فهي اهل له ولكن ماذا تقول في قوي فاسده تحالفت مع نظام افسد فلم ينظروا الي مصلحه هذا الوطن ، كل ما يهمهم هو كيف يسرقون هذا الشعب اكثر واكثر وكيف ينهبون ثرواته كل يوم

آن لنا الان وبكل صدق ان نتوقف عن احاديث الرياده والقياده هذه الاحاديث التي اصبحت ممله وعقيمه

وان ننظر للاخرين نظره الند بالند فهم ليسوا اقل منا ولا نحن اعلي او اكثر تحضرا منهم

هذه النظره العقيمه وان كانت صالحه في وقت مضي فقد عفي عليها الزمن الان

جامعه الملك عبدالله للعلوم والتقنيه . كاوست

Saturday, September 5, 2009

!!! انه الاله




انه الظاهر الذي لا يخفي عليه شئ

انه العالم ببواطن الامور

انه المخلد

!!
انه الحي الذي لا يموت
انه الحكيم الذي غلبت حكمته الانبياء

انه الصادق الذي تعدي صدقه الاتقياء

انه البصير الذي فاقت بصيرته الالهه
انه الاوحد المتفرد

انه حي مخلد

انه المخلد

انه الاله

!!!

Saturday, August 22, 2009

!!! الخازوق



عندما تخطب سوف تكتشف انك اخذت اكبر خازوق في حياتك

وعندما تتزوج سوف تجد لزاما عليك ان تجلس علي ذلك الخازوق
اما وقد اكرمنا الله باخذ هذا الخازوق

ندعوه ونتضرع اليه ان يجنبنا الجلوس عليه
فهو سميع مجيب الدعاء

!!!!!!

!!! حيـــــــــره





كان الرجل فيما بدا لي لا يدرك ان الديانه لا شأن لها بالعقل

وأن الايمان لا يكون ايمانا الا اذا كان يناقض العقل والمنطق

والا فهو فكر وفلسفه ومع ذلك فقد اشفقت يومها علي هذا الرجل الحائر

مثلما صرت اليوم مشفقا علي نفسي لفرط حيرتي


!!!!!


من روايه عزازيل .... ليوسف زيدان

Wednesday, June 17, 2009

!!! غــــــــربه الي الابد




ان تشعر بالغربه مره بعد اخري


حتي تدرك انها قد كتبت عليك الي الابد


كأنها لعنه سماويه لن تستطيع التخلص منها


حتي لو اردت انت ذلك وعزمت عليه



الموضوع الان قد خرج من يديك



الان قد دخلت الدوامه التي لن تنتهي



الان لم تعد الامور في صالحك



اهدأ واستكين فانت لم تعد انت ولا الايام عادت كما هي

!!!!!





Friday, April 3, 2009

اخيرااااا مصـــــــر .... الحمدلله


فرحه كبيررررررره

سعااااااااااده تكاد ان توقف قلبي

يااااااااااه اخيرا

اناااااااا

اناااااااا

في مصرررررررر

مش مصدق

مش مصدق خاااااااالص

الحمدلله
وصلت يوم الاربعاء صباحا
وكنت عاوز اكتب بوست علي السريع
لكن النت اللعين كان مفصول
فمعرفتش اكتب حاجه
بس سعادتي الان لا توصف
الحمدلله

Saturday, March 14, 2009

!!! شويه تخاريف



سئمت الحياه .. وعندما رأيت وجهك

علمت ... ان للحياه معاني اخري


.


شوقي لك لا يبلغ مداه

وهل ... للشوق مدي

.


تعجبني جرأتك احيانا

وتصدمني ... احيانا اخري

.


في كل مره الثم فيها شفتيك

ادرك ... جهلي بالحب

.


متي يعلم؟

ان حبي له ... ليس بضعف

.


حبي كالبحر .. موج هادر
نهايته ... علي شواطئ الاحزان

.


لافرق عندي بين الفرح والحزن

فكلاهما ... مبكي

!!!!

Saturday, March 7, 2009

طفوله

ابن واحد صاحبي
______


ينظر الي عيني الطفل

الي ابتسامته

الي شقاوته

.

.

.


يتذكر طفولته

.

.

.

كأنها كانت بالأمس

.

.

.

أيمكن ان تعود هذه الأيام

.

.

.

كم هو محبط عدم العوده لطفولتنا عندما نريد ذلك

!!!

