Wednesday, December 7, 2011

!! لعنهم الله



ينظرون من عليائهم الى الشعب المصري
على اعتباره مجموعه من الحمقى يستحقون العطف
كما يستحقون ان نأخذ بايديهم
على اعتبار انهم ايضا مجموعه من القصر الغير واعين لمصلحتهم

كانت هذه نظره الطبقه الحاكمه لمجمل الشعب المصري
نفس هذه النظره - للأسف الشديد -  مازالت مستحكمه علي من يظنون أنفسهم  النخب المثقفه  لهذا الشعب

لعنه الله عليهم جميعا

!!!


Tuesday, November 22, 2011

!! لا شئ تغير في مصر




كم الاصابات وكم القتلي تستدعي سؤالا واحدا

ما الذي تغير في مصر ؟

وكأن ما سقط من شهداء في بدايه الثوره لا يكفي 

وكأننا نحتاج مزيدا من الشهداء والمصابين لتتغير مصر

ما الذي تغير في مصر ؟
لا شئ
مبارك لم يتغير
ونظامه لم ينهار

لا تحتاج ﻷن تكون ذكيا لتدرك ان ولاء رجال مبارك لن يكون الا لمبارك

ومن يؤمن بغير ذلك فهو واهم

اذن فالنظام لم يتغير بالفعل 

الذي تغير هي الوجوه فقط

بنفس الفكر وبنفس الغباء
وكأن مبارك كالمرض او سرطان مازال يتمدد في بدن البلد كله
وحتي نستأصل هذا السرطان  سيظل السؤال يتردد في داخلي
ما الذي تغير في مصر ؟ .. ومتي سوف تتغير ؟
!!!


Wednesday, October 19, 2011

!! لا تصدقهم



سوف يقولون لك ما يحلوا لهم ويعكر صفوك  .. فلا تصدقهم
سوف يعملون علي تغييرك  فكن عصي على التغيير
لا تصدقهم .. حينما يزعمون لك انهم يتحدثون لصالحك
يحاولون طمس هويتك
لا تصدقهم فهم يريدونك نسخه ممسوخه منهم
لا انت انت ولا انت هم .. فلا تصدقهم
يسخرون منك .. لا بأس .. قل لهم .. ولا تصدقهم
هم ادعياء النبوه في العصر الحديث
.. وهل هناك نبوه في هذا العصر الخسيس
قف لهم
واجههم
ولا تخشاهم
 لو لم تكن انت .. ما خلقت . . فلا تصدقهم

!!!

Monday, October 10, 2011

!! مــؤامره




ما حدث بالأمس يجب ان يجعلنا نسأل انفسنا الكثير من الاسئله
هذه الاسئله سوف تكون بلا قيمه لو لم يتم الاجابه عليها بكل صدق
لأن في لحظه كتلك لا يجدي الا الصدق مع النفس
الجرح غائر وعميق  لدرجه لا تحتمل سلوك آخر سوي الصدق.. والصدق فقط
 
هل ما حدث ليله امس مؤامره ؟
هل اخوتنا الاقباط تجاوزوا في المطالبه بحق من حقوقهم؟
ماحدث من الجيش المصري ودهس مدرعاته لمتظاهرين سلميين ماذا نسميه ؟
هل نحن شعب عنصري لايوجد عنده  مشكله ان يُحكم بالحديد والنار علي ان ياخذ اخ له في الوطن حق من حقوقه ؟
ما المشكله في اصدار قانون موحد لدور العباده ومن له المصلحه في تأخير اصدار مثل هذا القانون ؟

ماحدث اكبر من ان يمر مرورا عابرا
سوف اقبل ان يقول احدهم مؤامره سوف اقبل بهذا وسأسلم به

ولكن لنرجع للخلف
هل كل المؤمرات التي تحاك لنا تحاك بنفس الاسلوب وبنفس الطريق ولا ننتبه

