Tuesday, March 20, 2012

!! خواطر حول الرئاسه




انا مش ناصري .. لكن مؤمن جدا بتجربه عبد الناصر اللي كانت عامله زي الحلم
تحقيقه كان فيه الصواب وكان فيه اكيد الخطأ .. زي اي تجربه بشريه 
بس الحق يتقال ان تجربه عبد الناصر كانت من اروع التجارب اللي مرت بيها مصر في العصر الحديث
علشان كده قلبي مع حمدين صباحي  
حمدين صباحي من الشخصيات صاحبه التوجهات الناصريه
 المحترمه جدا في هذا البلد

بس العقل  - عقلي انا على وجه التحديد -  بيقول ان المرحله بتتطلب تجربه جديده
 ما مرتش بيها مصر قبل كده
وشايف ان التجربه دي تكون ذات مرجعيه اسلاميه وسطيه معتدله

علشان كده عقلي مع ابو الفتوح .. عبدالمنعم ابو الفتوح على الرغم من انه كان في يوم من الايام عضو في الاخوان المسلمين
الا انه كان اكثر الوجوه اعتدالا واستناره في هذه الجماعه

وللعلم معنديش مشكله مع الاخوان .. الاخوان قعدوا فتره كبيره عرضه للاضطهاد من كل الحكام اللي مسكوا مصر
قد يكون غبائهم في بعض الاحيان هو اللي وصلهم للاضطهاد ده
بس هما فصيل سياسي زيه زي اي فصيل لازم برضه ياخد فرصته والناس في الاخر هي اللي هاتحكم
اعتقادي ان بعد الثوره مافيش حد هايجي اسوأ من اللي فات ابدا
وكل اللي هايمسك سلطه هايعمل الف حساب للناس
لأن اروع حاجه عملتها الثوره انها قتلت الخوف والجبن عند الناس

طيب فيه اعتراض هنا لازم يتناقش مادام التجربه انا شايفها لازم تكون اسلاميه
اشمعني ما يكونش العوا او حازم ابو اسماعيل
شايف وده رأيي ان ابو الفتوح اكثرهم توسطا واعتدالا وانفتاحا علي التيارات الاخري
العوا كان ليه تصريحات كارثيه في الفتره الاخيره عن اخواننا الاقباط وده في حد ذاته يخليني اقلق
كمان ابو اسماعيل بيُعتبر او انا بعتبره من الاتجاه الاكثر تشددا في التيار الاسلامي
والمرحله اللي احنا فيها دي لا تتطلب اياً من الاثنين الحقيقه

كمان في ملاحظه علي ابو اسماعيل انه لو اعتبرناه بيمثل الفكر السلفي اللي قعد تلاتين سنه يقول ان الخروج على الحاكم حرام
ولما قامت الثوره ركب الموجه وعمل حزب وانخرط في العمليه الديمقراطيه اللي كان بيقول عليها كفر وزندقه
 فده في حد ذاته شئ يقلقني جدا برضه

طبعا اكيد التيار الاسلامي زيه زي اي تيار او اتجاه او فكر في اي حته في الدنيا فيه  المتشدد جدا وفيه الوسطي المعتدل
 وفيه المتحرر جدا وبيعتبر نفسه انه اسلامي بمجرد الاسم بس

اتمني طبعا ان احنا نكون عندنا الوعي الكافي
 علشان نحاول نختار المعتدل والوسطي دايما 

لأن مصر طول عمرها كان الدين والتدين فيها مثال للوسطيه والاعتدال

اخيراً المنافسه في رأيي محصوره فقط بين حمدين وابو الفتوح ولو فاز حد فيهم هيبقي من دواعي سروري وفخري
لأن هما الاتنين صراحه من الشخصيات اللي ناضلت وكافحت دايما باللي مقتنعه بيه


 كل الكلام السابق ده بعتبره خواطر مع نفسي مش اكتر 
وعمري ما هاجبر حد  انه يوافق عليه
واكيد فيه وجهات نظر تانيه كتير ولازم تُحترم برضه
بس نحط في دماغنا ان الشعب في النهايه هو اللي هايختار
علشان الاختيار لو ما جاش علي هوانا
ما نملاش الدنيا عويل وانتخابات مزوره ومش مزوره والكلام الفاضي ده


وفي الاخر كل واحد  عنده عقل كفايه انه يشوف ايه الصح وايه الغلط

ربنا يوفق مصر دايما للي فيه الخير .. يارب



8 comments:

مهندس مصري said...

مع كامل الإحترام لرأيك
بس حازم صلاح ابو إسماعيل مش متشدد
و مش كل ملتحي يبقى متشدد
حازم صلاح أبو إسماعيل رسالة الماجستير بتاعته في كلية الحقوق كانت عن مقاومة الشعوب للحاكم المستبد في كل من الشريعة و القانون
و كان مؤيد ليها طبعاً
يعني مش كان من اللي بيحرموا الخروج على الحاكم و بعدها زاط في الزيطة
:)
حازم برضه أكتر واحد مواقفه ثورية و واضح جداً في إشتباكه مع المجلس العسكري بسبب جرائمهم اللي ارتكبوها في الفترة الإنتقالية و ما شفتش حد واجه العسكر بالوضوح ده و علق على كل مصيبة من مصايبهم طول الفترة الإنتقالية زي أبو إسماعيل و يليه البرادعي إنما الباقي كلامهم دبلوماسي متزوق لا يتناسب مع فداحة الجرائم المرتكبة