Saturday, February 28, 2009

حفله سطو



تخيل نفسك قاعد في امان الله في غرفه من غرف الشقه بتاعتك


وعطشت خرجت تشرب


لاقيت التلفزيون اللي في صاله الشقه مش موجود


دخلت المطبخ


لاقيت الانبوبه برضه مش موجوده


يا نهار اسود


ياض يا ابراهيم


احنا اتسرقنا ياض


ابراهيم بيرد عليا بكلمه ابيحه


ويقلي انت هتزر يا .... كلمه ابيحه برضه


قلتله هي الحاجات دي فيها هزار يا زباله


ازاي ياعم هتلاقي حد خد التلفزيون عنده في الأوضه ولا حاجه


طبعا بيحاول يفسرلي عدم وجود التلفزيون


قلتله يا غبي ازاي بس اذا كان الريسيفر لسه محطوط اهو


طب ازاي ده احنا كنا قاعدين وفاتحين الاوضه


وقفه بس هنا وفلاش باك علشان اوضح كيف تمت عمليه السطو


الله يخرب بيتهم اللي كانوا السبب مالقوش غيرنا يعني


في ليله يوم اجازتي الاسبوعيه بقضيها سهره لغايه الفجر


اصليه وانام علي طول ما يصحونيش الا علي الغدا


طبعا لومافيش غسيل وطبخ والذي منه


الليله دي اللي هي امبارح


كنا قاعدين في الأوضه بتاعتي


بظبط للواد ابراهيم اللاب توب بتاعه


لاب توب اسود الله يحرقه قارفني بيه من ساعه ما جابه


المهم القعده خدتنا وشكلنا نسينا نقفل باب الشقه


وطبعا الحمار اللي دخل اخر واحد نسي يقفلها هو التاني


بعد ما خلصنا الليله


دخل ابراهيم علي غرفته وعدي علي الصاله
وماشافش سيادته ان التلفزيون مش موجود


طلعت اشرب


ببص علي مكان التفزيون ما لاقتهوش


يا نهار اسود


بفتح النور لاقيت اثار اقدام علي الموكيت اللي احنا فارشين بيه الصاله


بخبط علي ابراهيم وحصل بينا الحوار اللي قلته من شويه


المهم احنا نعمل ايه خدت سكينه وابراهيم سكينه مش عارف ليه


بس يمكن علشان نشجع بيها نفسنا


مع ان لو شفنا حد انا اول واحد مش عارف اعمل معاه ايه


طلعنا سطح العماره


ونزلنا لفينا حواليها ولا اي حاجه
الكلام ده كان الساعه اربعه ونص قبل الفجر بالظبط


طب نعمل ايه ياهيما


كان معانا صديقي اللي في نفس الغرفه بتاعتي


كان عاوز يصحي العماره كلها قلتله يابني اعقل مش كده


المهم طلعنا الشقه كل صحابنا اللي فيها صحيوا وكل واحد نقله الشقه اتسرقت


يقول ازاي ومش ازاي


روحنا بلغنا الصبح في القسم ومستنين الفرج مع انه مش هيجي انا عارف


واللي اتسرق عمره ما هيرجع


بس اكتشفنا انها كانت حفله سرقه ومش احنا بس اللي اتسرقنا


ده فيه كام شقه كمان اتسرقوا


بس حراميه قلبهم ميت ولاد الكلب


لأن باب الغرفه اللي كنا قاعدين فيها كان موارب ومع ذلك ولا همهم


ويمكن ده السبب اللي مخلهمش ياخدوا باقي الحاجه


الريسيفر والمكوه ده حتي نسيوا ياخدوا ريموت التلفزيون


ولاد حلال والله بس اهو الريموت متشالهم في اي وقت ييجوا ياخدوه


بس انا من ساعه ما حصلت السرقه ودماغي عماله تودي وتجيب


طيب لو طلعنا في لحظه خروجهم بالتلفزيون كان ايه رد الفعل منهم


ولا لو كان حد قام من النوم في لحظه قطعهم لخرطوم انبوبه الغازعلشان يسرقوها
ايه رد فعلهم برضه
وتخيلت مثلا انهم كانو اتنين وانا طبيت عليهم وهما بيقطعوا خرطوم الانبوبه
قام واحد منهم مديني بالسكينه في بطني ماهو اكيد هيبقوا مسلحين
وابقي انا شهيد انبوبه البوتجاز
يا نهار منيل

او مثلا وانا قايم مش شايف حاجه من النوم والاقيلك حرامي عمال يسرق
طبعا مع العلم اني ببقي صاحي فاقد الوعي تماما



يا تري كنت عملت ايه ساعتها وهو كان عمل ايه معايا برضه , بجد مش عارف رد فعلي كان هيبقي ايه


تفتكروا لو حد اتعرض للموقف ده المفروض يعمل ايه ؟

!!!!




Saturday, January 3, 2009

لن تمـــــــــوت غــزه



اغضب اذا لاحت امامك صوره الكهان


يبتسمون والدنيا خراب


والمدي وطن حزين


ابصق علي الشاشات


إن لاحت امامك صوره المتنطعين


اغضب اذا لملمت وجهك بين اشلاء الشظايا


وانتزعت الحلم كي يبقي


علي وجه الرجال الصامدين


اغضب اذا ارتعدت عيونك


والدماء السود تجري


في مآقي الجائعين


اغضب اذا لاحت امامك امه مقهوره


خرجت من التاريخ ... باعت كل شئ


كل ارض ... كل عرض ... كل دين


اغضب ولا تترك رفاتك


جيفه سوداء كفنها عويل مودعين


اجعل الجسد النحيل قذيفه


ترتج اركان الضلال


ويشرق الحق المبين



فاروق جويده

من قصيده ... اغضب ولا تسمع احد

************


اتفووووو عليكم يا ازبل حكام العالم

:(