كنيسه تبني والكنيسه حاصله علي ترخيص بناء بشكل قانوني
يتدخل بعض المتعصبون ليحرقوا الكنيسه وهي بالمناسبه ليست المره الاولي
وبدلا من التحقيق بشكل عاجل لبيان من معه الحق ومن ليس معه
 يتم التعامل بشكل سطحي وتافه مع قضيه لا ينفع معها مثل تلك السطحيه

سوف اتقبل انها مؤامره وسوف اسلم بهذا لو قلت انها مؤامره صنعناها بيدنا
انها مؤامره مصريه الصنع بجداره

اي منطق هذا الذي يجعلنا ننسي ان من يعيشون معنا في وطن واحد لهم مثل مالنا من حقوق
ان لم تتحقق تلك الحقوق فمن العدل ان يطالبوا بها وان يرفعوا اصواتهم وان يتظاهروا ليصل هذا الصوت لمسؤولين عمي المنصب ابصارهم وبصيرتهم

سوف اتقبل منك ان تقول مؤامره علي ان تسلم معي انا هناك مشكله حقيقيه يعاني منها اخوتنا الاقباط من عشرات السنين ولا يجدوا من يسمعهم فإن لم نستمع اليهم ونوسع صدورنا لهم فما نحن بمصريين حقا

ستقول انها مطالبات تمت بطريقه طائفيه بحته تم فيها رفع الصليب والنداء بهتافات بعضها مستفز
سأقول ليست اكثر من استفزاز حرق دار عباده ، هم لم يطلبوا باكثر من بناء دار عباده ثم تحرق لهم .. اي منطق هذا

نعم ساتقبل منك كما قلت ان تقول مؤامره ولكن لتوضح ولتبين لي من فضلك ما المبرر الذي يدفع قواتنا المسلحه التي من المفترض ان تحمي الجميع  ان تدهس بمدرعاتها مواطنين اقباط
ما آلمني انني تذكرت بسرعه مشهد مدرعات الداخليه وهي تدهس بنفس الصوره المواطنين الشرفاء المطالبين بحقوقهم
وما آلمني اكثر اننا منذ اقل من اسبوع مرت علينا ذكري الحرب التي امتزجت دماء الاخوه الاقباط  فيها بدماء المسلمين
حرب قامت لتدافع عن شرف هذا الوطن واليوم ينسي الوطن شرفه ويريق دماء جزء منه

هي مؤامره .. مازلت مصر علي ذلك فلتقل لي ما سبب هذا الاحتقان البغيض بين اخوه الوطن الواحد
من السبب في دفع التعصب الي قلوبنا ما السبب في كل هذه التعليقات المتعصبه البغيضه التي تذكرنا دوما ان من سالت دمائهم بالأمس هم اقباط ليس لهم الحق في المطالبه بأي من تلك المطالب وانهم تجرءوا وانهم يجب ان يقمعوا  حتي لا يسمع لهم صوت
اي تعصب اعمي احمق هذا الذي يجعل انسان يغض البصر عن قمع اخيه الذي يعيش معه في وطن واحد

من له المصلحه في تأجيل صدور قانون العباده الموحد وصدور كل القوانين التي تساوي بين كل المواطنين في الحقوق والواجبات
من له المصلحه في ذلك .. هل هي مؤامره ايضا ان تتأجل المره تلو الاخري صدور مثل هذه القوانين

قلت لك سأسلم انها مؤامره علي ان تسلم انت ايضا انها مؤامره من صنع انفسنا
هي مؤامره مصريه الصنع بإمتياز

:(


Wednesday, October 5, 2011

!! مش كئيب



هو مش كئيب .. بس هو ليه احزانه الخاصه

ليه دماغه اللي بتختلف كتير عن دماغ الأخرين
ليه حاجاته اللي بتبسطه هو مش حد غيره
مش شرط اصلا تكون بتبسط حد غيره

جواه قلب طفل
من بره جديه زايده اوووي عن اللزوم
بس من جوه طفل صغير
ممكن تفرحه حاجات تفرح طفل صغير

ليه احلامه اللي عايشها مع نفسه
وبيحب الصمت اكتر من الكلام

هو ليه احزانه الخاصه
بس هو ... مش كئيب


!!!

