Thursday, November 25, 2010

!! مسلم ومسيحي




في الجيش الواد مينا صديق السلاح كان بيقلي نفسي اموت شهيد


قلتله بهزار وانت مفكر نفسك لو مت ياض هتبقي شهيد


قاللي هما الشهدا بروح امك مسلمين بس


مت علي روحي من الضحك وقلتله لأ ياعم باماره الشهيد مارجرجس


ضحكنا احنا الاتنين خدت سيجاره منه


وشربناها بعمق الحديث خدنا للكلام عن مشاكلنا بعد الجيش والشغل والجواز

ومشارعنا المستقبليه بعد الخروج




واد زميلي مسيحي كان اسمه عماد كنا بنقله في الوحده يا بندق


معرفتش انه مسيحي الا لما لاقيته مهتم بخبر رجوع البابا من رحله علاج


قلتله انت مسيحي يا بندق قاللي اه


قلتله علي فكره بحترم عقليه البابا شنوده اوي راجل داهيه


بصلي باستغراب


انت مسلم ولا مسيحي


قلتله مسلم


بعدها قامت صداقه قويه بيني وبينه وما كانش بيحب يقف خدمه الا معايا


زمان في المرحله الاعداديه كان معايا واحد في الفصل اسمه شريف


الواد كان قرد في الكوره مكنتش بحب العب الا معاه


ابوه كان فاتح مصنع خشب


وهو كان رفيع اوي كنا بنقله يا خشبه ونضحك


*


*


هو ايه اللي بيحصل في مصر


النظام وزبانيه الامن عاوزين يوصلوا مصر لايه بالظبط


ايه التحفز المقيت اللي وصلنا ليه ده


وايه المشكله لما مسيحي يبني مكان يعبد فيه ربنا


معقول ممكن يجي يوم نوصل كده ونبقي زي العراق ولا الصومال


بناكل في بعض وده يقول بلدي وده يقول لأ دي بلدي انا


واحد يقول احنا اغلبيه


التاني يرد عليه يقله انتو محتلين واحنا اصل البلد


ياربي


الموت اهون وقتها


*


*


اللهم احمي مصر


اللهم احمي مصر

!!!





6 comments:

راجى said...

امين
فينك يا عم وحشتنى

mado80 said...

وانت والله وحشني اكتر يا استاذ راجي
:)

ღ♥ღّNaseemLibyaღ♥ღ said...

مادووو ازيك

فعلا الدنيا تغيرت مش ف مصر بس لاااا كل بلاد بتعانى ممكن مصر لان العدد ماشاء الله ولموقعها الجغرافى السبب فى هذا التغير وكانها لعنة تنتقل من بلد لاخر

الصومال السودان العراق لبنان وبالامس البعيد القريب الجزائر

اللهم احفظ واحمى بلداننا من الهمجيين مسيحين ومسلميين

مصطفى محمد said...

مادو العائد بقوة

جميل جدا البوست الاولاني البسيط المعبر الجميل جدا

بالنسبة للبوست الثاني .. تصدق كنت قبل اليوم بتاع احداث الهرم قاعد مع واحد في الشغل بيقولي انه سامع ان الاستثمارات الخارجية تخشي من دخول مصر لأن هناك يقين ان مصر مترصد لها و ينبغي وقوعها .. و سألته كيف .. قال الفتنة الطائفية .. ثم حدث ما حدث

ربنا يستر
:)

mado80 said...

NaseemLibya

اللهم احفظ بلادنا من كل سوء يارب

كل التحيه ليكي يا نسيم
دايما منوراني
:)

mado80 said...

مصطفي محمد
صديقي

ازيك يا درش وحشني كتــــير اوي
ولا عائد بقوه ولا حاجه يا مصطفي
:)
انت عامل ايه
يارب تكون بخير

ربنا يستر بجد يا مصطفي
الواحد ما بقاش عارف مصر رايحه لفين
ربنا يحرسها من كل سوء