حازم أبو إسماعيل إسلامي مستقل و إن كان يؤمن بمشروع النهضة الإسلامية لكنه ليس تابعاً لمرشد الإخوان و لا لشيخ جماعة سلفية يتلقى منه الأوامر و التوجيهات يعني لما تنتخبه حتنتخبه هو مش حد تاني يكون ورا الستارة و بيحركه

و أخيراً يا عزيزي ياريت تسمع من حازم أبو إسماعيل نفسه مش تسمع عنه

آدي قناته الرسمية على اليوتيوب
http://www.youtube.com/user/HazemSalahTV

إسمعه و شوف كلامه و تعليقاته على الأحداث طوال السنة الماضية حتحس بوعي و عقلية أفضل من باقي المرشحين و مش شايفها موجودة في حد غيره غير البرادعي
:)

و أخيراً حازم محامي و رجل قانون فعارف كويس الخلل فين في المنظومة الدستورية و القانونية اللي حاكمانا و حيعرف يصلحها كويس بالتعاون مع مجلس الشعب

ثم ساعتها الناس حتعرف من مواقفه المعارضة لإنتهازية الإخوان و النور إن مش كل الإسلاميين زيهم كده

و في الآخر ليك مطلق الحرية في رأيك و إختيارك طبعاً

mado80 said...

باشمهندس محمد .. ازيك

معلش اتأخرت في الرد انا بكتب البوست وبنساه الواحد مش عارف يلاحق الاحداث من ساعه ما الثوره قامت :)


علي الرغم من اختلافي التام مع حضرتك الا ان رأيك ليه كامل الاحترام

عندي قناعه قويه دلوقتي وخصوصا بعد الدفع بالمهندس الشاطر ان احنا نسيب الصندوق يحكم والناس هي اللي هتختار وتتحمل تبعات اختيارها

بس انا مازلت عند رأيي ان الشيخ حازم ينتمي الي اكثر تيارات الاسلام تشددا
وبالمناسبه مش علشان هو مربي دقنه :)

انتمائه ما اقصدش بيه جماعه معينه انا بقصد انتمائه الفكري للتيارالسلفي عموما هو علي الاقل ما بينكرش ده

بالنسبه لمؤهلاته ورسايله العلميه
فشايف ان رساله الماجستير مش مبرر لحكم بلد حتي لو كان موضوعها عن مقاومه الشعوب للحاكم المستبد

كمان في محاوله غريبه من انصار الشيخ حازم لتخويف الناس من ان اللي مش هينتخبه هيبقي كأنه بيعمل معصيه
وذنب لعدم اقامه شرع الله
واللي هاينتخبه كأنه بيتقرب الي الله ودي في حد ذاتها كارثه
تعرف زي بالظبط ايه
زي ايام الاستفتاء الدستوري
شوفت بعيني ناس بدقون قدام اللجان بتنصح اللي يخش يقول نعم علشان دي هتبقي نصره للاسلام
صراحه مكنتش اعرف العلاقه ساعتها بين اني اقول نعم واني انصر الاسلام

دلوقتي بيحصل زي ايام الاستفتاء اللي مش هاينتخب ابو اسماعيل مش هيبقي بينصر الاسلام
كارثه طبعا بكل المعاني

في الاخر عاوز اقلك ان الشيخ ابو اسماعيل لو نجح هاحترم ده اكيد
لأن مافيش كلام هيتقال بعد كلام الصندوق الانتخابي اللي قبلنا نحتكم ليه

تحياتي يا باشمهندس محمد :)

مصطفى محمد said...

مادو العزيز

اولا: بالنسبة للتدوينة

بكل تأكيد رأيك ليه كامل الاحترام
انا عندي وجهة نظر مختلفة .. من منظور تاني .. انا يا مادو شايف ان البلد دي عشان تتصلح محتاجة زعيم ذو كاريزما يكون قدوة اخلاقية قبل اي شئ .. و يكون معاه فريق عمل يقدر يسيطر على الديدان الفاسدة اللي ماسكة كل المواقع و المناصب في مصر .. و الحقيقة ان عمرو موسي و حازم و ابو الفتوح و حمدين و العوا اشخاص على المستوي الانساني محترمين .. لكن على المستوي الاداري لدولة ذات مؤسسات .. و لا واحد يملي عيني .. و المشكلة اني فعلا حيران مش عارف هنتخب مين .. للاسف الاخوان منظمين و عندهم فريق كامل في جميع المجالات يعرفوا يسيطروا .. انما ربنا يستر .. يا يطلعوا كويسين يا يطلعوا خازوق .. لذلك الاهم من مين اللي هيمسك هو ان يتم ترسيخ مبدأ التداول عشان لو اللي هيمسك معجبش الناس يكون في آلية لنزعه

ثانيا: بالنسبة لتعليق المهندس المصري
نظرا لاني مش مهتم بمعرفة اخبار او حكاية حازم لاني مش مقتنع بيه لانه فرد كويس و لكن كمدير لمؤسسة الدولة مش مالي عيني .. فاول مرة اعرف انه محضر الماجستير و الحركات دي .. بس تسمحلي اقولك انت اد ايه منحاز لحازم .. طبعا رأيك يحترم .. بس يا ريت تلاقي ما تتوقعه اذا فاز حازم .. و زي ما قال مادو .. الصندوق هو اللي هيفصل بيننا

:)

العاب النادي said...

يعطيك العافية

العاب said...

well done

Wohnungsräumung wien said...

تسلم ايديك على الموضوع الممتاز
Wohnungsräumung
Wohnungsräumung
Wohnungsräumung wien
Wohnungsräumung wien
Wohnungsräumung wein

ريوبى said...

موضوع ممتاز
ryobi

Wohnungsräumung said...

شكرا على الموضوع المتميز
Dank Thema Wohnungsräumung