Thursday, September 29, 2011

خواطر مغترب 2



واحد لذيذ يسأل سؤال مش لذيذ مادم حاسس ان سنين عمرك بتضيع ياكابتن ايه اللي يجبرك علي حاجه حاسس انها بتضيع سنين عمرك ؟!
سؤال منطقي اكيد واجابته ممكن تكون غير منطقيه بس هو ده الواقع

نبدأ كده فلاش باك

قبل السفر لما كنت بسمع ناس بتاخد مرتبات خياليه والناس اللي بتاخد المرتبات الخياليه دي بيشتكوا من غلاء المعيشه وقرف الفلوس اللي بتطير وما بتقعدش كنت بستعجب اووووي واحد مثلا مثلا بياخد عشره اتناشر الف في الشهر
( كان مرتب خيالي بالنسبه ليا الايام دي ) ايه اللي يخليه يشتكي في حين ان ممكن الموظف اللي بياخد تلتميت خمسيت جنيه قادر يعيش بيهم
وكنت بقول ان الواحد لو خد نص مرتب من المرتبات دي هيقدر يعيش ملك

الحقيقه المره عرفتها لما سافرت
عرفت ان كل ما دخلك يزيد طموحك  .. بيكبر
بتبقي عاوز تعمل حاجات كتير اوووي في اقل وقت
تبدأ تحس ان المرتب اللي ممكن يكفي عشره زيك مش مكفيك
ممكن اعتبر دي حجه
اني حاسس اني دخلت مصيده فار ومش قادر اطلع منها
.. بس ممكن تبقي حجه واهيه صراحه

طيب اسمع دي

انا حاولت فعلا اخر اجازه في مصر اني اشتغل واستقر
وخصوصا ان بعد الزواج بيبقي الامر اصعب من الاول بكتير وارخم بمراحل
تخيل بقي مصر بلدي وبعد المرمطه اللي اتمرمطها بره
وقلت اني اكتسبت خبره وبتاع
واني هاجي اشتغل وانا حاطط رجل علي رجل في المجال بتاعي
وخصوصا اني خدت دورات في الماركتينج والبيع وخدمه العملا
تخيل لقيت شغل في شركه ملابس مش كبيره بس مشهوره بمرتب مش محصل تلت المبلغ اللي كنت باخده بره
احمد شفيق اخر رئيس وزراء للرئيس المخلوع قال اني عارف ان تلات تلاف جنيه  يادوب يعيشه اسره بالعافيه
طيب وستميت جنيه يا سياده الفريق ... اكيد هايخلوهم يشحتوا
هي دي الصدمه اللي اتصدمتها
مع ان كذا حد قالي انك لو كنت قعدت في مصر وما سافرتش كنت زمانك شغال بستميت جنيه ويمكن اقل كمان
(مرتبات المدرسين في المدارس الخاصه بما اني يعني لو ما كنتش سافرت كنت اشتغلت مدرس اقل من ستميه
علي اعتبار ان الاداره عارفه انهم اكيد هايدوا دروووس يعني)

نرجع لمرجوعنا
الموضوع بعد السفر بيختلف كتير اووووي
بتحس انك بتاخد مرتب يعيشك بطريقه آدميه ويخليك تجيب كل احتياجاتك ازاي هتقدر تتنازل عن ده كله علشان تيجي تشتغل بمرتب وظروف شغل أأقل كتير من بره
يعني مصيده بحق وحقيق وتلاقي نفسك عماله تتصارع مع نفسك طيب يعني هافضل طول عمري بره بلدي

لأ طبعا اكيــــــد هارجع
!!!

Monday, September 26, 2011

خواطر مغترب 1


قرار سفري صح ولا غلط ؟
بيلح عليا السؤال ده بشده اليومين دول
قرار سفري صح ولا غلط ؟
رجع بيا عقلي لقبل سفري بايام قليله
فاكر قلقي وحيرتي من خيار السفر في حد ذاته
اسافر ولا ما اسافرش كانت دماغي هتنفجر من كتر التفكير وقتها
لكن اللي استقريت عليه ساعتها انها تجربه علي اي حال
تجربه مش هاخسر فيها علي اقل تقدير لو ما كسبتش
بين قرار السفر اللي خدته وبين دلوقتي عدت سنيــــن
مش هبقي كداب لو قلت عدت وما حستش بيها كأنها ساعه زمن او حلم
عدت اربع سنين ... اربع سنيــــــــــــــــــــــــن
والرحله اللي كنت رايحها لمجرد تجربه
قلبت بجد وما بقتش تجربه قد ما بقت حياه وارتباطات والتزامات
نرجع للسؤال اللي سألته في الاول واللي بيلح عليا وهيفضل مصدعني حتي بعد ما ارجع واستقر في بلدي
القرار بالسفر صح ولا غلط ؟
سؤال مالوش اجابه عندي لغايه دلوقتي
بس اللي متأكد منه اوووي
ان سنين عمري في الغربه بتضيع من بين ايديا وانا واقف اتفرج عليها ومش عارف اعمل ايه
!!!

Thursday, January 6, 2011

!! الحادث




شفت الحادث الاخير
بتاع كنيسه القديسين
شفت لقد ايه وصلنا
اي حد عنده عقل كان لازم يتوقع حاجه زي كده
في مناخ طائفي بغيض
ودوله تؤمن ايمان تام بالتفرقه بين مواطنيها
كان لازم يحصل كده
طيب السؤال اللي شاغل بالي مش مين السبب في الانفجار
لأنه بعد الشحن الطائفي اللي عاشته مصر الشهور اللي فاتت
كان متوقع حادث زي ده ، طبعا مش بنفس الحجم
وبنفس الطريقه
بس علي اي حال كان لازم تحصل حاجه تفوقنا
وتقلنا اصحوا كفايه كده
نرجع للسؤال اللي شاغل بالي جدا
مين السبب في اللي احنا وصلنا ليه دلوقتي
مين السببب في اللي مصر وصلت ليه من انحدار وتخلف علي كل المستويات
في ظل حكم فاسد
ديكتاتوري الي ابعد مدي
يؤمن بالفكر الواحد
والحزب الواحد
والرئيس الواحد
كان لازم نوصل لكده
نوصل لحاله من التعصب الساذج
عايشين في وطن واحد
نفس الهموم المشتركه
ونفس المآسي المشتركه
ومع كل ده كل واحد شايل للتاني سكين خلف ضهره
اللي وصلنا لكده لازم يتحاسب
لازم يتقاله كفايه
لازم يقف عند حده بقي علشان ما بقاش ينفع
مصر وصلت للاخر
الطريف والمضحك الي حد البكاء اني قريت حاجه غريبه جدا
انه كان في لجنه اسمها لجنه العطيفي
شكلت لحدوث بعض احداث الفتنه في مصر
تقرأ توصيات اللجنه لازم تتجنن
لأن التوصيات دي
اتحدثت عن نفس حاله الاحتقان الطائفي اللي احنا عايشين فيه دلوقتي
وقدمت الحل علي طبق من دهب للدوله
بس باين ان فيه حد ليه مصلحه في التفرقه اللي حاصله بين مواطنين مصر
اظن لأنه حكم شعب متفتت ومتفرق اسهل بكتير جدا
من حكم شعب متحد
ربنا ياخد اللي وصلنا للي احنا فيه دلوقتي